المساعد الشخصي الرقمي

مشاهدة النسخة كاملة : اقسم بالله محتاجة مساعدتكم



بطة مبطبطة
18th July 2009, 03:31 PM
السلام عليكم يا اهل النجع انا كنت بنتقد الناس ال بيكتبوا مشكلاتهم عالنت لكن لما عرفتكوا وحبيتكوا لقيت انكم انسب ناس ممكن تنصحنى بس بالله عليكم ال يدخل يكتبلى نصيحتوا لأن بجد ال حيدخل ومش حيسيب رد لأخت محتاجة لرأيو وممكن كلامو يصلح حياتها يبقى مش اخ عموما انا اتخطبت لخطيبى خطوبة عادية مكنتش اعرفو قبل كدة لأنى مؤمنة ان العلاقات ال من ورا الاهل بتفشل لما اتقدملى استخرت الله و وافقت وبعدها حبيتوا اوى اوى وكأنو بقى الدنيا كلها ولأنى مفتقدة الحنان فى بيتنا هو كان بيبقى حنون علية وفى يوم سألتو كنت بتحب قبلى كام واحدة قاللى انو عرف كتير بس حب واحدة وهو بيحكى ملامحة اتغيرت وعنيةاحمرت حسيت ساعتها ان ليها ذكرى عندة ومن ساعتها وانا شايلة فى قلبى وجالى احساس انو خطبنى عشان ينساها وصارحتوا بكدة نفالى تماما وقاللى انو لو كان بيحبها مكنش خطبنى وحلفلى واقسم على المصحف انو بيحبنى انا بس انا على طول حاسة انها لسة فى حياتو وانو اتخنق من غيرتى علية جربت قولتلو نبعد فترة ونختبر ال بيننا هو مقدرش وجالى بعد يوم البيت وامبارح جت سيرتها وقال كلام من تحت لتحت عنها جرحنى واتقلبت خناقة جامدة جدا وفى وسط الخناقة قولتلو اكيد هى ال سابتك ورمتك عشان كدة انت خطبتنى وعشان يرد كرامتو قاللى لو عايزانى اراهنك انى اخليها تنزل تقابلنى غدا فى نفس المكان ال انا وهى كنا بنتقابل فية ممكن نزلت الكلمة دى علية زى القنبلة وخاصا ان من خلال كلامنا عنها لقيتو فاكر عنها كل حاجة حتى اسم الدلع بتاع ابوها وقتها قلعتلو الدبلة وقلتلو انا مش حعيش شبح لواحدة تانية راح ملبسنى الدبلة تانى ومشى انا بموت امانة عليكم متبخلوش بالنصيحة قبل ما حياتى تبوظ انا منمتش من امبارح

نيرمان
18th July 2009, 03:50 PM
و الله يا بطة مش عارفة أقولك ايه
بصي إنتي جرحتيه جامد لما قولتي ليه أن أكيد هي اللي سابتك و رمتك و عادي أنو يكون فاكر عنها كل حاجة
لازم تقعدي معاه و تقولي ليه في هدوء أنك مش مستعدة أن حياتك تتلخبط معاه بسبب حبه للبنت دي و قولي ليه أنا مش هقدر أعيش مع واحد عايش في ذكرياته مع واحدة تانية فأرجوك فكر كويس و لو لسه بتحبها أعتبر أن موضوعنا منتهي
لو قالك هي لا تعني ليا حاجة يبقى خلاص و بعد كده مش تفتحي معاه الموضوع ده و لا تجيبي سيرة البنت دي تاني و أدام خطبك يبقى أكيد بيحبك مش خطبك تخليص حق يعني و إنتي تقدري بذكائك تنسيه البنت دي
و بعدين إنتي قولتي انو بيعاملك بحنية فهو كده بيحبك :wink3:
و ألجأي لربنا كتير و أدعيه كتير و ربنا مش هيسيبك إن شاء الله
ربنا يوفقك للي فيه الخير ليكي يا قمر و يا رب كلامي يكون ساعدك :flowers1:.

بطة مبطبطة
18th July 2009, 03:54 PM
ربنا يخليكى ليا وشكرا لأهتمامك /hoba هو بيقول وبيحلف انو ناسيها بس انا ال خايفة

spotygirl
18th July 2009, 04:05 PM
سلام عليكم بطة
معلش اسمحيلي اعلق
انتي اللي طلبتي
بس استحمليني بجد
بصي يا قمر
انتي اللي غلطانه تماما في الموضوع دة
انا مش عارفة ليه تملي بنحب ننكش في القديم ونخرج المستخبي رغم انه ممكن يوجعنا ويوجع اللي بيحبنا
هو يا ستي مش خطبك
خلاااااااااااااااااااااص اللي فات مات
وانا شخصيا شايفة انه كل اللي في دماغك دي اراجيف واوهام
وانتي بجد وجعتيه باللي قلتيه دة
وفرضا يا ستي انه ارتبط بيكي علشان ينسى
لولا انه شايف انه انتي افضل منها وانه حبك اكتر منها ماكنش هيفكر انه انتي تأثيرك عليه هيخليه ينسى
فليه تخيبي ظنه هو شاف انه انتي احسن بكتير وتتحبي عنها وعشان كدة اختارك انتي لانك قادرة تأثري عليه بروحك وحبك فساعديه
وبعدين ليه يكون عايز ينسى وانتي توجعيه وتفكريه ( دة على اسوأ الفروض )
ساعديه ( رغم اني مش مقتنعه بانه خطبك علشان ينسى ) معلش هو عك في الكلام
بس ماتنسيش انه دة ردة فعل لفعلك انتي
كلميه واعتذري ليه
ومتحاوليش تنبشي تاني في اللي مات
خلااااااااااااااااااص سيبيه مدفون وسيبي التربة مقفولة عليه
وحتى لو انتي حاسة بكدة
كوني اذكى من كدة
وبدهاء المرأة بقى نسيه
وربنا يسعدك
بس هو برافو عليه والله انه رجع لك الدبلة
كلميه واعتذريله واوعديه انك مش هتفتحي الموضوع تاني
وربنا يتمم على خير ان شاء الله /hoba

بطة مبطبطة
18th July 2009, 04:11 PM
كلامك جميل وريحنى بس انا مش عارفة لية خايفة يمكن من الحكاوى ال بسمعها عن الخيانة والغدر بس والله كلامك مقنع :tmaaaam:منتظرة مزيد من الاراء ما خاب من استشار

haneenegy
18th July 2009, 04:42 PM
الحقيقة انت التى عملت مشكلة بينك وبين خطيبك
مفيش راجل ليس له تجارب فى الدنيا وعلاقات تسبق الزواج
لازم تكونى اكثر حكمة
وخطبته لك دليل على
1- نسيانه للماضى
2- رغبته الاكيدة فى بداية جديدة
3- الصدق فى المشاعر معك

كل ما عليك هو:

1- التريس وعدم فتح حديث الماضى معة
الماضى له وحدة فلا تنبشى فى الماضى
لك ان تحاسبيه منذ بداية خطبتك لا تكلمية فى ماضية
وهو شاب طيب بدليل انه فتح لك قلبه وشرح لك بعض ماضية
هناك شباب بيعمل بلاوى وعلاقات نسائية وعلاقات جنسية
ويتعاطى المنكر والمخدرات ولا يبوح بشئ
ويبدو شاب برئ نظيف طاهر

لاتخسرى خطيبك هو معدنه طيب ونظيف وعلاقاته السابقة
عادية يمر بها كل الشباب لا تدفعية انت بيدك وبتصرفات
الى العودة لماضية السابق


2- الغيرة اذا دخلت فى الباب يخرج الحب من الشباك
الغيرة تقتل الحب فلا تضيقى الخناق علية حتى تحافظى
على خطيبك وتستمر المسيرة وانظرى الى المستقبل
تخيلى بيت مملوء بالشكوك والغيرة سيكون بيت غير مستقر
والرجل لا يحب المشاكل والعراك وتضيق الخناق عليه


3- انصحك بالعقل والتريس واقبلى ماضيه بصدر رحب
حتى يفتح لك قلبه ويكون صديقك ولا يخفى عليك اية ظروف
أو مشاكل يمر بها اليوم وغدا
لا تغلقى وتصدى الباب فى وجهه

بطة مبطبطة
18th July 2009, 04:46 PM
والله كلام حكيم الف شكر :tmaaaam:

losian
18th July 2009, 04:50 PM
سبوتي عندها حق في كل اللي قالته
و أنا رايي زيها تماما
اتكلموا مع بعض و بهدوء و اعتذري له
لانك غلطي في حقه
و بعدين انتي بتقولي انه بيحبك و حنين عليكي
ليه بقة هو بيعاملك حلو و انتى هنتيه /to2to2
و قلتي انها رمته رغم انه حلف لكي كتيررررررررر
و انتي مش صدقتي
ربنا يارب يوفقك و يهديكي الي ما فيه الخير :flowers1:

بطة مبطبطة
18th July 2009, 04:55 PM
شكرا يا لوسيان لاهتمامك /hoba

gogacola
18th July 2009, 05:12 PM
السلام عليكم ورحمه الله وبركاته
اولا يااختي بطوطه مافي شاب ماعرفش بنت ومافي شاب ماحبش يعني هتقلعيله الدبله وتعيشي راهبه لا دي حاجه في ايدك تنسيه كل لفات وتخليه هو بينه وبين نفسه يقول كل الفات ده كان سوري زباله وانتي تكوني الماسه الفي حياته ربنا يرزقه حبك ومودتك
ثانيا ماتحوليش تفكريه بأي واحده وحسسيه بقيمتك انتي بس وحسسيه بالسعاده والجو الانتي عملهولوا وهو معاكي ماتخليهوش كل اما يبصلك يفتكرها عشان تعليق قولتيه لالالالا كلي في بعضك اوك الغيره حلوه وبتخلينا نعمل حاجات نسعد بيها الادمنا لكن ماتظهيرهاش عشان يقدر يصارحك بكل حاجه وانتي تكوني محفظه جراب يعني لمشاعره ماتكونيش مصدر رفض وقلق من ناحيته
ويخاف يحكي

وياريت ماتعتذريش عن العملتيه واتعاملي عادي جدا واطلبيه وكلميه عادي زي مابتكونوا كويسين ولو قالك انتي لسه زعلانه قوليله ان انتي ماتقدريش تزعلي منه وان انتي عارفه انه بيحبك انتي وقفلي ومطوليش وخليكي كول حتي لو من جوه نااااااااااااااااااار كده لما يلاقيكي عاقله هيبقي خاتم في اصباعك وهيقولك علي كل البيعمله يعني هيكون كتاب مفتوح بالنسبه لك والصاريح احسن من غيره ربنا يدمها عليكي نعمه ويحفظها من الزوال وبعدين فيه حاجه بلاش تجرحيه بالكلام حتي لو انتي مجروحه مش حلوه انك تقوليله رمتك والكلام ده /heat

الاهم بقا يستي ماتدلعيهوش اوي من غير مايكون فيه مقابل يعني هات وخد بدل ماهيتعود انه ياخد ومايديش

وصدقيني هو و لا بيحبها ولا حاجه والدليل انه قالك لو عايز انزل اقبلها من بكره هنزل يعني هي قيمتها اخرها مقابله وشكرا وربنا يعفنا يستي وبنات المسلمين لكن انت ياجميل جالك واختارك عشان مأمنك علي بيته واسمه وقلبه ودي امانه كبيره محتاجه حمايه بهدوء ومن غير رمي دبل وربنا يعينك وانا هزورك تاني ويارب كلامي يروق بالك شويه



ربنا معاكي انا حاسه بيكي والله بس جربي القلتلك عليه وادعيلي ربنا يهديني ويرضي عني /hoba /hoba

بطة مبطبطة
18th July 2009, 05:18 PM
الف شكر يا قمر والله كلامك عاقل بس انا حاسة انى دور تانى ومسكن ينسى بية ال فات منتظرة ردودك

gogacola
18th July 2009, 05:32 PM
دور تاني وتالت والكلام الفاضي ده هو لو عاوز يرجعلها كان رجعلها زي ماقلك هو يعني هيتعب قلبه ليه لو هو بيحبها ده من الاخر كان ماجالكيش من الاول صح ولا غلط ولا اتلكك وخد الدبله وخلع يلبسهالها هي ههههههههههه

حلوه خلع دي بقولك يابطه اعقلي انا عندي صحبتي كانت بتقول زيك كده
دلوقتي بيقولها انا عمري ماحبيت غيرك ووالله بيوطي يبوس جزمتها وكانت عملالي الهوليله والاحزان ومابتكلش وحزنانه كده برضه وبعدين انتي داخله علي زواج يعني دنيا تانيه هتشوفه مع بعض ايام ربنا يجعلها كلها في سعاده وخير اللهم امين يارب
من الاخر مافيش راجل بيجي علي قلبه مهما كانت النتيجه يعني لو كان بيحبها ماكنش خطبك زي ماقلتلك
وماتفكريش فيها وحتي لو جت في بالك قولي اللهم اجعله قره عين لي واجعلني قره عين له واصلح لي شاني كله وماتقلقيش لما تذكري الله قلبك هيطمئن زي ما الرسول (ص) قال

وبرده ابقي طمنينا عليكي ولو عوزتي تتكلمي فضفضي احنا اخوات بس ماتقوليش الدور العلوي اوك خلي عندك ثقه في نفسك وفي الله وفي حبيبك cry2/
عشان مايزهش من النكد الرجاله بيجروا بالمشوار عشان لحظه سعاده :ura1:

بطة مبطبطة
18th July 2009, 06:01 PM
عندك حق والله الله يريح قلبك :cheer:

عمر الغزالى
18th July 2009, 06:14 PM
والله أختي بطة أ،ا مش عارف أقول ايه لأني معشتش علاقات سابقة ، الحمد لله سجلي أبيض ومش هعيش ان شاء الله ، وفي نفس الوقت أنا مش بنت عشان أحس بالغيرة ، بس أنا حقولك كلام يمكن يفيد..

* مش من السهل انك تلاقي انسان يحبك ويضحي عشانك ، عشان كده انتي طالما متأكدة انه بيحبك جدا وانتي برده بتحبيه ، يبقى اوعي أبدا تفرطي فيه مهما كانت الأسباب واستحمليه على قد ما تقدري ، ولما تيجي سيرة الموضوع دهوت اطلبي منه انه ميفتحهوش عشان بيضايقك وهو أكيد مش حيفتحه ، وهكذا حضرتك متفتحيهوش خالص وانسيييييييه ، وانسي ان هوه فاكرها ، وحتى لو هوه مش ناسيها بلاش تقنعي نفسك انه لسه فاكرها ( سعات لما الواقع يبقى وحش ومواجهته والتعامل معاه ممكن يعمل مشاكل يبقى لازم نعيش نفسي في واقع غير هذا الواقع حتى لو بضحك على نفسي ) كمثال أنا في أولى كلية حصلتلي ظروف ومدخلتش الامتحانات وراحت على سنة رغم اني كنت من 30 أوائل الثانوية العامة عالجمهورية ، فلو انا كل شويه افتكرت هذا الواقع المؤلم كنت احتمال اسيب الكلية أو اتني فاشل فيها ، بس انا نسيت الموضوع ده تماما وكنت كل شوية بفكر نفسي بانجازاتي السابقة حتى من الله على هذا العام ورزقني بامتياز..

وحضرتك برده بدل ما تفتكري الموضوع ده ، افتكري مواقفه الحلوة معاكي وافتكريها بتفاصيلها واقعدي اكتبيها وكل شوية اقريها وافتكريها وسجليلع عالموبايل عبارات تدل على حبه لكي ، وهكذا كل ما تفتكري الموضوع ده علطول اطرديه بذكرياتك الجميلة معاه ، لحد ما حيجي يوم حتنسي وهوه حينسى الموضوع ده تماما..

ولعلمك انا حكلمك من منطلق الصداقة مع فارق التشبيه ، انا شخصيا في اصدقاء كنت بعتبرهم رقم واحد في حياتي وهم أفضل ناس ممكن الواحد يعاشرهم ، بس بعد كده لما قابلت ناس أفضل منهم حب الناس التانين طغى على حبي السابق لهم ومفيش في قلبي دالوقتي غير الناس التانيين دول لأنهم بأفعالهم الاجميلة نسوني الناس اللي قبلهم ، وهكذا باذن الله لما يحيا معكي أجمل أيام عمره كوني واثقة انكي ستكونين ملكة قلبه بلا منازع ,وده اللي أنا حاسه من كلامه معاكي دالوقتي..

ونصيحة لكي ، انتي قادمة على بناء بيت مسلم وسيكون لكي أبناء فاحرصي دائما على أن تكوني أم على قدر المسؤوليه في محافظتك على عدم سقوط هذا البيت حتى ينشأ أبناؤكي نجباء وقادة وناجحين ، وذلك بعدة أمور :
1- دائما قدمي حسن الظن مع زوجك .
2- كوني امرأة راسخة ( تقيلة ) بمعنى ان مش أي حاجة تهزك وتغير مشاعرك لأ ، حكمي عقلك ولا تدعي عواطفك تحركك.
3- لا تغضبي ولا تتسرعي في اتخاذ القرارات .
4- كونى حريصة على علاقتك به أكثر من حرصه هو على علاقته بكي .
5 - اذكري له وذكريه دوما بالمواقف الجميلة ولا تذكري أبدا مواقف حزينة ، لأن الموقف بتكرار الذكر لن ينسى بل سيظل حاضرا في الذهن.
7- اقري كتير عن مواضيع خلق الزوجة وكيفية بناء بيت ناجح.

أتمنى اني أكون أفدتك وربنا معاكي.

My all
18th July 2009, 07:00 PM
ياحبيبة قلبى
والله حاسه بيكى جدا بس بجد ياريت انتى بحنانك وحبك ليه تخليه ينسى اى حد قبلك مش انتى اللى كل شويه تفكريه وتحاولى تقارنى حتى نفسك باى حد لانو طالما اختارك انتى تكونى زوجه ليه يبئى خلاص بئه يعنى انتى وبس وحاولى تكونى عند حسن ظنو وهوا ان شاء الله عمرو ما يبص لغيرك لو كانت ايه طالما مرتاح معاكى
وربنا يصلح الحال بينكو يارب
وصلى وادعى كده وان شاء الله خير

maryo
18th July 2009, 07:22 PM
اظن ان الغيرة دليل على الحب وحولى ماتفتشيش فى اللى فات ولا اكنة موجود وعيشى حياتك معاة من يوم ماعرفتية واكيد انتى هتقدرى تنسيهالة

قلب المحيط
18th July 2009, 07:31 PM
بصي حبيبتي بما إنك حلفتينا بالله ماكنتش قولت رأيي لسبب ..
إن مشكلتك دي أنا كنت بفكر فيها إن لو حصلي كده وخطيبي كان بيحب واحدة قبلي بجنون يا تري هعمل إيه ومكنتش بلاقي إجابه فعشان كده ماكنتش هرد .. بس كنت هتابع المشكلة
بصي يا قلبي أنا فيه حاجه لفتت نظري في مشكلتك أنه رجعلك الدبلة تاني رغم كل الكلام إللي قولتيه .. وبصراحة أنا إحترمته جدآآآ عالموقف ده لييييه؟
لأنه بكده أثبت إنه متفرقش معاه التانيه وماكنش خاطبك عشان يضايقها
ولنفترض إن ده من ضمن الأسباب بيتهيألي كفاية إنه شاريكي وأثبتلك إنك مهمة عنده لما لبسلك الدبلة تاني ونصيحة إعملي زي ما الإخوة والأخوات إللي قبلي نصحوكي
لأنه أثبت إنه ممكن يبدأ حياة جديدة وينسي التانية
بس هوا محتاج منك إهتمام وإنك تحاولي علي قد ماتقدري ماتجبيش سيرتها أبدآ حتي لو وصلت إنه يغلط ويناديكي بإسمها .. ساعتها إبتسميله أو إعملي نفسك ماخدتيش بالك عشان مايتحرجش وإستمري في الموضوع عادي وخليكي إيزي وفريش وهتلاحظي بعد كده إن هوا إللي هيتضايق لو جت سيرتها لأي سبب إن كان.
وربنا يوفقك حبيبتي ويبعد عنك الوسواس
وأتمني أكون أفدتك
:clover: :roses: :clover:

منونة
19th July 2009, 07:16 AM
ازيك يابطوطة

طبعا انا مهما قلت مش هيبقى زي الناس اللي سبقتني ردت ردود كلها رائعة وجميلة، ربنا يبارك فيكم يارب ويجازيكم كل الخير

والله انا رايي انك تثبتي

وحتى لو كان فيه ذرة زكرى ليها في قلبه ومش هقولك ذرة حب

انتي اللي بايدك تحتويه وتشعريه باهميتك وبحبك وبحنيتك

ويوم ميلاقيكي جنبه وبتحبيه قوي عمره ماهيفكر في غيرك

اوعي تخنقيه بغيرتك

اقلبي رد فعلك لو اي حاجة صدرت منه

يعني بدل ماتزعقي او تقوليله انت فاكرها والكلام ده

ابداي تغيري الموضوع وتبتسميله بحنان وتحسسيه بحبك ليه

وتتكلمي عن حياتكو الجميلة اللي بتستنيها والبيت السعيد اللي هتبنوه سوا ان شاء الله

وبعدين استني هنا

انتي مش صليتي استخارة

يبقى تمام

خليكي واثقة من جواكي ان ربنا لايمكن يريدلك اي شر

والله انا مقدرة خوفك بس ربنا معاكي

ربنا يعينك ياحببتي ويتمملك على خير

وباذن الله هتبقي اسعد زوجة في الدنيا

تقبلي كلامي المتواضع

:flowers1: :flowers1: :flowers1: :flowers1: :flowers1:

do3a
19th July 2009, 08:09 AM
يا بطة انا مقدرة والله اللى انتى فيه وخاصة انك بتحبيه
بس لازم تبطلى الغيرة دى
لان الغيرة الزيادة دى بتبقى قنبلة موقوتة
وساعة ماهيزهق حتى لو بيحبك وانتى الدنيا كلها بالنسبة ليه هيسيبك
لازم تحسسيه بالثقة شوية
ولازم تكونى واثقة فى نفسك اولا
وتكونى عارفة انه طالما اختارك انتى وقرر انه يكمل بقية حياته معاكى
فى نور
يبقى اكيد بيحبك
وهو لو كان بيحبها اوى كده كان على الاقل خطبها
وهو لما يحس انك بتحبيه وبتثقى فيه
عمره ما هيشوف غيرك قصاده ولا هيفتكر اى حد
لكن لو فضلتى تشكى فيه اكيد هيخونك
لانك كده كده مش بتثقى فيه فالحكاية هتبقى مش فارقة

بطة مبطبطة
19th July 2009, 01:36 PM
والله كلامكم ريح قلبى وانا بجد بشكر كل نجعاوى اهتم و رد والله مش عارفة اشكركم ازاى انتو حقيقى عائلتى الجميلة المخلصة :flowers1: :flowers1: :flowers1: :flowers1: :flowers1: