المساعد الشخصي الرقمي

مشاهدة النسخة كاملة : مخنوقه اوى ونفسي اتكلم



some_one
1st August 2009, 01:25 PM
انا هحكى مشكلتى الى خلاص حصلت ووجعتنى وخلاص بس عشان نفسي احكى
انا بنت عندى 22 سنه خلصت دراستى فى كليه الحقوق من سنتين واشتغلت بعد ما خلصت على طول فى مجال المحاماه اشتغلت مع محامى واول ما رحت كنا 7 بنتدرب 3 بنات و4 ولاد حبيتهم اوى وكنا كلنا بنحب بعض اوى وبنخاف على بعض اوى وبما انى كنت اصغر واحده فكنت بحس ان كلهم بيدلعونى وكنت بحس بحبهم اوى المهم انا مش هطول عليكم واحد منهم اعجب بيا اوى وكان اكبر منى ب3 سنين انا فى الاول رفضت انى ارتبط بيه لانى كنت واخده القرار ده والى يعجب بيا ييجى لاهلى على طول ده القرار الى كنت واخداه بس الصراحه هو شدنى ليه باسلوبه ورجولته وخلانى انا الى اعجب بيه وجه كلمنى تانى لتانى مرة وانا قلتله ان انا كمان معجبه بيه واتشديتله غصب عنى وارتبطنا قالى انه هييجى يتقدملى اول ما تسمح الظروف وان قدامه شهرين ويشطب المكتب بتاعه وييجى يتقدملى وعشت معاه بجد اجمل قصة حب ودى كانت اول مره ارتبط واحب فيها يمكن محدش هيصدقنى بس بجد انا عمرى ماحبيت حد ف حياتى ولا حتى ايام الجامعه ولا لعب العيال بتاع الجامعه ده ولا اى حاجه دى كانت اول تجربه حب ف حياتى وحبيت بجد واخلصت اوى وحكيت لماما وخليتها تكلمه عشان تطمن
وماما قالتلى انا واثقه فى اختيارك وكل الناس وكل زمايلنا عرفو اننا بنحب بعض المهم يعنى انا كانت ليا واحده صاحبتى الانتيم يعنى دى انا وهيا اصحاب من واحنا صغيرين ابتدائى واعدادى وثانوى وكليه مع بعض بجد متربيين مع بعض وانا بموت فيها عرفتها عليه هيا كانت محاميه برضو بس عند محامى تانى عرفتو عليها طلب منى انى مكلمهاش تانى وقالى انه مش مرتاحلها قولتله ازاى انا مليش صاحبه غيرها هو مكنش بيعجبه لبسها هيا اه كانت بتافور شويه بس والله هيا محترمه جدا واقنعته ان الانسان مش باللبس وانها من جوه كويسه اوى ولما اتعرف عليها قالى خلاص براحتك بس انا قولتلك وانتى مسمعتيش كلامى طبعا انا مكنتش اقدر استغنى عنها داحنا متربيين سوا واصحاب فوق ما اى حد يتخيل المهم كنت بقربها منه عشان يتطمن وبعدين سافرت شرم اسبوع عشان اصيف وكان المفروض اول ما ارجع هو يظبط معاد مع باباه عشان ييجى يتقدملى وكنا متفقين على كدا وبعدين سافرت وكنا مع بعض بالتليفون وكنت كل يوم بحبه اكتر من اليوم الى قبله والمفروض هو كمان واول ما رجعت وجه اتليوم الى كنت مستنياه لقيت المفاجاه لقيت اسلام الى هن حبيبي عمرى كله خطب مى الى هيا صديقه عمرى برضو والمفروض انى اجى احضر خطوبتهم واباركلهم طبعا محدش هيصدقنى بس تخيلو انا اصلا مكنتش مصدقه وكلمت مى تخيلو ردت قالتلي ايه قالتلي بصى انا مش عاوزة كتر كلام الى حصل حصل وانا مش عاوزة من الدنيا حد غيرة وقفلت ف وشى انا تعبت ودخلت المستشفي واعدت شهرين والصدمه الاكبر انى طلعت لقيتهم اتجوزو
انا عملت ايه حبيت واخلصت وعملت كل حاجه ممكن تتعمل ليه عمل فيا كدا انا لغاية دلوقتى مش عارفه احب ولا اخلص ولا اصدق انا حكيتلكم على كل حاجه من غير زياده ولا نقص واحكمو انتو انا غلطت ف ايه عشان يتعمل فيا كل ده
انا خلاص مش قادرة اثق ف اى حد تانى وحتى لو اتجوزت مش عارفه خلاص مش عارفه بجد اعمل ايه وتعبت

losian
1st August 2009, 02:15 PM
انتي مغلطتيش في اي حاجة ما اظنش انك لما
تخلصي لصاحبتك تبقي غلطتي بس هي مش
قدرت حبك و اخلاصك لها رغم انك اتمسكتي
بصحبيتك بس بجد هي متستاهلش انك تكوني صاحبة ليها خالص
و لا تستحق ان حد يخلص ليها و اكيد اللي عملته ربنا هيرده لها
مش عارفة بصراحة اقول ايه بس بجد هي المشكلة في صاحبتك و بجد
هي مش تستحقك و مش هي قالتلك مش عاوزة كتر كلام خلاص
انت كمان مالكيش دعوة بيها و انسيها خالص
و ان شاء الله دي مشكلة وقت و هتعدي
بس انت لازم تقربي من ربنا جامد علشان يقدرك و تقدري تخرجي
من حالتك ان شاء الله و اكثري من الدعاء اليه
و حاولي تنسي لان بجد المشكلة مش في اللي حبيتيه لان ماكنش يستاهل حبك ، المشكلة في صاحبتك اللي متستاهلش اخلاصك ليها
ربنا يقدرك و تنسي و تلاقي اللي يستاهل حبك و يقدره كويس

كريزى جيرل
1st August 2009, 02:53 PM
اسمحيلى يا سوم ون اقول رأيى فى مشكلتك
بدايه من اول ما رفضتى ترتبطى بيه كده من غير خطوبه انتى كنتى تمام 00
وبعدين لما قالك تانى ايه اللى غير مبدأك 00 مش فاهمه بجد ؟
اولا كويس انك قلتى لمامتك
لكن بردو مش صح التصرف كده
انتى كنتى ممكن تقوليله تعالى اتقدم ان شالله بدبله بس من غير محبس حتى 00
بس تبقى فى خطوة رسميه ويبان ان فيه جديه فى الموضوع مش تسليه يعنى
وفى الوقت اللى كنت هتقوليله كده كنتى هتعرفى اذا كان جاد ولا لا
لكن انتى بتقولى ارتبط بيه
ارتباط ايه بقى اللى من غير لا مقابله اهلك ولا فاتحه ولا دبله ولا اى حاجه
كله كلام فى الهوا
خدتى منه ايه غير كلمه هعمل
هعمل 00 الشهر الجاى
كله كلام فى الهوا متضمنيش منه كلمه
ومهما كنتى بتحبيه لازم تحكمى عقلك قبل ما تحكمى عوااطفك
مش بقلك تبقى ماديه وتلغى قلبك
لا بالعكس
كان المفروض بس يبقى فى مقابله لاهلك وباباكى وقراييه فاتحه ان شالله بدبله بس
على الاقل عشان محدش يتكلم عليكى
لكن انتى بتقولى وكل الناس وصحابنا عرفوا اننا بنحب بعض
طب انتى موقفك ايه قدام الناس وهوة بيحبك وانتى بتحبيه ومفيش بينكو اى حاجه غير كلام فى الهوا مفيش اى رسميه فى الحوارر كله من الاول
ولنفرض انه مكنشى بيتسلى ولا حاجه وكانت نيته سليمه
لكن عارفه ان انتى اديتيله فرصه انه يفكر فيكى وفى غيرك عشان انتى كده كده مضمونه
لكن لو كان فيه جديه من الاول كان زمانه فكر بدل المرة الف قبل ما يسيبك
وفى الحاله دى لو كان سابك يبقى هوة اللى خسرك مش انتى اللى خسرتيه 00

ثانى حاجه لما قالك تسيبى صحابتك
طبعا انتى كنتى تمام انك مسيبتيش صديقه عمرك خصوصا انه لسه مش زوجك يعنى ميقدرش يفرض عليكى حاجه
لكن اكبــــــــــــــــــــــ ــر غلط انك قعدتى تقربيهم من بعض
يعنى حاطه النار جنب البنزين وبتقولى مش هتولع
بتقربيهم من بعض ليه مش فاهمه انا
بتقولى عشان يطمن
انا شالله عنه ما اطمن
وعموما صاحبتك قالت هوة سابك وانا مضربتوش على ايده عشان يحبنى
طب ايه المشكله انه يتجوزنى ؟ ( هيا بتفكر كده )
وهيا انصح منك انها ارتبطت بيه رسمى مش بالكلام
ده طبعا ميمنعش انها ندله ومتستاهلش تصاحبيها
وساعتها بقى المفروض لا كنتى تكلميها ولا تكلميه
بالعكس خليكى جينتل وان جالك الغصب اعمله بجميله
بينى ان الموضوع كله ميفرقش معاكى وان هوة اللى خسران وربنا يهنى سعيد بسعيده
يشبعوا ببعض ما دام همه الاتنين غدارين ولايقين على بعض وما دام همه كده يبقى فى يوم واحد فيهم هيغدر بالتانى
وكما تدين تدان
ولازم مش تبينى كده بس
لا
لازم من جواكى تحسى كده
وتعرفى ان انتى فى نعمه انه سابك
مش احسن من انك تتجوزى واحد بالنداله دى
يوعد ويخلف وبمجرد ما سافرتى اسبوع راح يحب ويتجوز
هوة اللى خسرك
وانتى اللى كسبتى
كسبتى انك تتعلمى تبقى واقعيه اكتر من كده 00 كسبتى انك تتعلمى تنقى صحابك احسن من كده 00 كسبتى انك تعرفى اللى بيحبك بجد من اللى بيتسلى
مش بقلك متثقيش فى حد
لا طبعا ده اكبر غلط
لكن (حرص من صاحبك ولا تخونوش )
يعنى اى حد يحب يرتبط بيكى ترجعى لمبدأك اللى اتخليتى عنه باعجابك للشخصيه دى
وتبدأى حياتك بكل قوة تانى وتنسى اى حب لشخص ميستاهلكيش
وخلي فى دماغك المثل (البلدى )
سورى يعنى اعذرينى فى المثل
- اللى ميحطنيش كحل فى عينه محطهوش جزمه فى رجلى -

وانتى لسه صغيرة وقدامك طريق طويل ولسه هتقابلى كتير وتجارب كتير وهتتعلمى كتير
مينفعش من اول تجربه تستسلمى وتنكسرى وتقولى فقدت الثقه فى كل الناس
الناس الكويسه كتير
مش معنى ان اللى وقعتى فيه كان وحش ان الناس كلها كده
ودوقتى مش عاوزاكى تقع فى غلطه تانيه انك تحبى تانى بسرعه
لا سيبى نفسك تهدا خاالص
وخلى تركيزك فى شغلك كويس اوى
واعتبرى دى تجربه اتعلمتى منها كتير
ومتندميش على انك حبيتى
ومتضيعيش وقتك فى التفكير فيه او فيها
انسيهم زى ما نسيكوا
همه دوققتى مش فاكرينك
انتى كمان انسيهم تمام واشغلى نفسك عشان تنسى وتبدأى حياه جديده كل تركيزك ففيها فى شغلك 0
وعقبال ما نباركلك على العريس اللى يستاهلك واللى تكون ثقتك فيه فى محلها
وربنا يوفقك
اتمنى اكون لو مفادتكيش خففت عنك على الاقل
وربنا معاكى
تحياتى
كريزى جيرل

some_one
4th August 2009, 02:27 PM
متشكرة ليكم اوى والله يا جماعه انكم اهتميتو ورديتو وانا ارتحت اوى بكلامكم ده وعلى فكرة انا خلاص اتاقلمت ع الوضع وبقيت احسن كتير لانى مقتنعه من جوايا انى احسن منهم هما الاتنين لان الاتنين الخيانه ف دمهم وعموما ربنا يوفقهم برضو لان كل واحد ليه نصثيبه والطيبون للطيبات والخبيثون للخبيثات
وعلى فكرة انا متقدملي واحد محامى برضو الظاهر ان قرعتى مش بتقع الا معاهم بس هو بجد انسان محترم جدا وحاسه ان الموضوع لو كمل احتمال انسي وانا اتمنى كدا بجد وياريت كلكو تدعولى عشان انا بجد نفسي اخرج من الى فيه وابدا حياتى من جديد :flowers1: :flowers1:

كريزى جيرل
4th August 2009, 04:15 PM
ربنا يسعدك يا رب وتبقى من نصيب اللى يستاهلك
ربنا يوفقك
ومتنسيش صلاه الاستخارة :flowers1:

أبرار
4th August 2009, 05:25 PM
أنا حسيت إني بشوف مسلسل أو فيلم عربي سخيف

عليكي بتقوى الله

وربنا يرزقك باللي يستاهلك إن شاء الله :flowers1:

منونة ومريومة
17th August 2009, 04:43 PM
هاى الاول نتبدى بصلاة الهادى (ص) :old:
حكايتى عادية انا فى سن مراهقة بتأثر باى كلام مش لاقية اللى افضفض معاه عندى ملل قمة الملل ارحمنى يارب انا مبسوطة منتدى النجعاوى خرج كبتى ميرسى مشكورين على ذوقكو واهتمامكو بالحاجات النفسية دى انا متاكده انى فى حد ممكن يريحنى هنا لانى بجد محتاجة لملأ فراغى بأى حاجة غير طبعا (المواعين والغسيل) ههههههههه عموما كنت هاموت لو ما تكلمتش شكرا لسماعى ورمضان كريم
:myamya: :flowers1:

miemie
18th August 2009, 09:20 PM
بقولك ياسوم وان ربنا معاكى يارب ويريح قلبك عشان دا فعلا جرح كبييييييييييير اوووى بس يمكن المشكله دى لو حسبتيها كويس هتلاقيها ان هى حصلت عشان تقربى من ربنا اكتر واكتر واكتر وترضى بنصيبك واللى ربنا كاتبهولك لان حتى لو صاحبتك موش كانت خدعتك طول ما ربنا موش كاتبه من نصيبك موش هيبقه ليكى ودا عشان تتعلمى تثبتى على مبدئك وموش تغيريه مهما كان واللى عاجبه بقه انتى موش قليله وكمان يمكن دا يعلمك تبقى مسامحه اكتر او عدوانيه بس انتى لازم تحكمى عواطفك وتشوفى ايه اللى هيرضى ربنا ويفرحه انتى بس سامحيهم واتمنلهم كل خير عشان دا هيتردلك انتى بردو وديما خلى ذكر الله سبحانه وتعالى وسيدنا محمد على لسانك وموش تعقدى نفسك عشان دى موش حاجه كويسه فالاول وفالاخر ان شاء الله ربنا هيرزقك بابن الحلال اللى يسعدك وانتى لازم ترضى ربنا فيه موش عشانه هو لا عشان خاطر ربنا وان شاء الله هتلاقى كل اللى بتعمليه فى ميزان حسناتك موش فى حد يقدر يقولك موش تزعلى عشان موش بايدك بس حاولى تشغلى نفسك وسامحى على قد ما تقدرى سامحى عشان دى اجمل حاجه فالدنيا وكملى حياتك عادى وكل ما تلاقى نفسك زعلتى قولى انا ازاى هزعل على حاجه ربنا كاتبهالى انا كدا ابقه موش رضيت باللى كاتبهولى وكدا غلط وحرام وانتى ان شاء الله هتلاقى نفسك واحده واحده بتنسى وهتلاقى اللى احسن منه ان شاء الله ودورى حواليكى اكييد هتلاقى واحده بتحبك اوووى ومخلصه ليكى بس انتى موش واخده بالك
وربنا معاكى يارب ويوفقك ويرزقك باللى يسعدك وترضى ربنا فيه

ياسمين2
19th August 2009, 04:10 AM
متزعليش على اللى باعك واللى يبيعك المفروض تنسية على طول مادام هوه مقدرش حبك لية انتى انسية خالص واعتبريها تجربة فاشلة ومش معنى ان واحد عمل كدة يبقى كل الناس كدة واصلا انتى مغلطيش فى حاجة وصاحبتك دى انسيها خالص
متزعليش كدة وقومى اتوضى وصلى مين عارف كان ممكن يكون ولد وحش ولا حاجة او كان مبيحبكيش لشخصك او كان هيحصل حاجة اوحش من كدة يعنى انتى انسى كل دا واتوضى وصلى ركعتين شكر كمان

البشمهندس صيحو
20th August 2009, 04:42 PM
دا عيل عينه فارغه
وانت تحمدي ربنا انك ما اتجوزتهوش

لان النوعيه دي ما تملاش عينها غير التراب

وهتشوفي بعدين

اد ايه هيتعب

كفايه انه ظلمك

وهتشوفي

هتدور الايام

وهيرجع يكلمك

ويقلك انك كنتي احلي ايام

بس ساعتها

لازم تعرفي كويس جدا

انك انسانه غاليه و ثمينه جدا

وهو شخص مش بتاع الغالي

انا متأكد

ان ربنا هيرزقك بواحد احسن منه مليون مره

وهيعينك علي طاعه ربنا

اعرفي ان دا ابتلاء من ربنا ليكي

وعسي ان تكرهوا شئ و يجعل الله فيه خيرا كثير


قربي من ربنا وهو هيعينك

keleopatra
20th August 2009, 05:12 PM
معنديش اللى اضيفه بعد الكلام ده كله خصوصا راى كريزى وصلاح
بجد رايهم فى الخلاصة كلها
ولو مشيتى عليه هتعدى المحنة ده وهتبصلها على انها ذكرى من الماضى وبعد فترة هتنسى حتى الذكرى ده
اشغلى وقتك بذكر الله وبرك لامك وابيك وركزى ف شغلك
ونصيحة
متخديش واحد لمجرد انه ينسيكى الماضى
لانك كده هتظلميه وهتظلمى نفسك
وقبل كل حاجة
صلااااااااااااااااااااااا اة الاستخارة
لا غنى عنها لكل مسلم
تقبلى ردى ومرورى

ليه كده يا دنيا
20th August 2009, 11:21 PM
السلام عليكم و رحمة الله و بركاتة
تسمحيلى اقولك انه انتى الوحيدة الكسبانة
فرغم انه انتى خسرتى اللى كان هيبقى خطيبك و صحبتك
بس انتى كسبتى نفسك و ده احسن بكتير
و تسمحيلى اقولك انه انتى من الأول كان لازم تعرفى انة كده
لأنك اما قولتيلة يجى عشان يتقدم لأهلك ما رحش لحد
و بعدين لو كان بيحبك فعلا ما كانش قدر يستغنى عنك
على العموم ربنا يوفقك و تلاقى انسان يستهلك بجد و هتلاقى ان شاء الله

قلب المحيط
20th August 2009, 11:54 PM
بصي يا قمر أكيد مفيش كلام يتقال بعد كلام إخواني وأخواتي الأفاضل
لأن ما شاء الله قاموا بالواجب :myamya:
بس أحب أقولك إن البني أدم ده مششششششششش كويس خالص
وقولي الحمدلله وإسجدي لربنا شكر إنه خلصّك منه وإنه كشفلك صحبتك إللي الله يسهلها ماتستاهلكيش نهاااائي
وعلي فكرة إنتي كده ربنا بيحبك وعلي رأي ( صيحو ) بكرة يندم أشد الندم
وكمان لما يشوفك مبسوطة مع زوجك المستقبلي إن شاء الله
ده غير إللي هتعمله صحبتك فيه وبكرة ربنا يوريلك

بجد قصتك أثرت فيا جدآآآ
ربنا يقويكي حبيبتي ويارب يدخل إلي قلبك السكينة والإطمئنان .. أميييين
وأسفة لو كنت طولت عليكي :flowers1: :flowers1:

no_loveee
2nd October 2009, 05:55 AM
يالهوووووووووووووووى فى داهيه هما الاتنين خلى العنب يفرح ببذروه :] :] :] والطيور على اعشاشها تقع ................ويالا اديكى عشيتى قصه واخرجتى استفدك منها :clapping: :clapping: وربنا يجبلهم عفرتوا كده يتربا فى عنبهم ........وانتى يجبلك احلى ملاك على الارض :flowers1: