المساعد الشخصي الرقمي

مشاهدة النسخة كاملة : صدق .......او......لاتصدق



some.one
12th December 2010, 12:17 AM
السلام عليكم ورحمة الله وبركاته

مشكلتى مع حمايا وحماتى.........ومش زى ما اى حد ماهيتوقع ان هما بيعملولى مشاكل مع زوجى وبيكلمونى وحش وبيوقعوا بنا .............زوكل المشاكل المعتاده دى ..........لالالالالالالا الوضع مختلف تماما

بداية انا متزوجة من حوالى سنة ونص من رجل بحبه جدا ومتفاهمين وحاياتنا جميلة اوى الحمد لله وهو راجل ماشاء الله عليه فى كل حاجة ممتاز ........اكيد ماحدش بيخلى من العيوب بس هو مؤدب وعلى خلق ودين وبيراعى اهله وبيراعينى ومحبوب بين الناس صحيح هو سنه صغير لكن نظرا لعمله فى اكتر من مجال اكتسب خبرة لا باس بها ......والحمد لله ربنا رزقنا بطفله نورت حياتنا بضحكتها ماشاء الله عليها

المهم.......ز
حمايا وحماتى بيحبونى جدا وبيعاملونى زى بنتهم الحمد لله وبيتكلموا عنى كويس قدامى ومن ورايا الحمد لله .........طيب فين المشكله
المشكله هى انى بحس انهم امى وابويا وزوجى ده ( اللى هو ابنهم) جوز بنتهم اللى عصروا على نفسهم لمونه وتقبله عريس لبنتهم
طول الوقت بيتكلموا عنه بطريقة وحشه وانه بيتصرف غلط وبيتكلم غلط وبيفكر غلط ومتسرع ,,,,..........ووووووووووو حاجات كتير .
طيب هما ليه بيسمعونى كل شويه الكلاام ده ....لدرجه انى ساعات بحسهم بيكرهونى فيه
حتى ساعات يقولولى ماتسمعيش كلامه ده كلامه غلط اعملى اللى انتى شايفاه صح انتى بتفكرى احسن منه ..........رغم ان هو والله مش كده خالص وبدليل انه فى سن صغير قدر يشتغل ويتقدم فى شغله ويفتح بيت ويتحمل مسؤليه اسرة وكمان يعمل مشروع خاص لنفسه .......ماشاء الله لا قوة الا بالله
وبشهاده الجميع انه ماشاء الله عليه شاطر وبيكافح وبيفكر لتطوير نفسه

انا بقى عشان بحبه اوى بتوجعنى اى كلمه وحشه عليه ......زوطبعا مابردش عليهم عشان عيب وماينفعش خالص .........وبرضو مش بحكيله عشان مايزعلش منهم رغم انه هو متعود على كده وبيقولى طول عمرهم اى حاجة بعملها مش بتعجبهم ومقتنعين ان اى حاجة غلط تحصل اكيد هو السبب فيها

المهم انى بزعل اوى وبفضل مخنوقه او افضل اعيط من زعلى على كلامهم ده
ومش عارفه اعمل ايه وخايفه اوى اوى فى مره يكونوا بيتكلموا كده وغصب عنى انفعل وارد عليهم

حد يقولى اى حاجه فى الموضوع ده

☤кя☤
12th December 2010, 01:09 AM
سبحان الله العظيم


من كلامك انا شايف ان الموضوع كله مبنى على انعدام الثقة بين الابن و وابويه... اللى هو زوجك و حماكى و حماتك

انا مش هافتى ولا هاقول المفروض و ما المفروضش علشان انا ماحصليش لسة شرف انى اكون زوج لكنى هاقول اللى اعتقد انه موجود بالفعل

ساعات حتة ان الابن مهما كبر مش هايكبر على امه وابوه بتكون مسيطرة بشكل زايد عن اللزوم على الام والاب... وتلاقى دا بينعكس على حياته هو مش حياتهم, اى قرار يتخذه يعيدوا النظر فيه من ناحيتهم هم, ولو ماكانش عاجبهم يبقى غلط.... هو مش غلط (بس بالنسبالهم غلط لانه مش على هواهم)... وتلاقيهم بدافع حبهم المفرط لابنهم بيحاولوا يمنعوه عن اللى بيعمله سواء بالجبر او بتكريهه ف اللى بيعمله...

بأمانة انا على يقين ان مافيش اب و ام بيكرهو ابنهم, (ممكن العكس)

على ما اظن حماكى و حماتك بيحبو ابنهم حب مفرط... حب الدُبة اللى قتلت صاحبها ( لما حاولت تحميه ف ركبت فوقه و خنقته)... هم كمان نفس الحكاية, لسة شايفين ابنهم على انه صغير, و عز عليهم انه بدأ يتخذ قرارات دون الرجوع ليهم.... معنى كدا ان القرارات لم يصدق عليها, تبقى مرفوضة و غلط (زى نظام منظمة حكومية, مافيش موظف (الابن) يتخذ قرار بدون الرجوع للسلطة العليا (الاب والام) والا فالقرار دا هايتم رفضه, بل و محاربته....)

للاسف الواقع غير كدا خالص... هم مش شايفين ان الابن ما شاء الله ربنا كارمه و مثبته عالصح, بدليل اختياره ليكى كزوجة... لو هو اخياراته غلط زى ما بيقولو يبقى من ضمن الاختيارات حضرتك

زى ماحضرتك ذكرتى انهم بيحبوكى جدا جدا و بيعتبروكى انك بنتهم مش هو... معنى كدا ان مافيش اعتراض عليكى كزوجة... معنى كدا انك الزوجة الصح لابنهم, طب هو ميين اللى اختارها... ؟؟؟ هو طبعا


خلاصة الكلام ان (من وجهة نظرى المتواضعة) الموضوع زى ما قولت فى الاول مشكلة ثقة + عدم علم بتطور الحياة وسُنتها (من ناحية الام و الاب) ان الانسان مسيره لازم هايكبر و يستقل بفكره دون الرجوع للام والاب ( و دا طبعا لا يقلل من مكانتهم اطلاقا, لكن فى الحقيقة بيأثر عليهم هم...)

حاولى بقدر الامكان تظهريلهم ان زوجك فِكره صح, او عالاقل مش غلط بالصورة اللى هم شايفينها.... حاولى توضحيلهم دا بشكل غير مباشر, بمعنى خليهم هم اللى يوصولو لنقطة ان ابنهم ممكن يكون صح, بدل ما تقوليها مباشرة كدا

و ادعيلهم و ادعى لزوجك بالهداية و تقوى ربنا اللى هى اساس كل شىء


اعذرينى لو كنت رغيت كتير, يا رب اكون افدت

خيال هاني
12th December 2010, 04:33 AM
كلمتين لوجه الله تعالى

يجب و لابد ان تصارحي زوجك بكل شيئ مع عدم التفرقه بينه و بين والديه

يعني بالبلدي بينك و بينه بس و خلي المعامله بينكم و بين الوالدين زي ما هي

فقط علشان ميحصلش اي خلافات بينك في المستقبل

A7la Banota
12th December 2010, 10:02 PM
انا شايفه ان حضرتك مش لازم تقولي اللي اهله بيقولوا عليه ابدا لزوجك


لان الموضوع ممكن يتفسر بشكل تاني وممكن يكون مدخل للشيطان ويخلي يجي في بال زوجك انك عايزه تفرقي بينه وبين اهله


مش تسمعي لكلام اهله..وديما حاولي تظهري قصادهم ان اد ايه قرراته حكيمه وان في الموقف الفلاني اتصرف بالشكل الفلاني وانك ديما فخوره بيه


ديما ارفعي من شأنه قصاد اهله وقصاد الكل واوعي كلام اهله يوصل لزوجك


صدقيني اي كلمه وحشه تتقال على زوجك وانتي نقلتيهاله هيكون بالنسبه ليه حجمها اكبر


انا رايي..انك مش تقولي لزوجك اي حاجه ولو كان في اي خلاف بينه وبين اهله حاولي تدوبيه وديما ارفعي من شأن زوجك قصاد اهله
واي كلمه وحشه تسمعيها على زوجك خرجيها من الناحيه التانيه علطول واوعي تخلي الكلام ده يأثر في علاقتك بزوجك او بحبك ليه
وديما حاولي تقللي من قعادك مع اهله..وخصوصا انك ام لطفله فتحججي بيها



وربنا يسعدك مع زوجك ويبعد عنك شر الشيطان ومداخله