المساعد الشخصي الرقمي

مشاهدة النسخة كاملة : مش عارفه اكتب العنوان ايه؟



shoshoo
5th February 2012, 05:42 PM
اولا احب اقول لكم وحشتونى يا أحلى اصحاب فى الدنيا
ثانيا زى ما أنتم شايفين العنوان انا فعلا مش لاقيه عنوان معين اكتبه
انا عارفه انى مش بكتب مواضيع كتير بس لما بكون تعبانه اوى بجرى عليكم لانى بعتبركم اصحابى بجد
معلش اعذرونى كلامى ملخبط ومش مترتب لانى مش عارفه اتكلم اصلا
احب اوصف لكم حالتى مخنوقه بس مش عاوزه اعيط لكن للاسف الدموع نازله من عينى غصب عنى
اااااااااااااااه نسيت اقولكم باركولى انا اتجوزت معلش معرفتش اقول لكم لان كل حاجه تمت بسرعه
اتجوزت 1_ 9 _2011 وحامل دلوقتى
يوووووووووووه شوفتم الكلام معاكم بيخدنى ازاى نسيت اقول لكم متفرحوش اوى كده اصل انا اطلقت
ههههههههههههههههههههههههه
شوفتم ازاى
اه والله اطلقت وياريت محدش يسألنى ليه لانى مش عارفه
مش عارفه انا اطلقت ليه لحد دلوقتى
انا هحكى لكم الحكايه وانتم يمكن تعرفوا
انا اتقدم لى شخص محترم جدااااااااااااااااااااااا فى اجازه الصيف اللى فات ده
كان اول شهر سبعه كده وارتحنا لبعض واتخطبنا وكنت فرحانه اوى
لا مش بس فرحانه انا كنت طايره من الفرحه
مهندس محترم سن مناسب جدا من عيله بينا معرفه سابقه باهله بيشتغل فى الكويت
عاوز يتجوز بسرعه لان حاجته كلها جاهزه فرحت قلت كويس هعمل فرحى 11 _11 _2011
زى ما اتمنيت قالى لا ياروحى انا اجازتى صغيره خلينا نعمل فرحنا فى العيد تانى يوم العيد او تالت يوم اقولك نخليه 1_ 9 يوم عيد ميلادك ويبقى احلى يوم فى عمرنا
وفعلا وافقت وحصل وقعد معايا ثلاث شهور وسافر كان منهم شهر بره الاجازه واخده بالعافيه وعمل مشكله جامده فى شغله علشان يفضل معايا اكبر وقت ممكن
وكان نفسه ياخدنى معاه بس مش نفع علشان الحمل كنت لسه فى اول شهرين
معلش طولت عليكم استحملونى
المهم سافر وكان كل يوم يكلمنى وانا بقى مش عاوزه اقولكم فى منتهى السعاده فى حلم جميل
نفسى اغمض عينى وافتحها الاقينى ولدت علشان اخد ابنى ولا بنتى ونطير على بابانا
وفجأه وبدون اى مقدمات لاقيته قطع اتصاله فجأه ولا اعرف عنه حاجه ولا اهله يعرفوا حاجه وبعد 15 يوم
ظهر طبعا مش عاوزه اقول لكم ال 15 يوم دول عدوا عليا كانهم 50 سنه
المهم عارفين كلمنى قالى ايه معلش كل شئ قسمه ونصيب وكل حقوقك هتوصلك لحد عندك
بس هو ده كل اللى قاله وانا اتخرست مقدرتش ارد فقالى مع السلامه وقفل السكه
مامته لما عرفت تعبت ودخلت المستشفى فيها وانا مش قادره اوصف لكم حالتى
كنت فكراه بيهزر والله
بس للاسف ورقه طلاقى وصلتنى من اسبوع
مطلعش هزار طلع جد
اطلقت
انا اطلقت
المشكله ان من ساعه المكالمه دى مكلمتهوش ومش عارفه اوصله
ولا كلم اى حد من اهله ولا اى حد يعرف حاجه ولا نعرف عمل كده ليه؟
قولوا لى انتم بالله عليكم انا اطلقت ليه؟
ليه؟
طيب لما يجى ابنى ولا بنتى للدنيا اقول لهم ايه ؟
اتخطبت واتجوزت واطلقت فى سبع شهور
حد يرد عليا اقولهم ايه؟
انا اطلقت ليه؟

البشمهندس صيحو
5th February 2012, 08:19 PM
ازيك يا شوشو

انا قبل ما اقول حاجه

هقولك الحديث دا

صلَّى الله عليه وسلَّم -: ((ما يُصِيب المسلم من نصبٍ ولا وصب، ولا هم ولا حزن ولا أذى، حتى الشوكة يُشاكُها - إلا كان له بها أجرٌ))؛ متفق عليه من حديث أبي سعيدٍ وأبي هريرة.

الموضوع مقسوم لجزئين

الجزء الاول علشان تعرفي تعيشي حياتك

بصي.. انت ما لكيش غير ربنا.. هو الوحيد الي بإيده يحل كل مشكلاتك

اعرفي كويس اول ان اي حاجه بتحصل في حياتنا هي خير لينا

تأكدي ان ربنا شايلك الاحسن

واقعدي قولي الحمد لله..

الكلام دا علشان تعرفي تعيشي بقيه حياتك

الي لازم تعيشيها

----

انا ما اعرفش الشخص دا و ما اقدرش احكم عليه

بس علي كلامك هو شخص محترم جدا

بس الي حصل دا مش من الاصول.. وانت ليكي حق عليه

انا شايف ان الموضوع اكبر منك انك تعملي حاجه بنفسك...

المفروض الموضوع يبقي بين الاهل و الاهل

بابكي ومماتك يتكلموا مع اهله.. ومش يتكلموا يسألو

لا الكلام يبقي فيه شده.. لان الي حصل دا كبير جدا

والاهل مسئولين يجيبوا ابنهم.. او عالاقل يردوا رد محترم يعرفوا سبب الي ابنهم عمله دا ايه

اتمني كلامي يكون فرق معاكي ولو حاجه بسيطه

ربنا يعينك و يصبرك.. ولو تقدري تروحي تعملي عمره.. هتريحك اووي وتخليكي تشوفي الدنيا احلي

بنت العمده
6th February 2012, 05:45 AM
what/
والله مانا عارفه اقولك ايه انا مذهوله زيك مابالك انتى صاحبه المشكله ربنا يصبرك يارب
وزى ماقالك صيحو لازم تعرفو السبب من اهله وهو اكيد هيكلمهم او هما يحاولو يوصلو ليه بأى طريقه
وبعدين انتى بتقولى انك حامل يعنى ليكى ولابنك حق عليه
ماينفعش ده مش لعب عيال دى جوازه
انا مش عارفه ازاى محترم وكويس زى ما قولتى وعمل كده ده حتى مااحترمش اهله كمان
اكيد فيه سبب قوى والله اعلم
ولاحول ولاقوه الا بالله
تأكدى ان ربنا مش هيسيبلك حقك ولو بعد حين
وعيشى حياتك ياحبيبتى علشانك انتى وابنك وان شاء الله ربنا هيعوضك خير
خلى عندك ثقه بالله

رويدا
6th February 2012, 04:17 PM
لا اله الا الله
ربنا يصبر قلبك يا قمر
وصيحو قال ووفى فى الكلام
لازم اهلك واهلو يشوفو ليه حصل كده
واتجهى لربنا مفيش غيره
وربنا يصلح الحال

عزالدين
7th February 2012, 12:59 AM
ربنا يصبر قلبك و يرزقك أحسن منه

ادعي ربنا و قولي :

إنا لله و إنا إليه راجعون .. اللهم أجرني في مصيبتي و اخلف لي خيرا منها

و سيبي اهلك يتصرفو و يحلو المشكلة مع اهله

صافى حسام
7th February 2012, 02:35 AM
مش عارفة يا شوشولو قلت حسبى الله و نعمة الوكيل فيه هتزعلى و لا ايه

ازاى ضميره يسمحله انه يطلق زوجته و هى حامل بعد بعد اربع شهور زواج و بدون اى سبب

انا حاسة انه على علاقة بواحدة هناك ممكن كان يعرفها مثلا قبل كده

و لما رجع اجازة هنا اهله اصرم مثلا انه يتجوز هنا
و بعد ما رجع اكيد لاقى نفسه لسة بيحبها فعشان كده عمل اللى عمله

طبعا الله اعلم بس ده احساسى و التفسير الوحيد لان واحد يطلق مراته بالسرعة دى و من غير سبب

لكن اكيد ربنا م هيسيبوا لان بنات الناس مش لعبة

متزعليش يا حبيبتى ان شاء الله ربنا هيبعتلك اللى احسن منه

و هو اكيد هيندم عليكى بعد كده و حسبى الله و نعمة الوكيل

خيال هاني
8th February 2012, 08:27 AM
أسأل الله جل وعلا أن يخفف عنك ويفرّج كربك ويزيل همّك

اولا لازم تكوني مستريحه لأنك قمتي بواجباتك الزوجيه امام الله

ثانيا واضح فعلا ان السبب غامض

- اهلك لازم يعرفوا سبب الطلاق بأي طريقة من أهله

و انا هسأل شيخ في الموضوع ده الاول و هرد عليكي في اقرب وقت

نصيحه مني تخلي بالك من ابنك او بنتك و سيبيها على الله

shoshoo
22nd February 2012, 09:59 PM
اولا احب اقول لكم اعذرونى للتأخير غصب عنى
وثانيا ربنا مايحرمنى منكم ابدا بجد كلامكم خفف عنى جدا
مش عارفه ياصافى بجد انا ممكن ازعل ولا لاء لانى بجد مش عارفه انا بقيت حاسه بايه
ولو هو على علاقه بحد طيب يقولى على الاقل اعرف انا اطلقت ليه؟
وبالنسبه لاهله كتر الف خيرهم مش مقصرين بجد
باباه قالى الشقه بتاعتك ومامته يوميا ياتكلمنى ياتزورنى
وكمان هم مش عارفين عنه حاجه لانه مش بيتصل بس باباه قال انه هيسافر له قريب
مش عارفه ده كلام ولا فعلا هيعمل كده
وبابا قال لو هو مش سافر له انا هسافر له بنفسى
بس بجد هم ناس كويسين معايا جدا ومش لهم اى ذنب فى الموضوع ده
نسيت اقول لكم انا عندى تؤام السونار بيقول كده
ادعولى ربنا يكملى على خير لانى تعبانه جدا
واسفه مره تانيه لقله دخولى بس بجد غصب عنى

بنت العمده
25th February 2012, 03:04 AM
ماشاء الله ربنا يكملك على خير يارب ويسعدك بيهم وييسرلك الحمل والولاده
وزى ما قولتلك ربنا هيعوضك خير كده بدل الخير بقو خيرين المهم تاخدى بالك من صحتك الفتره دى ومش تفكرى فى حاجه وخليها على ربنا
ونسيت اقولك مبروك عالحمل وربنا يجعلهم ليكى قرة عين فى الدنيا والاخره