لخبطة لخبطتني اخر لخبطة وموضوع اخر لخبطة

--------------------------------------------------------------------------------

الموضوع ده اصلا ملخبطنى اخر لخبطه والله

انا قرأته فى منتدى تانى وتقولوا هو جه عالجرح

وياريت تقرؤه للأخر وتردو على السؤال اللى ملخبطنى

كل يوم وانا رايح الشغل الاقي طابور العيش يسد الشارع وكل اللي واقفين بيسبوا ويلعنوا في مصر

ولو سألت اي واحد منهم ح يقول لك انا باكره مصر ونفسي اغادر منها انهاردة قبل بكرة

كل يوم الاقي طوابير منتهي المهانة والذل للناس اللي عايزة تعمل بطاقات تموين وكله بيسب ويلعن في مصر وبيقولوا امتي

ربنا يتوب علينا من البلد دي

رحت حديقة الحيوان لقيت كل اللي داخل بيسب ويلعن في مصر وبيقولوا البلد بتسرقنا ياجدعان ازاي ؟

تخيل يافندي انا داخل انا وولادي حديقة الحيوان وقطعت اربع تذاكر وكنت شايل كاميرا في ايدي لقيت الموظفة بتقولي تذكرة علي الكاميرا لو سمحت بعشرين قرش

ولما دخلنا الحديقة الاولاد عايزين

يركبوا السيسي تخيل يافندي تذكرة بجنيه لكل ولد علشان يقعد علي ضهر السيسي سبع ثواني والتذكرة رسمية ومن موظفة التذاكر

يبقي دي بلد دي؟

البلد مش عارفة تمص دمنا ازاي

كل واحد فينا يروح يشتري حاجة يسب ويلعن في البلد من الغلاء اللي بقي مش ممكن وغير محتمل

الناس كلها بتكره مصر


لكن امبارح كنت واقف في البلكونة الساعة ستة ولقيت الشوارع فاضية والمرور مش هو بتاع كل يوم

ايه الحكاية ؟

آآآآآآآآآآآه انهاردة الماتش النهائي بين مصر والكاميرون دخلت وفتحت التليفزيون ماهو انا بحب الكورة وكنت ناوي اشوف الماتش طبيعي

لقيت نفسي قاعد ادعي ربنا ان مصر تغلب

انا ومراتي واولادي قاعدين في منتهي التوتر لغاية ماابو تريكة جاب الجول

كلنا فطينا من مكاننا فط

والله اكبر

ومصر مصر مصر

واستمر الدعاء ان ربنا يكمل فرحتنا ونغلب وناخد الكاس


بعد الماتش

كل اللي كانو في طابور العيش

وفي طابور التموين

وفي حديقة الحيوان

واللي بيشتكي من الغلا

وكل اللي بيسب مصر ويلعنها

كل دول لقيتهم في الشارع وبيقولوا

مصر مصر مصر

داهنين وشوشهم بعلم مصر

شايلين اعلام مصر


ايه اللخبطة دي ؟

بالذمة مش حاجة تلخبط

الناس دي بتكره مصر ولا بتحبها ؟

وهو اللي بيحب حد يقعد يسب ويلعن فيه؟

بجد انا متلخيط

ايه التناقضات دي ؟


انا اتحدي اي مصري يقول انه بيكره مصر

حد فيكم بيكره مصر ؟