بسم الله الرحمن الرحيم

دا خبر قريته فى جورنان النهاردة 16/02/08 ( بدون ذكر اسماء او افعال )

( ألزمت لجنة التعليم بمجلس الشعب في مشروع قانون وزارات التعليم العالي والتربية والتعليم والاعلام بتنفيذ قرارات مجمع اللغة العربية بالحفاظ علي اللغة العربية.. كما الزمتها بأحلال اللغة العربية محل المسميات الأجنبية التي شاعت مؤخرا في المجتمع وضبط نطقها الصحيح، وتوحيد ما فيها من مصطلحات.. وارجعت اللجنة تقدمها بمشروع القانون والذي ستناقشه في اجتماعاتها الاسبوع القادم إلي ان اللغة 'العامية' اصبحت هي السائدة. )

و الله حلو اوى ...
اخيرا بدأ مجلس الشعب المبجل بتاعنا ياخد باله ان اللغة بتتسحب من تحت رجلينا ...

- بتعمل ايه يا بوجى : بشيت مع واحد صاحبى
- مين دا يا جماعة : دا السوبر ستار عمرو دياب
- برنامج ايه دا بؤلظ : دا ستار اكادمى
- رايح فين يا بؤلا : رايح الالسايبر

و الخ الخ الخ


و ما خفى كان اعظم ......

يا جماعة لازم ناخد بالنا من لساننا شوية ..... و نحاول نساعد مجلس الشعب شوية الناس تعبانة من اللف و الدوران على مشاكل تحلها ما لقتش غير اللغة اللى هاتضيع .....

--ماخدوش بالهم من النص مليون شخص اللى بيموت بتسمم المياه كل سنة (خبر فى نفس الجريدة )
-- ما خدوش بالهم بازمة التعليم اللى فى النازل سنة و را التانية
-- مش عاوزين ياخدوا بالهم من الفلوس اللى بتلبس طاقية الاخفة من هنا و الديون اللى بتزيد من الناحية التانية
-- مش قادرين يدبروا اى حاجة لللشباب الغلبان اللى مش لاقى شغلانة ياكل بها عيش ما وراهمش الا انهم يتسكعوا على القهاوى و خلاص

ما خدوش بالهم بس غير من اللغة اللى دخل عليها كام كلمة اجنبية و العامية اللى مالية الشارع

..... نهاية الكلام ....

الجماعة بتوع مجلس الشعب دول متأسمين حبة تأسيمات .... التأسيمة اللى تعجبهم يشغلوها زى لجنة التعليم دى ... اما الباقى بقى فاما انهم قاعدين على ودانهم او انهم مكبوت على نفس اللى خلفوهم

و تحيا مصر و تسقط الحرية و يعيش سيادة الملك الرئيس حسنى بن محمد آل مبارك