بصوا بقى بصراحه كده انا حبيت كل اللى فى المنتدى وبقيت حاسه انكوا زى اخواتى الكبار مع انى معنديش اخوات كبار لان للاسف انا الكبيره فبصراحه انا مخنوقه وحسيت ان جوايا كلام كتييييييييييييييييييييييي ييييييييييييييييييييييييي ييييييييييييير ومش عارفه افضفض فين ولا مع مين فملقتش غيركوا اشكلكوا همى وسمع نصايحكوا يمكن تقدروا تساعدونى فى مشكلتى وترحموا قلبى اللى بيتعذب كل يوم انا حكيتى ابتديت فى يوم من فتره طويله ومش طويله بصراحه مش فاكره بالظبط بس اللى فاكره انى كنت بعانى من مشكله نفسيه وكان فيها جزء عاطفى ( اصل اختكوا بقى عاطفيه وحساسه ودمعتها متنيله قريبه وبيصعب عليها الغريب قبل القريب ) المهم الحمد لله الازمه عديت على خير لان اصحابى وقفوا جانبى وساعدونى انى اواجهه واقدر اخرج من قصر الاحزان اللى كنت حابسه نفسى فيه بس كانت المشكله انى خرجت وانا كان متهيألى انى بحب واحد زميلى فى الجامعه وبصراحه العامل ده كان العامل الاكبر فى خروجى من ازمتى ( اصل صاحبتكوا برضه خايبه وبتحب على نفسها ) المهم الوهم خد وقته وانتهى بس للأسف انتهى بحدوث انتكاسه للازمه الاولى ورجعت ازفت من الاول مع الفرق ان فى المره الاولى كان حوليا اصحابى لكن فى المره التانيه كنت بقيت لوحدى تماما بعد ما بعدت عن كل اصحابى اللى كانوا بيحبونى وبيساندونى وللاسف انى لجئت فى الفتره دى للمنومات والمهدئات اللى كنت بعتبرها اصدقائى اللى بعتمد عليهم وبقيت مش قادره اعمل اى حاجه فى الدنيا وده قصر على دراستى وشغلى وكنت زى ما بيقولوا ماشيه فى طريق الضياع وانتوا عارفين الشياطين اللى بيحرسوا طريق الضياع شكلهم ازاى المهم فى مره وبالصدفه اتعرفت عليه كنت قاعده مع مجموعه من الشياطين اللى بقولكم عليهم وجه اول ما عينى جت فى عنيه لقيت حاجه بتشدنى ليهوفضلت طول القعده عنيا فى عينيهواكتشفت ان هو كمان كان بيبصلىوفى النهايه لقيت نفسى بقوم معاه وقعدنا نتكلم فى مكان تانى خالص لقيت لسانى بينطق بكل حاجه جوايا لقيت قلبى بيحكى كل جرح هو اتجرحه بيحكى عن كل انسان ظلمه ( مع العلم انى كتومه جدا ومليش اصحاب ومش بعرف اعبر بالكلام ) لا واللى كان غريب ان هو كمان اتكلم وفتحلى قلبه ومن يومها اتكررت مقابلتنا بحكم ان احنا الاتنين بندرس فى جامعه واحده مع اختلاف الكليات بس كنا بنحاول نسرق اى وقت نقضيه مع بعض وسط دوشه الدراسه والشغل (اصل صاحبتكوا بقى جامده قوى بشتغل وبدرس ) المهم الامتحانات جت وخلصت وفى اخر يوم فأجأنى انه مسافر لا وهيغيب عشر ايام تصوروا لقيت الدنيا بتلف بيا ورجليا مكنتش حاسه بيها المهم تماسكت قدامه وبعد شويه اختليت بنفسى ولقيت دموعى بتسبقنى ونازله على خدودى وقتها اتاكدت ان جويا ليه مشاعر اكتر من الصداقه المهم قررت انى اتماسك قدامه وقلت لنفسى اهو سافره فرصه انا احدد فيها مشاعرى بالظبط عشان مظلمش نفسى تانى بوهو تانى المهم فى اخر اليوم لقيته بيصارحنى ان هو كمان جواه ليا مشاعر وانه قرر ان يسافر عشان يدى لنفسه فرصه يفهم مشاعره ويحددها تصوروا اللى جوايا كان جواه هو كمان المهم سافر وغاب عارفين رجع بعد قد ايه ثلاثه ايام اه والله 3 ايام بس رجع يقولى مقدرتش ومن يومها واحنا مع بعض بس انا قررت انى لازم ابقى معاه صريحه قلتله انى وصلت لمرحله الادمان على المهدئات والمنومات وقف جانبى وساندنى لغايه ماقدرت اتخلص منهم نهائيا طبعا كلكم هتسئلوا طب فين اهلى فى كل ده اهلى بقى ماشيين بمبدأ كل واحد فى حاله ارحم محدش فينا بيحس بالتانى ولا يعرف عنه حاجه كل واحد فينا بيحكى للتانى اللى هو عايزه يعرفه بس المهم انا مكنش هاممنى حد غيره هو بس والحمد لله فى خلال شهر واحد كنت مبطله كل انواع الادويه المهم ورجعت الشغل ووبقيت فى الشغل احسن من الاول ووصلت لمستوى كويس وخصوصا ان انا بشتغل فى مجال نا بحبه وفى الوقت ده حصلت مشكله بينى وبين اهلى للأسف ماما كبرتها قوى وحكت عليا انى مش هكمل تعليمى وكمان مفيش شغل تانى وقالتلى انى ماشيه فى طريق اخرته الانحراف

شفته يعنى بعد كل اللى كنت فيه وخرجت منه لوحد انا ماشيه فى طريق انحراف وقتها اتصدمت بجد واتجرحت منها قوى واهو عدى اسبوعين من ساعه اللى حصل وانا زى ما انا محبوسه فى البيت بس بصراحه هو مش سايبنى خالص بيكلمنى على تليفون اخويا كل يوم ( اصل نسيت اقولكوا انها اخدت الموبيلات بتاعتى اصل صاحبتكوا غنيه ومعاها اتنين ) وكمان بيشيت معايا كل يوم

بس بصراحه انا اعصابى بتنها يوم بعد يوم وتعبانه خالص من الضغط اللى هيا عاملاه عليا وبصراحه خايفه يجى اليوم اللى مقدرش استحمل فيه ارجوكوا ساعدونى قلولى اعمل ايه اتعامل معاهم ازاى اعمل ايه عشان اخلص بجد تعبانه قوى ومحتاجلكم تدونى رايكوا




استحلفك يا من تقرأ هذه الكلمات ان تترك ليا ردا ولو حتى كلمه واحده تساعدنى بها ساعد قلب محب ينهار ويموت