الى كل نجعاوى فاشل:
طبعا انت داخل المنتدى عارف هدفك كويس انك تعمل عدد رهيب م المشاركات
وميمنعش انك تبقى غفير ف اقرب فرصة ممكنة وماله هو انت شوية :lalalaaa3:
هقولك على شوية نصايح جبارة ومش هتتعب نفسك خالص

1_ اول ما تسجل نفسك قوم داخل على الكوفى شورب بتاعتنا واعمل فرح هناك
مفيش مانع انك تعمل كذا موضوع للترحيب بيك يكون احسن برضه
ولما تلاقى الناس داخلة ترحب بيك اعمل لكل واحد فيهم رد .. اه لازم تشكرهم كويس
كدا على ما تطلع م الكوفى شورب يكون معاك بعون الله قيمة 100 مشاركة

2_ دلوقتى بقى لازم تعمل مواضيع اه انت نجعاوى موهوب دلوقت /scenic
طبعا المواضيع مش هتبقى من تاليفك .... انت تروح على اى منتدى تانى وتنقى كام موضوع
حلوين كدا ( من عنوانهم طبعا ، هو انت لسه هتقرا ) وتقوم واخدهم copy على واحد paste
وتيجى عندنا هنا وف اى قسم وتقوم رازعهم وميضرش انك تحط الموضوع مرتين
ف اقسام مختلفة وتعالى ع نفسك وغير العنوان زيادة الخير خيرين
هتقولى الغفير هيحذفهم مش مشكلة هو انت لما هتعملها كتير والغفير يفضل
يلم وراك اكيد هيجيله يوم ويتعب ويزهق ويقوم سايبهم
ومش بعيد يتخنق ويسيب المنتدى بسببك يبقى حلو اوى
كدا كل يوم تعملك عشرة ولا عشرين موضوع كويسين اوى

3_ نيجى بقى للردود .... تدخل القسم من دول وتقوم داخل كل موضوع هناك
ومن غير ما تقرا طبعا احسن فى ناس ساعات بيبقو عاملين مواضيع
طويلة كدا وفيها كلام كتير اوووووووووووف لسه هتعرف الموضوع بيتكلم عن ايه
لالا انت علطول ادخل الردود وقم قايل مشكور وشكرا ومتشكرين وحصلنا الشكر .....الخ
وطبعا معاهم شوية ايموشنات وياريت تكتبها كتير وف شكل هندسى كدا
زى الدواير مثلا والحاجات دى .. علشان تعجب الاولاد الصغيرين

4_ طبعا انت خليك ف قسم الترفيه والنكت واللب والتسالى واياااااااااااااااااك ايااااااااااااك
من قسم القضايا والحوارات احسن هناك فى ناس رخمة كدا
وقال ايه عاملين هناك مناقشات ولت وعجن وحاجة توجع الدماغ
انت سيبك منهم طبعا واوعى تروح احسن هناك فى ناس بتفكر وممكن يحرجوك

5_ ها خلاص كدا تقريبا خلصنا ف اليوم تعملك حوالى خمسين مشاركة
شوية مواضيع على شوال ردود مالهاش لزمة
شهر ولا اتنين تلاقى معاك قيمة 5000 مشاركة والنجوم تحتك بتلالى
واحتمال شوية كدا تبقى غفير وانت وشطارتك بقى

انا كدا مطمنة عليك يابنى سير على بركة الله يلا ربنا يزيدك غيبوية



اه نسيت اقولك قسم خلى الدماغ صاحى دا مش ليك
اطلع منه يلااااااااااااا من غير مطرود