الفروق الفرديه بين البنى ادمين هى اللى بتخلينا مختلفين تخيل لو اننا كلنا زى بعض و مفيش بينا فرق تلاقى الحياه فجأه بقت ممله اكتر مما تتصور واكتر من انها ممله اصلا. تخيل معايا كده كده لو كل الناس اصطمبه واحده كلهم حلوين ولذيذين وطيبين وحبوبين او كلهم وحشين وشريرين وبياكلوا فى بعض .
بيقلك لولا اختلاف الاذواق لبارت البضاعه ولولا اختلاف اطباعنا مكنتش اختلفت اذواقنا ادى فائده اقتصاديه بحته للفروق الفرديه . و لو بصينا للموضوع من الناحيه السياسيه مكنش حيبقى فيه حاكم ومحكوم لان كلنا واحد حاكم يحكم مين بقى وليه مش مشكله يعنى مساله الحاكم دى و ده بردوا حاجه مش صح لان لازم يكون فى حد متميز يكون قائد يقود القطيع وادى الفائده السياسيه من الفروق الفرديه .
اللى انا عايزه اقوله هنا ان مفيش حد يشبه حد ومنحاولش ندور على حد زى حد عشان ده كويس من وجهه نظرنا نحاول نخلى كل الناس اللى نعرفهم زيه . المفروض كده ننوع البشر اللى نعرفهم على الاقل عشان تبقى معرفتهم بقيمه مش يبقوا عدوا علينا مرور الكرام لازم كل واحد نعرفه يسيب فينا بصمه مختلفه لان البصمه دى هى اللى بتكون شخصيتنا هى اللى بتعلمنا وبتعملنا وتخلينا نعرف ازاى نكافح فى الحياه . و لازم تعرف ان مفيش حاجه فى الدنيا مطلقه . كل شئ نسبى اللى بشوفه صح ممكن انت تشوفه غلط وده وارد جدا فمفيش حد كويس وحد وحش لكن الفكره انت وتربيتك وشخصيتك وشايف البنى ادم ده ازاى .
الاهم من ده بقى انك لو اضطررت فى الحياه وده كتير انك تتعامل مع حد مش كويس اوى يعنى انك متقفلش دماغك وخلاص اعتبره احد البصمات اللى قلتلك عليها خد منه ومن تجربتك معاه اللى يثرى تجربتك الشخصيه وخلى فى بالك انه حتى لو مش كويس اوى اهو وراك نوعيه من الناس عايشه معانا يعنى افادك و وراك ان فى ناس كويسه تانيه يعنى لولا الاسود مكناش عرفنا الابيض لولا الوحش مكناش قدرنا الحلو .
فى الاخر انا عايزه اقول انك كل ما فتحت مداركك حتكون اكثر المستفيدين من الفروق الفرديه و اتعلم حاجه مهمه جدا ان كل نفس بتتنفسه لازم يكون ساب فيك اثر لتجربه قادمه تتلاشى فيها اخطائك السابقه وتؤكد فيها على ثقتك بنفسك