وانا صغيره كنت بستنى فقره الاطفال بتاعه القناه الثانيه فاكرنها بتاعه الساعه واحده دى . دى كانت جميله بمقاييس زمان يعنى لان مكنش فى دش وفضائيات فكانت بالنسبه لى الحدث الاعلامى الاهم فى خلال اليوم وكانت بتعجبنى اغانى الاطفال اوى ولحد النهارده بحبها جدا .
صادفت كده من كام يوم اغانى الاطفال اللى احد القنوات الفضائيه بتذيعها . ولا حظت حاجه عجيبه اوى .زمان كان كبار المطربين بيغنوا للاطفال حاجات للاطفال وعن الاطفال وبدماغ الاطفال . لكن دلوقتى الاطفال بيغنوا حاجات عجيبه واصبحت صله الاغنيه بالاطفال بس ان الاطفال هما اللى بيغنوها و الادهى انك لو دققت حتلاقى انه الطفل العجيب الللى بيطنط ده ما شاء الله سابق سنه وحلو كده ولا يملك من براءه الاطفال شئ .
حاجه تانيه زمان الاغانى كان فيها معلومه يعنى انا حفظت الابجديه والالوان و حاجات كتير من الاغانى والا نيللى بقى وفراشتها وصفاء ابو السعود واوبريتات بتاعتها كانت حاجه مبهره كده .
دلوقتي بقت الاغانى حاجه تانيه صاعقه . حاجه كده تتفرج عليها بتسال نفسك هو فى ايه اللى حصل ؟ هى العيال دى يا حرام حصلتلها حادثه اثرت على مخها .يعنى لو سبت اخوك او اختك الصغيرين يتفرجوا ايه اللى حيحصل ، بعد كده تقلى الاطفال بدون براءه .لان فنهم اللى موجه ليهم بدون براءه حتى الكرتون بقى حاجات عجيبه كده كله بيتحول ويجرى وينط وتقلى الاطفال اشقياء ليه والدليل ان الطفل طفل ومستعد انه يشاهد ويتفرج ويتعلم الاقبال الغير عادى على عالم سمسم مثلا ده برنامج بعتبره هادف فى الابهار والفكره والمعلومه والغناء وكله وكله مش تقلى انا عايز يا بابا ازود المصروف والا ام كلاله ولدت يا سلام ز
اتمنى ان كل واحد عنده طفل اخوه والا قريبه يحاول ينزل الاغانى القديمه الجميله دى ويكسب فيه ثواب ويبعد عن عيال الموبايل والدش دول .