كنت بكلم واحد .. ف قالى الخبر دا بصراحة مصدقتش وقلبت الموضوع لهزار
ف كنت بقلب كدا فى المنتديات لقيت ابيات الشعر دى قلت اجيبهالكو لعل وعسى ممكن نعمل حاجة


إفرحي يا أُمّة دي حاجه جنان

ما خلاص بقينا نعتقل النسوان

بنت ف حلاوة حور الجنان

كل اللي عملته انها بس احتجت

على نظام خسيس نظام جبان

على أسعار كده في العلالي طقت

على حكم قراقوش وع الطغيان

وع الخيبة اللي علينا حطت

وع الكوسة واللوبيا والبتنجان

على شعب خايب ونايب وعايب

وقافل عيونه وسد الودان

وتحصل أمامه جميع المصايب

ولا كأنه شايف ولا العميان

يمصمص ف بقه ويقول عجايب

يا حسرة عليكم يا شعب جعان

ولا الكلام نافع ولا الفعل عاجب

تعبت وصرخ ف وشي الزمان

وقال لي امتى هانغضب بقى

ونطلب حقوقنا ويحتج اللسان

على غلبنا وجوعنا والشقى

على انتهاكهم شرفنا وعرضنا

على سرقتهم لخيرات أرضنا

بكيت عيوني وبلت القلم

وحاسس كأني بانادي ف عدم

وصرختي اصرخها ترجع لي تاني

وكأني قاعد بين أربع حيطان

أنا لا اخوان ولا افهم سياسة

أنا يادوب اعرف مين ف الرياسة

أنا مواطن عادي جداً وغلبان

ف غربة واخداني ليل ونهار

وبادفع صحتي لدار غير الدار

وبدال ما أدي خيري لبلدنا

باديها لغيرها وبادوق المرار

ولكن غيرها ليها علي فضل

ومحترمة حقي وتحكم بالعدل

وعارفه وفاهمة حقوق الانسان

افرحي يا أمة دي حاجه جنان

ما خلاص بقينا نعتقل النسوان