يا حنينة...

ييجى الربيع ويعدى وانتى مش هنا؟!!

أنا قلبى عاش يحلم فى حضنك كام سنة

وتقولى دا انت عندى أغلى من الضنا؟!!

ييجى الربيع ويعدى وانتى مش هنا؟!!

.................................................. .........

الصبح الاقى بين عنيكى ضحكة من السما

والضهر قوم صلى وسابق للثواب

والعصر اتغدى وما تيبش الكتاب

ما تخلى يوم أملى فيك يصبح سراب

المغرب المصحف فى ايدك ما تسيبوش

قلبك يا قلبى يرق ...ترقلك حتى الوحوش

دا احنا فى زمان يا عمرى من قسوته

خايفة يحوش دمعتك وفرحك ما يسيبوش

العشا لما تدن صحينى يا على

يارب تتهنى برؤية بالنور العلى

واتعشى ياقلبى.وحقك ما تسيبوش

واسهر وذاكر وريح كل حبة

دايما زايد يا ولا فى قلبى محبة

..........................................

كان يومى بيكى زى كراسة وقلم

نحلم ببكرة وانتى مش طايقة الألم

وتغنى ليا وانتى تدينى الدوا

وتقولى حب وعيش يا واد سنة بسنة

ويارب يبقوا مليون فى الهنا

ويجنبك ربى سهر الليالى والعنا

.............................................

ييجى الربيع ويعدى وانتى مش هنا؟!!.....ياحنينة

يا لوزة ياللى سكتك سالكة

ودعواتك مجابة

بينك وبين رب السما دايما عمار

فى بالى يا غالية مهما الزمن عدا ودار

.................................................. ..............
ييجى الربيع ويعدى وانتى مش هنا؟!!.....

يا مين يبيع الصبر؟!!

ومين يزيح القهر؟!!

يا مين يرجع الميا لو جريت فى نهر

طب حاجة تسند قلب من الحزن اتبلى

ييجى الربيع ويعدى وانتى مش هنا؟!!.........................

مليون سلام ليكى يا حبيبة قلبى


بالله عليكم تدعولها بصالح الدعاء