هاي

اولا لازم تعرفوا ان انا بكتبلكم الساعه اربعه وبع الفجر ونفسي انام فمش عايز حد ياحسبني على الغلطات الاملائيه لو كانت موجوده

شكرا للاهتمام

ثانيا الموضوع ده كالعاده موضوع تافه وهايف وملوش لازمه فاللي جه هنا باي غرض غير انه يضيع شويه وقت يا ريت يخرج دلوقتي

عايز انام وهموت وانام بس للاسف مينفعش

ليه مينفعش

لاني مقضي الليله في الشارع ومفيش مكان يلمني

ليه مقضي الليله في الشارع

روحت متاخر على معاد قفل بوابه السكن ولقيتها مقفوله واكيد الجن الازرق نفسه مش هيعرف يفتحها

تصدقوا اني اتاخرت 5 دقايق بس

على العموم مش مشكله انا غلطت ولازم اتحمل نتيجه غلطي للنهايه

من ستاشر ساعه بالظبط صحاني من النوم محافظ بورسعيد الجديد _اصله كان في زياره للجاليه البورسعيديه في القاهره_ ودلوقتي انا قاعد في سيبر بيحاسبني بجنيه ونص في الساعه

انا سامع حد بيسال وليه السيبر ده احقر مكان على وجه الارض

اكيد لما تكون في مكان ونفسك تنام والمكان ده ممنوع فيه النوم يبقى ده احقر مكان على وجه الارض

يووووووووووه انا هفضل في الهم ده لحد الساعه سبعه الصبح......ارحمني يا رب

بالمناسبه يا جماعه لو حد شاف دكتور زيفاجو يقوله ان انا بحسده

الباشا زمانه دلوقتي نايم ولا حاسس ان فيه واحد المفروض انه معاه في الاوضه

خيااااااااااااااااااااااا ااااااااانه

هقتلك يا زيفاجو ولو كانت دي آخر حاجه هعملها في حياتي

بالمناسبه يجماعه انا عايز اشتري شقه في القاهره في حدود اربعين الف جنيه بالكتير لو حد يعرف يدلني انا مستعد اشتريها بكره_ده كلام بجد_

الساعه دلوقتي اربعه ونص الا خمسه

ييييييييييييه هو الوفت بيمشي براحه كده ليه

تيجوا احكيلكم حكايه

لا بلاش

يصراحه مش وقته

طيب ماتيجو ارشحلكم شويه كتب تقراوها

كل كتاب هرشحه ليكم انا قريته بنفسي وبجد هتخسروا كتير لو مقريتوهوش

الاول اجمل الكتب في مجموعه جول فيرن

1-رحله الى مركز الارض:يا ترى فيه ايه تحت الارض اللي احنا ماشيين عليها؟ جول فيرن بيقول ان فيه ديناصورات وبحار وانهار. مش مصدق اقرا القصه بنفسك.

2-عشرون الف فرسخ تحت البحار:كابتن نيمو وغواصته اللي قبل اختراع الغواصات. الغواصه الرهيبه اللي مليانه كنوز جمعها كلها كابتن نيمو من السفن الغارقه بس يا خساره الغواصه انفجرت وفي ناس بتقول ان كابتن نيمو مات.

3-حول العالم في تمانين يوم:تراهنوني اني اقدر الف حاولين الكره الارضيه في تمانين يوم؟ في واحد قبلي عملها واخد معاه الخادم المخلص باسبارتو وكسب عشرين الف جنيه استرليني _يا بخته_

ملحوظه: باسبارتو فرنسي ومالوش اي اصول صينيه او اسيويه ويا ريت متصدقوش جاكي شان في كل حاجه يقولها.

4-الجزيرة الغامضة:خمسه هربوا من المعتقل في منطاد ونزلوا في جزيره غامضه ومالقوش فيها غير واحد بس تخيلوا مين....لقوا هناك كابتن نيمو وغواصته بس بعد ما واجهوا مواقف كتيره وخطيره

ملحوظه:لو قدرتوا تقراوا الروايه بترجمه الدكتور احمد خالد توفيق بجد بجد هتستمتعوا بيها اوي.


اظن كده كفايه جول فيرن ولو ان الواحد مبيشبعش ابدا من روايات الراجل ده

نيجي بقى على تاني واحد من الكتاب اللي انا عايزكم تقراو كتبهم

حبيب قليب ونور عيني

المغامر دائما والساخر ابدا الذي عاش ومات مع المذنب هال

الاديب العالمي الشفاف............مارك توين..................


1-حكايات مارك توين:كان هناك في يوم من الايام مدينه فاضله مر بها غريب فلم يعيروه التفاته ولم يعطوه كسره خبز. اقسم ان يحطم تلك المدينه وبكل الفخر نفذ قسمه. لقد عراهم امام انفسهم واثبت لهم انها قريه من اللصوص والكذابون.ماذا فعل لهم وكيف تصرفوا هم؟ إقرا القصه لتعرف.

2-وصيه الخمسون الف دولار:عم ففي بلده مجاوره كتب وصيته لابن اخيه الذي لم يسال عنه في يوم من الايام وكانت قيمه الوصيه خمسون الف دولار. بنى الرجل الرجل قصورا في الهواء سرعان ما انهارت على راسه. كيف حدث هذا ولماذا حدث؟ اقرا لتعرف.

3-مغامرات توم صوير: كلنا كنا اطفالا في يوم من الايام وكنا نصف شياطين ونصف ملائكه ولكن توم صوير كان يختلف عنا هو وصديقه هكلبري فين
اذا كنت مغامر فانت تحمل توم صوير صغير بداخلك فابحث عن نفسك بداخله.

4-مغامرات هكلبري فين:طالما تزمرنا جميعا من العنايه الفائقه التي احاطنا بها اهلنا. اقرا هذه القصه وستعرف ماذا يكون مصير الاطفال الذين لا يشربون اللبن في المساء. غالبا يصبحون اغنياء...........

كفانا من العزيز مارك توين اليوم ولكن قبل ان نتركه لينعم بنوم هادئ اود ان اذكر لكم حقيقه طريفه عنه

الاسم الحقيقي لمارك توين هو صامويل لانجهورن وقد شاب شعر راسه وهو طفل صغير بعد ان راى اخيه وهو يحترق امامه في السفينه التي كان يعمل بها.


الساعه الان الخامسه والربع ولو استمررت في الكتابه لخمس دقائق اخرى فربما اكتب لكم قصه حياتي وهي مليئه بفضائح لا اود ان اسردها عليكم لذلك فساقول لكم

تصبحون على خير