السلام عليكم ..
الموضوع دا جه ف بالى من فتره ... بس كنت متردده فى كتابة الموضوع ، ليه بقا .. علشان كنت خايقه لحسن أحد المشرفين يحذفلى الموضوع ، بحجة آل إيه .. غير هادف ,,, آل غير هادف آل ....
لكن السؤال الحقيقه كان ملح جداً ...
و هو .....





هل بتزعلى يا آنستى العزيزه لما حد يقوللك يا مودام .. ؟؟ [ مودام آه مودام عجبانى كده ] ..

بجد أنا شايفه إن فى ناس مكبره الموضوع شويتين و بالنسبه لهم قصة يا مودام كأنها كارثه و كأنهم إتهانو ..
مره واحده صاحبتى كانت بتحكيلى إنها كانت رايحه تحول من كليه لكليه تانيه ، و كانت الموظفه إللى بتمضيلها الورق آنسه سيادتها و صاحبتى قالت لها يا مدام لو سمحتى إمضيلى الورق .. ... راحت حالفه ما هى ماضيالها حاجه و قالت لها ... تعالى بكره .. و اليوم ضاع و المشوار راح ف الهوا علشان كلمة [ لو سمحتى يا مودام ...]..


الموضوع بالنسبه لى أنا شخصياً مش بيزعلنى إطلاقاً .. ..عااااااتى جدا يعنى ..هو حد يطوووول
لكن الغريب إنى ألاقى واحد يقوللى يا حاجه
كنت مره ف المصيف .. و كان محصل الكهربا جه و لما دفعتله و هوا ماشى .. قاللى .. [ معلش يا حاجه تعبتك ، .. إتفضلى يا حاجه إدخلى ] .. و أنا إتمسكنت فيها و قلتله بكل سكينه و عقل و غلب [ شكراً يابنى ] .. ,, و كان موقف و خلص و دى حاجه أنا باعتبرها من الطرائف و اللطائف إللى حصلت لى ف حياتى ...
أفتكر مره كنت باشترى هدوم لولاد اخويا .. .. و واخده معايا صحابى .. و عماله أقوللهم .. البنطلون دا ييجى على أد البت آيه .. ؟؟ .. طب و الشراب ييجى على مقاس أحمد ؟؟ ؟؟ .. فكان من الطبيعى جداً إن صاحبة المحل تقوللى .. يا مودام .. ...
فى ناس أعرفهم ..
ممكن يتخانقوا ف الشارع و يوقفوا المرور علشان خاطر كلمة ...





يا مودام .........



طيب .. السؤال للغير متزوجات..


هل ممكن تزعلى حضرتك من الكلمه دى ؟؟ ؟؟


و سؤال للمتزوجات .....

هل أيام ما كنتى ف شبابك كنتى بتزعلى م الكلمه دى ؟



فى إنتظار مواقفكم ....
و إجاباتكم ....
عن طريق إيميل البرنامج .. أو التليفون أو الإس إم إس ...






و إياك يتحذف الموضوع





مش عارفه ليه انا حاسه كأنى مسكلكم العصايه وبقول لكم يا تردو يااااااااااااا تردو بردو