انا النهارده كنت في مشوار لحد مصر ام الدونيا عقبالكم لما تزوروها واحنا مسافرين اخدنا الطريق الصحراوي عشان نوضل اسرع ونكسب وقت وعشان نقتل الوفت قعدنا نتكلم انا وماما واخواتي في اي موضوع وتطرق بينا الكلام للمحافظات الجديده (6 اكتوبر و حلوان)وحدود كل محافظه وياتري مركز الصف تبع ايه والواحات الخمسه تبع ايه؟؟

المهم عشان مطولش عليكم رنت في دماغي شويه استفسارات حبيت اعرضها عليكم يمكن الاقيلها اجابه عندكم

عشان يصدر قرار بانشاء محافظه جديده لازم مبدايا انه يكون فيه مبني اداري للمحافظه دي وطبعا مكتب فخم لسياده المحافظ يتكلف مش اقل من خمسه مليون جنيه(عشان هو مش اقل من سمير رجب )دي نقطه بسيطه مش هاتكلم عن غيرها (يعني الدوله عندها فائض في الميزانيه مالايقل عن عشره مليون جنيه للمحافظتين)

تمام كده؟؟؟

اشمعني بقي العلاوه الجديده لما صدر قرار بشانها لقينا ان في نفس الاسبوع اللي المرتبات زادت فيه اسعار 90% من السلع بنسبه 200% بحجه اننا بندبر موارد حقيقيه للعلاوه من غير مانزود الديون بتاعتنا

سؤالي انا بقي
احنا دلوقتي كدوله معانا فلوس ولا مش معانا؟؟؟

ولو معانا ايه الحكمه من انشاء محافظتين جدد؟؟

ولو مش معانا ايه اللي ليه اولويه زيداه المرتبات ولا انشاء المحافظتين الجداد

يارب متكونوش زهقتوا مني