بصوا يا جماعة

ده زجل كنت الفته وانا عندي عشر سنين لماما

قلت استرجع الذكريات واشوف براءة الكلمات وانا صغنونة

مستنية رأيكم بس خلوا بالكم اني ساعتها كان عندي 10 سنين بس

__________________________________________________ ___________________

شوفوا الام لما بتتألم وهي بتولد طفلها....

شوفوا الام بتئى سعيدة لما بييجي قلبها ....

شوفوا الام بتبئى حزينة لما بيمرض ابنها....

شوفوا ازاي بتضمه بحنان كده هو في حضنها....

دايما تهتم بيه اكتر ما بتهتم بنفسها.....

تيجي انت لما تكبر تعاملها بقسوة.....

يااااااااااااااااااه شوف قلبك من قلبها.....

شوفوا الام لما بتتألم وهي بتولد طفلها

مهما عشت ترد جميلها....مش هتقدر ترده لها

مهما ادتها من حب ....متقارنش حبك بحبها

ازاي انت ترد جميلها.....هو قلبك كان اد قلبها

لو نفسك ترضيها عنك..... لازم تسمع كل كلامي اللي جاي عنها

تسمع كل اوامرها..الا في عصيان ربك وربها

اوعى تزعلها منك ...او تفضل مراتك عنها

مش تعمل كده من خوفك منها لكن من حبك لها

شوفوا الام لما بتتالم وهي بتولد طفلها

لما بتكبر تبئى سعيدة بيك...وفرحانة بتربيتها ليك

وتدعى وتقول يارب خليه ليا عشان يخاف عليا من كل الدنيا دية

يارب خليهولي عشان يسندلي طولي واتسند عليه وامشي وايدي في ايديه

دعوة الام مستجابة بتخترق اي سحابة

اسمع كلامي من غير تفكير

ده انا كلامي هيفيدك كتير

روح دلوقتي عندها .....وسف تراب جزمة رجلها

روح بسرعة الحق الفرصة متفوتهاش

دي الساعة اللي بتروح مبتنهاش

الام لو رضيت عنك ..تبئى الجنة اتفحتلك

روح بسرعة الحق ......دي الجنة تحت رجليها

هتعمل ايه عشان ترضيها؟؟!!

ده انت لو قدمت قلبك وروحك وعنيك هدية ليها

مش هترد جميل واحد من جمايلها اللي مغرقاك.........من راسك لحد رجليك اللي بتمشي بيها

شوفوا الام لما بتتالم وهي بتولد طفلها

__________________________________________________ ______________

انا فاكرة اني كنت بقولها في الاذاعة في كل عيد ام اجبارا وقهرا :]

كانت كلماتها بسيطة وبريئة ياه نفسي ارجع للايام دي تاني