صيداتى انصاتى صادتى,,

اهلا بكم فى الحلكة الاولى

و تقريبا كده هتكون الاخيرة

من برنامجكم المحبوب الفزييع الشنييع المرييع ..

اللى يجيب ضغط وسكر وزيت وسمن وباقى التموين لما تدفعوا المتأخر عليكو !!


برنامجكم الذى طالما انتظره الصغار و الكبار

القصار والطوال


الاهلاويه و الزملاكاويه


و اللى ملهامش مع الكورة اى علاقة ولا اى قضية :

البرنامج الذى سيضحككم حتى النخاع .

ويبكيكم حتى البتاع ده اسمه ايه ,,

ما علينا



البرنامج الذى سيقدم لكم المعلومة االثقافية ,, الرياضية ... الحركة . . العواطف .. الميلودراما وحتى الرعب اه وربنا رعب


البرنامج اللى بيخر حنيه على الدور اللى تحتيه


((:انتى يا ست غرقتينا حنيه ما تحاسبى

:يوه يختى لامؤاخذة مختش بالى ))

برنامجكم


عالم عيال عيال عيال


طكطكطكطكطكطكطكطك فووووووووووووووووووت فووووووووووت




شكرا شكرا


معانا فى اول حلقة نموذج مثالى بشكل مستفز للام المصرية المضحية

اللى هوا انا طبعا


و فيلم يا تجيبلى المفتاح يا ضنايا يا اجيبوه انا تيكلم تيكلم



يبدأ الفيلم لما ,,,,,,,,,,,,,,,,,,,,,,,,,,,,



الكاميرا بترجع لوراااااااااااااااااااااا ااااااااااااااااااااا:huh :











حااااااسب هتخبط فى الحيطه الله يهدك






العثل ده يبقى

مودى ابنى لما كان عنده 3 سنين كده ..



انا واقفة فى المطبخ عماله افنن ما لذ وطاب من الطعام ..



والافندى قاعد بيلعب طبعا .. عادى يعنى عنده 3سنين هيعمل ايه بحث فى الذرة ؟!! ..



المهم انا خرجت ارمى شوية حاجات فى الزبالة .. وفى لمح البصر .. كان مودى سنكر عليا الباب وانا بهدوم المطبخ وفى حالة مزرية ..



يا ابنى ابوس ايدك افتح ..



ابدا



يا واد افتح انا ماما ,,



: ماما مين



افتح وهجيبلك شوكلاته ..

ولا حياة لمن تنادى






طب ارميلى المفتاح يا منيل ..



مفتاح ايه اللى انا بكلم فيه.. البيه فتح التلفزيون على اخره واولع انا بقى



المهم



فكرت .. ودى حاجة نادرة جدا .. وروحت طلعت للجيران ..

مقولكوش شكلى كان عامل ازاى .. شبه ذئاب الجبل بالظبط ..



وهما اتأكدوا من النقطة خصوصا لما طلبت منهم انى انط من عندهم على شقتنا ..



احنا فى الدور الارضى صحيح بس برضو اسمى نطيت من دور لدور..


المهم استجمعت شجاعتى وتدليت من الطابق الاعلى ودفعت شباك الصالة برجليه واخيرا اقتحمت الشقه ولا اجدع ظابط ففرقة كوماندوز .. يختى عليا ..



طبعا دخلت جرى على مودى عشان انتقم منه لقيته نايم زى الملاك



قصاد التلفزيون وكان شغال اغنية الليلة الكبيرة على مقطع انا شجيع السيما ابو شنب بريمه





طبعا هتسألوا ايه دوافعى اللى خلتنى اقوم بعمل انتحارى زى ده :



اولا .. انا كنت مولعه البوتجاز وخايفة جدا الحاجة تغلى و الاكل يفور ويطفى العين و الغاز وكده وتبقى مشكلة ..





و اهم سبب بقى فى الموضوع..



ان محمد لو كان رجع ولقى الاكل لسه مخلصش كان هيعمل فيا ايه .!!.. ومحدش يسئلنى محمد مين اصل انا كده لما بندمج فى الدور بعيش بقى ههههههههههههههه



هذا وقد انتهى الفيلم الرائع الحائز على 144 جايزة اوسكار

نتمنى لكم احلام مرعبة

و الى اللكاء فى الحلكة الكادمة



كاااااااااااااااااااااااا ااااااااااااااات

المخرج: كنتى هايله يا استاذة تحفة

انا: الله يتحفك يا استاذ

المخرج : لا والله عسل

انا : الله يعسلك يخويا

المخرج : وربنا ...


انا ما خلاص انت ايه بلاعة واتفتحت

يالا افتحلنا باب الاستوديو خلينا نروح نتخمد دنا هلكت النهارده


المخرج : اصل .. ماهو .. يعنى


انا: ايه فى ايه اخلص

المخرج : ميزو هوا اللى خد المفتاح المره دى وطلع البرج

أنـــــا اعمل فيك ايه يعنى احدفك من الدور ال عشرين
__________________