الشوق وسواس
يطلع م القلب يهز الراس
ويلم عليَّ الطير والناس
وأبات حيران
محبوس الشوق من غير سجَّان
قايم نايم .. محسوس وكيان
وليالي يداعب ويعاتب
ويقوم يتنطط ويشاغب
ويزُق عليَّ الشعر شيطان
يمنع زادي
وانا احاول اراضيه و أدادي
كُل مُرادي ..
يعتقني .. انام !!
ويجيني شُكوك
بكلام محبوك
وأنام على شُوك
وأبات حيران



والشوق محبوس
مِن غير سجان
ملازمني ف عشتي كأنه زواج
راح أجيب للشوق مِنِّك إفراج !!
بالذوق .. بالزور
بغياب .. بحضور
أو حُسن مُعاملة وسير وسلوك
يرحل وتزول عني الشِدَّّه
ف نص المُده ..
وكفايه حرام ..
يعتقني أنام
وسماح يا غرام !!
وأضحك من قلبي وتبقى
تمام !!.
الشوق سهران
والضعف يخلِّي العيشه هوان
وأنا بيكِ ف ضعفي بكون
دفيان ..
عريان دفيان !
وبكون حيران ..
دفيان حيران !!
بالشوق متغطي لكن بردان ..!
وأهرب م الطوق!
وأداري الشوق ..
ببخور ونشوق
وأصُب الكاس ..
يتلّم عليّ هوام الناس
وأمد الأيد .. وأطُل لفوق
تنزل دمعة ..
مْ الوجد تسيل
أتصوّر .. أتصور إنك سهرانه
حاسه وسامعه
الآه مواويل
والشوق سهران
والحلم جميل .. جميل
.. لو انك ناويه تلميني ؟!
لو انك غاوية تضُميني !؟
بشده وإخلاص ..
ونعيش وخلاص !!
راح أربَّطْ توبي ف ديل توبك
وح أرتب من عُمري أمورك
وح خُط حروفي على سطورك
محتاجه دليل .. ؟!
أنا زندي أصيل
إتسندي عليه
ينفع عُكاز ..
لا ف يوم ح يكِل
ولا بينحاز .
عُمرك يومك ..
لمي همومك
ح حفظكم جوه القلب عُزاز
ده الشوق سهران
والقلب بحبك وسع ميدان
وف وسط القلب دفا
وحنان
وكتاف بتشيل .
والعُمر يا ست الحُسن بخيل
و ح تبقى جنان ..
لو ترضي ..
لو ترضي أكن لك ضلايه
أو أكون على صدرك دلايه
أو أكون لك طرحه وعبايه
وأتلم ..
أنضَم
على كتافك و أدوس
أو أغطي ورود الخد ..
و أبوس
وأهفهف فوق الشَعر .. أطير
أنا قلبي عليكي يا عُمري
حرير ..
وساعات من روحي عليكي
بـ أغير
ح أفضل مفرود .. ليطُل حسود
وأنشِّف فوق خدك دمعه ..
لو دمعك سال
وأتعطَّر من ريحتك وأفوح ..
م انا طرحه وشال ..!!
لا أبات مجروح ..
ولا أبكي ونوح
والشوق ح ينام ..
لا عتاب ولا صد
والناس تنفض ..
ولا يفضل حد
وأبقى لك وحدي ..
وليكي أتشد
وف آخر العُمر تلميني ..
كده .. تطويني ..
ومابين فساتينك خبيني
جنب ملايه ..
وانا وعد ح كونلك يا حياتي
غطا أبيض منقوش
وعبايه

منقول