بحبك يا مصر
يا أم الحضاره فـ عصر الفراعنه
يا كلمه وليها ولا ألف معنى
يا أرض الغلابه يا جحر الديابه
يا زهرة أملنا
وجنه وغابه
يا وعد الأحبه وقبر المحبه
وشمس الطيابه
يا دم اللى ماتو فـ سينا وطابه
بحبك بحبك
بحبك يا مصر

أحبك فـ نكسه أحبك ف نصر
أحبك فـ عشه وفيلا وقصر
أحبك وحبك بيعصرنى عصر
وحلمى وأملى
فـ مره تحسى
بلهفة ضناكى عليكى يا مصر
بحبك بحبك
بحبك يا مصر

بحبك برغم الحديد والقيود
بحبك برغم السكوت والجمود
أحب الـ نايم
أحب المصحصح
احب الكفيف الـ خايف يفتح
وأحب الـ يهمس وأحب الـ يردح
وأحب الـ ماشى بطولك وعرضك
بيحضن فـ أرضك
وعاشق لعطرك
بحبك بحبك
بحبك يا مصر

احب العوادم فـ زحمة طريق
وقاعدة عاشيه فـ صحبة صديق
نحاكى ونوصف
نغطى ونكشف
حكاية البرئ الـ ساكن فـ قصر
وقتلك يا مصر
بحبك بحبك
بحبك يامصر