دمــــــــــــــــاغ جامده طحــــــــــــن



معملتش (دماغ ) قبل كده ؟ ..

بس المرة دى مش اي دماغ دي اسمها )( دماااااااااااااغ ناااااااااااااس )(
- ايه دماغ ناس دى ..

- دماغ ناس .. زى دماغ قهوه .. دماغ شاي.. دماغ كابتشينو .. تعمل دماغ " ناس".. بص ياسيدى ..

لو فى يوم لقيت نفسك متضايق ومخنوق وملكش نفس تكلّم حد ومش لاقى حاجه تعملها .. إنزل الشارع إتمشى لواحدك و تأمّل فى الناس .. هتلاقى الموضوع مسلّى جداَ .. الشعب المصرى ده لذيذ طحن .. دماااااااااااااااااغ

......

* هتلاقى ناس طالع عين أهلهم فى أتوبيس فيه 186 واحد والناس طالعين من الشبابيك والجو حر .. والناس لسّه بتركب وهى مبتسمه وحاسه بالكفاح .. وتلاقى واحده ست تخينه – غالباَ موظفة – دخلت وسط الـ 120 واحد اللى واقفين على الباب واخترقت الجموع فى براعة ورشاقة تحسد عليها ..سبحان الله

* بنت لابسه هدوم المدرسة ومزوغة ماشيه مع ولد – ممكن تحلف إنه مش هيلاقى شغل ولا بعد 100 سنه من شكله – وإن لقى.. أول حاجه هيعملها أنه يسيب البنت دى .. كفايه فقر بقى ..

* واحد ومراته - كبار فى السن – ماشيين على الكورنيش بياكلوا ترمس فى منتهى السعادة والأمتنان ومش عايزين حاجه تانيه من الدنيا ..

* واحد شكله تعبان طحن ومش لاقى ياكل، بس جايب أحدث "أوبايل" وبيتكلم فيه بصوت عالى فى وسط الشارع.. عشان هو حر ..

* واحد عمره ما شاف الزبدة فى حياته ولا يعرف بتستخدم فى أيه أساساَ .. عاملين معاه لقاء فى القناة الثالثة بيسألوه عن رأيه في مقاطعه المنتجات الدنماركية .. قلهم " أه طبعاَ انا مع المقاطعه دا واجب وطنى يا جماعه أنتوا بتتكلموا إزاى .. "

* واحد واقف مع خطيبته/صحبته قدام قفص الأسود فى جنينه الحيوانات بيقولها : " بصى .. أهو ده بقى أسد .. !!! " شاعراَ بأنه قد منحها العلم والمعرفه المطلقة وأسرار الكون ..

* بنات لابسه بديهات ستومك.. عشان دى الموضه .. يا عيني ع الموضه اللي تمشيكي عريانه يا حلوه

* أسره مكونه من 4 أفراد أب وأم وبنت شابه وولد فى أعدادى قاعدين فى Café .. طلبوا عصاير وشيشتين .. مين اللى شرب الشيش ؟! .. البنت وأمها .. أه والله ..
* من أسبوعين كده كان فى ماتش للأهلى و فريق تانى مش فاكره .. كان فيه 2 منقبات بيشجعوا فى المدرجات !! .. و واحده منهم كانت لابسه نقاب أحمر .. تشجيع بقى .. صباح التهييس ..

جرب أنت كمان تعمل دماغ ناس .. هتلاقى الموضوع مسلّى جداَ .. و أبقى قلنا إيه رأيك ..