إزاي تعملي شنطة للبلاج بنفسك شكلها جديد غير باقي الشنط اللي بتشوفها وكمان مفيدة تحطي فيها كل حاجاتك وأنت رايحة البلاج أو النادي وده لأن حجمها هيكون كبير وبياخد كل حاجة بتستخدميها على البلاج أو في النادي..

تعالي نشوف ازاي

كل اللي هتحتاجيه

• فوطة بحر كبيرة أو باشكير
• فوطة تانية متوسطة الحجم
• خيط ملون بلون يكون مناسب للفوطة
• مقص


الخطوات

الخطوة الأولى

هاتي الفوطتين وافرديهم جنب بعض على الترابيزة.


الخطوة الثانية

قسمي الفوطة الصغيرة على ثلاثة أجزاء بس خلي جزئين منهم يكونوا قد بعض؛ لأن دول هنستخدمهم كإيد للشنطة والجزء الثالث يكون أكبرهم


الخطوة الثالثة

هاتي الجزء الكبير من الفوطة الصغيرة اللي قصتيها وخيطيه على طرف الفوطة الكبيرة بس خدي بالك إنك هتخيطها من ثلاثة جوانب من على الجنبين ومن الأسفل زي ما هو موجود في الصورة.



الخطوة الرابعة

هاتي الجزئين الصغيرين من الفوطة الصغيرة وخيطي واحدة منهم بشكل قوس على الفوطة الصغيرة والتانية بنفس الشكل بس هتخيطيها على فوطة البحر نفسها؛ لأن دول هيكونوا إيد الشنطة.


الخطوة الخامسة

دلوقتي مش ناقص غير أهم خطوة وهي إنك تطبقيها بالشكل الصح الأول هنطبق فوطة البحر نصفين وبعدين هنقلب الفوطة الصغيرة على ظهرها بحيث إن باقي الفوطة هيكون جوه.



وده الشكل النهائي اللي هتلاقيه


طبعًا فيه سؤال بيدور في بالك دلوقتي وهو إن الفوطة ممكن تتبل وأنا قاعدة على الشاطئ يبقى ازاي أحط فيها حاجاتي؟؟
بس خلينا نقولك إن حاجات البلاج دايمًا بتتبل حتى في الشنط العادية ودي حاجة طبيعية جدًّا وعادة أنت بتحطي في شنطة البلاج حاجات بسيطة ومعظمها بيكون في علب زي كريمات الشمس ودي مش بيحصل لها حاجة وعلى فكرة ممكن لما تروحي البيت تفردي الفوطة دي وتغسليها وتسيبيها تنشف وأنت خلاص عرفتي إزاي ترجعيها شنطة تاني.