انا كنت نزلت اليوميات قبل كده بس ما كنتش كامله


هنبدا من الاول ونزلها كامله



بعد شوية سنين فى الغربة

وبعد ما حضرتك تكون بطلت بصبصة
واعتزلت التجارب النظرى
ومليت من التفاح
وزهقت من العيون الخضرة والشعور الصفرة
ونفسك هفاك على جعضيض
ساعتها تعرف ان الطبخة ..اللى هى حضرتك ...استوت
وانك محتاج تكمل دينك وترتبط بحلم عمرك
وتبدء تفكر فى نصك الحلو


وهى حالة طبية ميئوس منها اشبه بالحمى المستعجلة التى تصيبك و لاتغادر بدنك الا بحاجة من الاتنين ياتعقل يااما تتجوز
وفى الغالب مافيش حد بيعقل

وعندما تصل لمرحلة التفكير فى الزواج فحتما تجد نفسك وقد رسمت مواصفات للعروسة اللى انت عاوزها

واللى بتبدى بانها ..تكون متدينة وعلى خلق ومؤدبة وجميلة وميسورة الحال (عندها شقة وعربية وموش مهم عندها حساب فى البنك او لا) ومن عيلة

وعندما تعقدت الامور قصدى عندما بدءت ارى نفسى مقدما لا محالة على الزواج وبدءت الكوابيس تتكرر كل ليلة

ايشى واحدة بتنده...

- قوم يالا ياراجل خدلك فومين غسيل اصل انا لسة عاملة باديكير


وايشى اربع عيال بيشدوا فى البنطلون ويصرخوا..

-بابا اوبح.

وصوت واحدة يبدو من شكلها انها زوجة المستقبل بتشد فى شعرها .. وبطنها ادامها نص متر ..وبتصرخ...

- الحقنى بام عطيات الداية الواد عاوز حد يدلعه ..قصدى حد ينزله


وافيق من الكوابيس واقول اللهم اجعله جواز. .. قصدى اللهم اجعله خير

وبعد مااجيبها يمين واجيبها شمال والاقى انى مهما صعت واتصرمحت فى بلاد الله خلق الله ..فمسيرى اتجوز

فاعزم النية وارسل خطاب الى امى ..هذا فحواه




إقتباس
[right]ماما الحبيبة....

ابنك خلاص تاب واناب

وحايسمع كلامك بعد طول الزن

وانتى ست العارفين ...الزن عالودان ..امر من السحر

أحب بقى ابشرك ياست الكل ان السحر .. قصدى الزن ... يوووه... قصدى كلامك جاب نتيجة

واستجاب الله لدعائك ليل نهار وهدانى الى فكرة الزواج

لذا قررنا نحن ابنك المصون والوحيد الحيلة وانا لازلت فى كامل قوايا العقلية ان اتزوج يلا بقى ياست الحلويين حضرى عرايسك وانتظرينى مساء الخميس القادم فى مطار القاهرة
كان ذلك هو الموجز
واليكم الانباء بالتفصيل حين اصل سالما الى ارض العرايس .. قصدى الى ارض الوطن





و
و
و
و
و
و
يتبع...............