بسم الله الرحمن الرحيم
فى الاول احب اسلم على كل النجعاويه القدامى والجدد وققولهم وحشتونى بجد لانى بقالى فتره طويله غايبه عن النجع واخباره وعلشان كده انا جاى النهارده احكيلكم اخبارى ونتكلم مع بعض كلام من القلب عايزه افتحلكم قلبى واحكيلكم عن الىحصالى فى الفتره الى فاتت /scenic
فى الفتره الى فاتت حصالتلى حاجات كتيرررررررررررر منها الحلوه والموره وهبدا معاكم بالحلوه طبعا :
فى يناير الى فات وبالتحديد 31-1 كانت خطوبتى عقبال كل البنات واحب اعرفكم ان خطيبى كان دايما حانبى وبجد عمره ما اتاخر عنى وده مش معناه ان احنا مش بنختلف لا طبعا every one has his up and down moments زى مابيقولو او الاختلاف لايفسد للود قضيه يعن من الاخر بنعديها علشان احنا عاوزين كده وزى ما احنا عارفين بلاش نقف على الوحده :] :] يعن لوحتى اختلفنا اوزعلنا بكون عارفه من جواى ان دموعى غاليه عنده وممكن يعمل اى حاجه علشان مايشوفهاش <وطبعا انا بستغل ده بس اوعى حد يقوله>
وكمان من الحاجات الحلوه ان انا نجحت والحمدلله فاضلى سنه واخلص من الكليه عقبال الكل يارب الى ماتخرجش يتخرج والى ما اشتغلش يشتغل وانت فاهمين بقى
بس الى الى انا عايزه اتكلم معاكم فيه بجد هو النص التانى من الفتره دى الدارك سايد
الاول عايزه اسالكم يعنى ايه اصحاب ؟ يعنى ايه صداقه ؟
طول الفتره الى فاتت وانا بحاول اغير مفهومى عن الصداقه علشان يلائم الى حصلى لان الصداقه فى مفهومى البسيط كان معناها المسانده ان اصحابك يكونوا جنبك فى السراء والضراء وان الى يغلط فى التانى التانى يسامحه ويعديها هو ده الى انا اعرفه وبنفذه بس فى لحظه اعز اصدقائى بعدت عنى كده من غير سابق انذار كل الى حصل انها غلطت فى واستنتها تعتذر علشان نعديها وخلاص بس هى شافت ان ملوش لزمه الاعتذار ؟؟
كبريائها كان اكبر من انها تعتذر والغريبه ان انا حاولت اكلمها لقيتها متغيره معاى ولو انا استنتها تيجى تسلم ما بتيجيش وقالت لباقى صحباتنا مايدخلوش فى الموضوع وعلشان كده انا بعدت وهى ما حاولتش تيجى تسال ؟
حد فاهم ايه الى بيحصل ؟
يعنى ايه شخص تعتبره اعز اصدقائك صاحبك الانتيم الى عمرك ماتهون عليه تكلم معاه 20 ساعه فى اليوم تحكيله عن كل حاجه فى حياتك الاكل الشرب الخروج الفسح الاماكن الى بتحبها الى مزعلك النهارده الى مفرحك كل حاجه بمعنى كل حاجه تقضى اليوم فى بيته تضحك معاه تحزن معاه اخواتك شايفينه واحد منكم
وعمره ماحتاجك واتاخرت وبعدين فى لحظه بعد وسابك لانه مش قادر يقللك معلش فى حين ان انت مش بعدت عنه لا هو الى خد جنب وبعدك عن حياته
واوعوا تفتكروا من كلامى ده انها شخص وحش لا والله ابدا دى ياما وقفت جنبى برده والحاجات الى زى كده مابتتنسيش بس كل المشكله انها شايفه ان صحابها حاجه مسلم بيها مش ممكن تخصرهم حتى لوعملت فيهم ايه وماينفعش انها تعتذر لحد؟
رغم انها طيبه وانسانه كويسه بس بتبعد اصحابها عنها وعمرها ما حسستهم ان صاداقتهم ليها معنى كبير عندها
المشكله الاكبر ان فاتت سنه على الحكايه دى ولحد النهارده لسه بتوحشنى بيوحشنى كلامى معاها بيوحشنى ضحكنا سوا وممكن اسهر طول الليل اعاتب نفسى وققول يمكن انا قصرت كان ممكن اعمل كذا اوكذا
وبعدين يرد صوت من جواى ويقلى وياترى هى بتفكر كده برده ياترى واحشها كلامك معاها؟؟
ياترى حاسه انها محتاجالك؟
انا مش عارفه اخلص من الاحساس ده بس بحاول لان الواضح ان الموضوع كده انتهى
وعلىالعموم احب ققولكم ان الاصحاب دول احلى حاجه فى الدنيا لان دى الذكريات الى هتفضل معاكم طول العمر حاولوتفتحلهم قلبكم وتحافظوا على اصدقائكم وتحسسوهم بقيمتهم عندكوا
وانا بشكركم جدا جدا ان انتم سمحتم ليا ان اتكلم معاكم واستحملتونى وادتونى فرصه افتح قلبى واتكلم عن الموضوع ده لاول مره ومعلش علشان طولت عليكم بس يارب تستفيدوا حاجه من التجربه دى وماحدش يمر بيها ابدا