مفيش أجمل من الشخابيط .. كلام ع الحيط
بيحكي القصة م الغربة لبيبان البيت
ياريتني ... ياريت
ما كنت عرفت معنى القسوة
معنى الجرح والتخبيط
في كل الناس .. في أى أساس
بيدفن فكرنا في توابيت
بيلقفنا ويحدفنا .. لنوة بحر عالي غويط
تعافر فيه عشان لقمة .. عافرت
غرقت في الزحمة
وبكرة هتلحس الفتافيت
وبكرة تشوف .. وما تصدقش
ما تستهزأش
ولو حتى الكلام ده عبيط
مفيش أجمل من الشخابيط .. كلام ع الحيط

بيحكي حكاية القطة اللي أكلت حتى قطاقيطها
وداست فوقها رجلينا .. وحبة رمل غطيتها
وعدت .. زى أى حكاية بتعدي
وأنا لوحدي
كتير بالحالة حسيت
أنام وأحلم بإني صحيت
لقيت أمي بتندهلي .. تعالى افطر
أفوق أكتر
تترحم عليها دموعي وأتحسر
بيني نسيت
نسيت نفسي
يا سيدي أهي مرة من نفسي
أقول كل اللي أنا إتمنيت
ما أقولشي يا ريت
ما أقولشي كلام يوكل عيش
ومعنى مفيش
ما بيوصلش ولا حاجة
وأنا قولته ماوصلنيش
ما أخدتش منه غير زهقي
ما اخدتش منه غير تسقيط
بنااااااااات وصويييييييييييت
بينها حفلة للمدعو اللي إسمه ....
نسيــــــت ... !!!
نحب نزوق اللخابيط
نحب نغني في الزحمة
نحب نزيط
ماتسألنيش .. عشان ماأحكيش
كلام ف الأصل شرحه يطول
خلاصة القول
مفيش أجمل من الشخابيط .. كلام ع الحيط

بيحكي حكاية البلد الي احساسها وكلامها يهز
بيحكي ف نيلها وجبالها وكوابسها اللي منها تفز
بتتمرد يا إبن اللللللللــــ ..................... عز
بتتمرد على ترابها .. وهتسيبها ومرارها يلذ
هقولك إيه .. ؟ مفيش فايدة
في إنك تروي ارض ترابها ماتخضرش
ملوش لزمة الكلام أصلا
مادام عقلك مابيفكرش
مفيش أجمل من الشخابيط
كلام ع الحيط