بسم الله الرحمن الرحيم
كل سنه وانتم طيبين خلاص ايام ويبتدى رمضان ويارب يكون شهر بركه وخير عليكم كلكم
وكمان الدراسه فاضل عليها تقريبا شهر وده خلانى افتكر اول يوم فى الدراسه يعنى ايام ابتدائى كلنا كنا بنروح اول يوم نتخانق على اول تخته والى عاوز مامته تفضل معاه وحكايات
وفى اعدادى كنا بروح لوحدينا ومش فارقه يعنى اول تخته ولا فى النص اما فى ثانوى كنا نروح اول يوم علشان نتخانق على اخر تخته فى الفصل ولو فى تخته فى الحوش كانت هتبقى احلى واحلى وضرب نار عليها ايام ماتتنسيش :]
ورحنا الجامعه بقى وياسلام الى لسه اول سنه يلبس جديد كده ويتقمع وينزل من 7 الصبح يقف على الموقف والوان بقى وكانه العيد
اما الى واخد على الوضع يقعد فى البيت كده قد اسبوع ولا حاجه لو كانت الكليه بتاعته عمليه يعنى وهتشتغل بعد اسبوع
اما بقى الى كليته نظريه بيقعد فى البيت شهر وينزل مره فى الاسبوع فدول ما بيحضروش اول يوم ومبيشفوش بقى اليفط بتاعته كل سنه فى الجامعه نرحب بالاخوه الجدد والقدامى ورئيس الجامعه يهنىء الطلبه بالعام الدراسى الجديد تحس انك مهم بقى وحركات من دى ياه ايام ما تتعوضش
ياريت كل واحد منكم يحكلنا على مغامراته مع اول يوم دراسه فى اى مرحله هو فيها
خلونا نعرف اول يوم عندكم شكله ايه ويارب الموضوع يعجبكم