إحنا الشباب ..
اللى إحترفنا القعده على جنب الرصيف
إحنا الشباب ..
تعرفنا م الجيب النضيف
إحنا الشباب..
اللى ف ربيع العمر
قاعدين بنستنى الخريف
إحنا ..
أحنا القميص اللى طالع عينه لبس
ولسه ما اتهراش
والبنطلون الجينز اللى ملبوس من سنه
وبرده ما اشتكاش
_هو اشتكى _ بس إحنا ما سمعناش
والكوتشى العزيز اللى نعله
من المشى ..... باش
إحنا الشباب ...
اللى شال أحلامه البسيطه على ضهره
فى الشنطه القماش
إحنا اللى قعدنا ع القهاوى قبل
ما نتحال معاش
إحنا الشباب..
اللى الزمان إدانا فوق راسنا كتير
وشكله لسه ما اكتفاش
إحنا اللى قضينا شبابنا
خوف ..وصبر ..
وذهول ..وإندهاش ..
إحنا اللى بندور على حته نقف فيها
ف وسط اتوبيس الحياه
_التاكسى لأ_
التاكسى ده حاجه يركبها اللى معاه
إسألنا إحنا ..
ما تسألش اللى بتضايقه وقفه ف الإشارة
إسأل اللى ياما كعبلتهم ..
خطوط عبور المشاه
إحنا اللى خللنا فى الكليه ..
واما طلعنا .. قعدنا فى البيت كالحريم
وكل يوم نسمع عن " تلتميت ألف "
فرصه عمل
نهلل .. فلتحيا الحكومه .. وليحيا الزعيم
ونبات الليل نحلم ..
بالشغل وفلوسه .. والبيت والنعيم
ونروح ..نلاقى كوسايه واقفه بتطلع لسانها
وتقول " ياغشيم "
إحنا شباب المسد والرنه الخفيفه
إحنا شباب _ رغم الهباب_ عايشين على دماغنا النضيفه
_غلوا السجاير _ وإحنا مالنا
فلتحيا الكوكو ... سيجارتنا الضعيفه
إحنا اللى نطلع النهار ..
نسع على القرش .. وندوخ وراه
ولما الليل يليل ..
تجمعنا قعدتنا الظريفه
إحنا اللى بندوحر مع الدنيا
واخدينها عافيه وبالدراع .. برغم
أجسادنا النحيفه
إحنا اللى لسه بنحب البلد دى
برغم مقالبها السخيفه
إحنا اللى رغم ثورتنا ..
ما تسعدناش حاجه قد الكلمه اللطيفه
إحنا الشباب ...
اللى ساعات بنلحق نحقق أحلامنا
رغم كوابيس الدنيا المخيفه اللى ساعات بنقدر نقف ف الطابور
رغم شلاليت الدنيا العنيفه إحنا اللى لفينا بلدنا شبر شبر
رغم الزحام
إحنا اللى خلصنا الدموع ..
وخلصنا الكلام ..
بس لسه ما خلصناش الضحك ..
والتريقه .. والإبتسام
مش عايزين غير أوضه ..
بأربع جدران ..وشباك .. وباب
ولمبه نقرا عليها .. اللى مكتوب
ف الكتاب
وعنوان نكتبه فوق ضهر الجواب
عنوانا إحنا ..
إحنـــا الشبــــــــــــــــــــا ب