نــَفــَسي ضاق هتخنـق
نــِفسي يوم واحد أفوق
طعم غير الحزن أدوق
نـفسى أصحى مرة واحدة
ويا نسماية شروق

نفسي يتمطع شبابي .. يصحى تاني
نفسي أحقق الأماني
نفسي بعد سنين شقايا ..!
ف الزمان أعرف مكاني .. ؟

نفسي أنساها الذكرى .. القديمة
نفسي أعمل لجوانحي وليمة
وألبس لبس عليه القيمة
نفسي أتأهل بعد سنين الصبر العجفا
أبقى الأول .. أبقى الألفا
أنسى الغم .. وحمل الهم .. وشرب القرفة

نفسي أتنطط .. أقع أتبطط
أغرق ف الأحلام وأبلبط
أهرب م اللي لعمري إتخطط
نفسي يفرح قلبي اللي شاب
نفسي يرجعله الشباب
أنطلق وسط الصحاب
وأعيش سني
وأعيش عمري
اللي من طيبتي إنسرق مني ..!

نفسي .. ونفسي .. بس الذكرى
واقفة قصادي وقصاد بكرة
بتقول بس كفاك أحلام
اللي في سنك بدري ينام
مايبصش بعنيه لقدام
ذكرى سجينة جوة العروق
صبح العمر قوام مسروق
ملت القلب جراح وحروق
نــَفسي ضاااااااااق هتخنق
نـــِــفسي أفوق .