خليك جدع

خليك شجاع
قول كل حاجة بصدق من غير طلسمة
الدنيا لسة مضلمة
والشعر نور ماهوش قوافي ملجمة
ولا هو أوهام أو ترف
الشعر إحساس بالجمال أو بالقرف
الشعر رؤية .. !!
الشعر همسة .. !!
الشعر نبضة
الشعر حاجة بتدوي جوه في القرار
سيبها تنط ع الوش من غير حوار
ماتقولش آه من الآلام
والضياع وسط الزحام
ماتقولش ليه .. وفين وكام .. ؟
كل ده ميحطمكش
دوب وسيل ع الورق
إكتب حروفك بالدم مش بالعرق
أصل العرق للشقيانين
والخروف سبق الغلابة التعبانين
الخروف لما اندبح نجا إسماعين
وإنت مين .. ؟
إسماعين .. ولا الخروف .. ؟
قول مايهمكش قول
ماتخافش .. كفايه خوف
قول اللي إنت عاوزه وإخترع
بكره ياواد هيقولوا شاعر مبتدع
بكره .. كمان عشرين سنة
هي كده
عشرين سنة خليك جدع .