لا أعرف من أرسل لي هذا الامتحان لكنه كان امتحانًا صعبًا بالفعل، لكنني أحب أن أحيي واضعي الامتحان الذين أثبتوا مصريتنا العتيدة التليدة البليدة القادرة علي تحمل كل شيء وأي شيء بما فيه السكن تحت جبل يتهد فوق دماغنا ولما يتهد مفيش أي حاجة تحصل ولا أي حد يزعل ونتعامل مع الكارثة باعتبار كل اللي يجيبه ربنا كويس، والحقيقة أنني لم أضع أي إجابة علي أسئلة الامتحان ولكنني حاولت أن أشارك في أسئلته فحذفت وأضفت، وأرجو أن يغفروا لي غلاستي وعذري أنها لا تقل عن غلاستهم أبدًا، الامتحان هو امتحان للحصول علي الجنسية المصرية ويشترط علي الممتحن (وهو في الغالب ابن سيدة مصرية نذله هو وأمه لأنها تزوجت رجلا لا يحمل الجنسية المصرية علي اعتبار أن الذي وضع شروط الجنسية واد دكر من السبتية لا يحب لأخته أن تكون مثل القرع وتمد لبره).

أن يكون معاه كل أدواته اللازمة : قلم رصاص - أستيكة صيني (تحسباً للأخطاء الكتيرة) - اثبات شخصيتك (تذكرة اوتوبيس - مفتاح الشقة - كارت تليفون مينا تل - عملة مصرية - أي حاجة).

في حالة لو احتجت لورقة إجابة زيادة اطلب من المشرف مع مراعاة عدم كتابة اسمك عليها (مع ملاحظة أن المصححين بيكرهو يكرهون كالسم الطالب الرغاي لكنهم مع ذلك يمنحونه درجة أعلي).

السؤال الأول: اختار من بين الأقواس الكلام الصح:

1- البنت في مصر بتتحجب............ (علشان تدخل الجنة - علشان تدخل وتخرج براحتها - علشان تدخل دنيا وتتجوز).

2- اللي بني هرم خوفو.............(طلعت مصطفي - المقاولون العرب - إعمار - خوفو).

3- اللي بني مصر كان في الأصل......(حلاق - عرضحالجي - تاجر مخدرات - حلواني).

4- البرنامج اللي بييجي ع القناة الأولي كل يوم الساعة 7.00 صباحاً ومحدش بيتفرج.

عليه برنامج.. صباح الخير............ (يا ماما - يا بابا - يا خالو - ياريس - يا مصر).

5 - مصر هي أمي نيلها جوا...........(عبي - بطني - رجلي - جيبي - دمي).

6- رئيس مصر القادم السيد......(جمال مبارك - ابن الرئيس - أمين سياسات الحزب الوطني - السيد النجل).

7- ابو تريكة هو....(لاعب كرة - شيخ -راجل بركة -قديس).

8- يا حضرة العمدة ابنك حميدة حدفني بالـ.... (معدية - السفندية - المية المعدنية - المهلبية).

9- أشهر مغني مصري هو سعد.... (الكبير - الميديم - الصغير - القزعة)

10- تامر أمين........(شرطة - مخزن- بسيوني).

السؤال الثاني: أكمل الجمل الآتية بكلام م الآخر:

1- انتبه من فضلك السيارة ترجع إلي........................

2- ماما زمانها..................

3- من خلال تجاربك السابقة.. البامبرز استيك منه.............

4- طلعت أدّب نزلت أدّب لقيت الدب بيأزز............

5- اسم والد اللاعب وائل جمعة الحاج..............

6- وهيلا هيلا، هيلا هيلا هو، الزمالك........

7- دا شاب هيهي، بيروح و......

السؤال الثالث: ضع علامة صح أو علامة غلط أمام الكلام الجاي:

1- بابا فين؟؟.. بابا هنا.. قوله مين؟؟ قوله عمو ( ).

2- الشرطة دائما في خدمة الشعب ( ).

3- أذان المغرب في رمضان بصوت «طارق نور» ( ).

4- يسرا لا تخطئ أبدًا في مسلسلاتها ( ).

5- الزمالك فريق يحرق الدم ( ).

السؤال الخامس : علل

1- مازالت كرة القدم هي اللعبة الشعبية الأولي برغم إن احنا ملناش فيها.

2- ذكاء الشعب المصري الخارق برغم اعتماده علي الفول كغذاء أساسي.

3-رئيسنا مبارك ورئيس وزرائنا نظيف ورئيس مجلس الشعب سرور ورئيس الشوري شريف ووزير الشئون القانونية مفيد وكمان شهاب ومع ذلك مصر زي ما أنت شايف

ابراهيم عيسي
.