الواحد كل ماينسى عمايل الاعلام بتاعنا الرائعه

أو يحاول يبقى بارد بقى ويتعود

يرجعوا تانى يستفزونا أكثر وأكثر

والاستفزاز السنة دى عالى قوى بداية بفلوس الضرائب اللى عرفنا اننا أخدنا قصادها مياه نظيفة وشبكات صرف صحى سليمة وكهرباء مضبوطة وكبارى وطرق نظيفة وجديدة ومرصوفة ومستشفيات آخر نظافة واحدث امكانينات ومدارس رائعه لأولادنا والبلد بقت زى الفل من ساعة مابقوا بيحصلوا الضرايب

و احسبها صح تعيش صح واننا لازم نوفر فى كل حاجة ونحسبها بدل التبذير اللى احنا فيه ده واللى رجعنا لورا

مروراً بانننا لو " رحنا الربوة هنلاقى ناس سعيدة ومبسوطة " وان " الحياة فى الرحاب حاجة تانية " ( ماطبعا حاجة تانية وناس مبسوطة ) وان المستقبل ان شاء الله ماشى على نفس الوتيرة

انتهاءً بأكثر الحملات استفزازا

وهى حملة التوعية بأسباب غلاء الأسعار واللى طلع السبب فيه واحنا مانعرفش مدام فشخرة " شفتوا ازاى ظلمنا الحكومة طيب كنتوا قولوا من الأول ياجماعه واحنا ندور على المدام دى ونرجعها لعقلها طالما هى السبب فى ان الاسعار تولع وتعمل فى الناس كده

ياريت لو حد يعرف مكان مدام فشخرة دى اللى بتطبخ 7 أصناف أكل و7 حلو و6 بعد الحلو

واللى بتاخد الأطباق المليانة والطواجن ترميها بحالها كده فى الزبالة

يمكن ده بسبب الجهل فى مصر وعدم علمنا بوجود ثلاجات مثلا؟؟؟

طيب كانوا عملوا حملة توعية بفوائد الثلاجة طالما الناس بتحب تطبخ كثير كده وبترميه

ولا يمكن بسبب الطفرة الاقتصادية الكبرى اللى حلت بالشعب المصرى خلته مش هامه وبيعمل أكل عشان يرميه عملا بمبدأ اللى معاه قرش ومحيره يجيب حمام ويطيره ؟؟؟

ولا يمكن انا فهمت غلطت وهما مايقصدوش مصر دول يقصدوا بلد تانية الناس فيها بتعمل أكل وترميه ومبذرة جدا وتشترى أدوية على الفاضىوالمليان لغاية ماتنتهى مدة صلاحيتها ومش عارفه تعمل ايه بفلوسها

عموما مع انتصاف رمضان بدأت على استحياء اعلانات بنك الطعام تظهر وتقول ان فيه ملايين مش لاقية الأكل أصلا وفى ناس بتاكل بواقى الاكل المرمى

أنا مش عارفه يعنى اللى عاملين الحملات الاعلانية دى هدفهم ايه بالضبط يمكن عاوزين ياخدوا جائزة نوبل فى الاستفزاز

ولا يمكن دى احلام يقظة عندهم ترجموها اعلانات

ياريت الاعلام المصرى يرحمنا بقى شوية ويسيب الناس راضية بحالها

ياريت الاعلام المصرى يرحمنا بقى شوية ويسيب الناس راضية بحالها

وياجماعه خلاص حقكم علينا

المواطن المصرى هو المسئول عن كل حاجة فى البلد

عن غلاء الاسعار عشان بيعمل أكل ويرميه

وعن المرافق البايظة عشان مش بيدفع الضرايب

وعن انخفاض الدخل والعيشة السودة عشان بيشترى حاجات مالهاش لازمة

بس ارحمونا بقى



حد فيكم شاف الاعلانات دى ؟



طب اتغاظ ولا انا بس اللى متغاظة