السح الدعم أمبوه
ممنوع م الصرف يا هووه
وياعيني الناس بتصوت
م الهم وم اللي شافوه

سلامات يا نظام حصل ايه
العيش زعلكوا في ايه
قال (لأ) لا سمح الله
والا الدور جاي عليه

قوم بينا يا عم حسين
هنروح م الغلب ده فين
شاحتين الفول لله
وده كان لسه بقرشين

السح الدعم امبوه
ممنوع م الصرف يا هووه
والعيش اهو ولى وراح
والجوف فاضي خنقوه

الكيلو المحشي بكام..؟
ده بخمسة جنيه يا مدام
ياخرابي ده كان بجنيه
يامدام ده زمان احلام

والزيت ده كمان غلوه
والاكل ان فاض يرموه
بنطالب بالزيادات
وكلامنا قوام ينسوه

عايشين فين احنا يا عالم
في دنيا بهوات وعوالم
وياترى اخرتها دي ايه
وياك يا سي سيد ظالم

لا لا لأه لا سمح الله
مش قصدي الشخص اياه
انا قصدي الحظ الاغبر
اللي حياتنا عايشاه

مانا ما اقدر اقول ولا حاجة
وان نفسي في مليون حاجة
و كأني في مالطة بأذن
راح اعيش واموت...محتاجة

مااحنا في بلد الفيريكيكو
بالقفا عايش يديكوا
ساكتين راضيين مطاطين
والدعم خلاص انسوه

السح الدعم امبوه
ممنوع م الصرف يا هووه
وياعيني الناس بتصوت
م الهم وم اللي شافوه