تعالوا نحب بلدنا ده اسم الحملة اللى هشنها فى النجع وسط الناس الكويسين عشان نشوف ايجابيات بلدنا وبكده نحبها لانى بصراحة لاحظت فى كتير من الناس انهم ما بيحبوش البلد خالص ونفسهم يخرجوا منها حتى لو هيروحوا اسرائيل .....طب ينفع كده ؟هى بلدنا وحشة للدرجة دى ؟........
علماء النفس بيقولوا ان تفكير الانسان ده عباره عن ملفين ...
ملف للافكار الايجابية ..وملف للافكار السلبية
وبمجرد ان الواحد فينا يفتح ورقة من الملف الايجابى كل الورق التانى بينتشر والمعلومات اللى فيها بتطلع بدل ماهى كانت متخزنة .
أنا بقى عايزة استغل النقطة دى بأننا كل واحد يذكر نقطة ايجابية فى بلدنا هو شايفها او يسمع عنها وبمجرد التفكير فى بلدنا بطريقة ايجابية هنلاقينا نرجع نحبها من تانى ونقدر نعطيلها من مجهودنا وتعبنا لغاية ما ننهض بيها وأظن ان مصر تستحق أكتر من كده.......ولا ايه

يلا انا هبدأ
مصر من أجمل ما فيها المصريين طيبين :) واولاد بلد زى ما بيقولوا وتلاقى الملامح المصرية مميزة لو فيه مصرى بين مليون واحد غريب أكيد هتعرفه ..والست المصرية دى بقى مافيش كلام أصيلة وطيبة :) وبتشيل كتير وبتستحمل .. اسيب الباقى ليكوا بقى عايزة أشوف ردودكم فى حب مصر