اكيد كلكم سمعتم عن الحوار بتاع العسكرى المصرى اللى موافقش يحرس السفارة الاسرائيلية::

يا ترى عرفتم حصل له ايه ؟؟؟:no000000:

اخد له 6 شهور سجن :: عشان يبقى عبرة لغيره من الحمقى والمغفلين

دة بقى مقال ساخر بيوضح لنا ان دة تصرف طائش وغير مسئول من العسكرى :
:
هذا المقال قرأته فى جريدة ( ... )

المقال بعنوان : نبوس الجدم ... ونبدى الندم


المقال :

يا عينى على عسكرى الامن العبيط اللى رفض يحرس سفارة اسرائيل ... اصله مسكين ... لسه فاكر ان مصر هى أمه ونيلها هو دمه ... ما يعرفش ان امه اتجوزت .... اتجوزت امريكانى ... اما النيل

بقى اللى هو دمه ... فكانوا بيفكروا يردموه علشان سيولة المرور امام الاوتيلات ....


ما يعرفش اننا بقينا بناكل من اسرائيل وبنلبس من اسرائيل و كمان بنتسرطن من اسرائيل ... ويا عينى ما يعرفش ان سعد زغلول مات ومصطفى كامل مات و حتى عبد الناصر .. برده مات ... دة

حتى تماثيلهم فى الميادين مغطينها بقالهم مدة بدون ابداء اسباب ... وغالبا غطوها وصوتوا ...


يا عينى عليه عسكرى عبيط ... لسه عايش ف زمن عبد الحليم و ام كلثوم ... ووقف زى الاهبل وقال احلق بسماها وبترابها ما يعرفش ان حديدها النهاردة اغلى كتير من ترابها اللى بقى بيتباع

ببلاش للمستثمرين ... اما سماها فاختفت خلف الابراج المخالفة ... صحيح عسكرى ساذج ... لسه بيغنى "اصله معداش على مصر" .... ومعندوش فكرة ان خلاص كله عدى على مصر .. اللى نهب

مصر واللى باع مصر واللى بالرخيص اوى اشترى مصر ... كله عدى على مصر ... واحنا طيبين وقاعدين نغنى لسمعة مصر ...


واضح جدا ان العسكرى دة مخه على قده ... يعنى هو لما كان قاعد ممدد على شط الترعة و بيغنى "قوم يا مصرى" وراحت طالعة فى دماغه وقام ... طب مش كان يبص حواليه ؟؟ ... كان هيلاقى ان

محدش غيره قام ... كان يشغل مخه بقى ويقعد تانى ... ويتكوم جنب اخواته المصريين ... وكان هندارى عليه ونقول ان عنده -الشر بره وبعيد-مرض الوطنية اثناء النوم.. لكن اما بيصحى بيبقى زى

الفل ... وادينا بنعالجه ...


صحيح ... الهبل ليه ناسه ... يا عينى ما كانش يعرف ان المصرى لو قام هتقوم قيامته ... وياخد فيها حبس 6 اشهر ... اكيد العسكرى دة كان نايم نومة اهل الكهف وماعندوش فكرة ان كل حاجة فى

مصر اتغيرت ... ومش فاضل منها غير اسمها ... وبكرة دة كمان يتغير ...يبقى مصريكا او مصرائيل ...لسه هنشوف ...


طبعا الولد غط غلطة لا تغتفر .... ومش يستاهل 6 اشهر حبس بس ... دة لازم يتعلق على باب زويلة من شعر مناخيره ... حتى يكون عبرة لمن لا يعتبر ... والحمد لله احنا كلنا بنعتبر ... وتجمعنا

الطبول و تفرقنا العصا ... ولذلك اقترح اصدار بيان نتبرأ فيه من الولد دة .. ونؤكد فيه انه كائن منقرض و موطنه الاصلى غابات البؤبؤ ... وانه غالبا طفل انابيب والانبوبة ماكنتش مغسولة كويس ..

كما اقترح اننا كلنا نروح سفارة اسرائيل نبوس الجدم ونبدى الندم و الشجب و الادانة وعميق الاسف لهذه الفعلة الشنعاء اللى عملها هذا الجاهل السافل المارق الفاسق الفاجر ابن النبوبة ... اللى

كسفنا كلنا و تطاول وتجرا ورفض يحرس مقر اسياده ....


و من اجل هذا وحتى ننول العفو و السماح من السادة الملاح اقترح تغيير النشيد الوطنى من بلادى بلادى و الكلام الفارغ دة الى : اسمر يا سمارة يا بو دم خفيف ... حبيتك يا سى اولمرت و انا

قلبى ضعيف ...


ايه رايكم بقى ف اللى حصل دة ... تظبيط .. مش كدة:


اتمنى يكون عجبكم ... وربنا يسترها ف الايام اللى جاية

وشكرا