أولا احب اقولكم انى بلديات الابنودى
وبحب كلماته جدا

ربنا يديله الصحة

الابنودى يقول : هل يمكن لمن أنجب أن يعجز عن تسمية مولوده؟ أنا عجزت - رغم الاعتصار وطول الانتظار - أن أهب القصيدة اسما، كلما عثرت علي اسم أحسست أنه سوف يؤذيها. هل منكم من يهبني اسماً دون الاعتداء عليها..؟


ما لقيتلهاش عنوان

ولحدّ ما تنشف منابعها البترولية

وتجف ربوع أراضيها.. الزراعية

وينام الموت.. يتمطع في البرد وفي الشرد

وتعود كل البنايات العالية للأرض

بالجوز والفرد

وينطفي في خدود صباياها

لهيب الورد

ولحد أمّا يموتوا




كل ملوكها ورؤساءها وأمراءها

وولاد أولاد:

كل ملوكها ورؤساءها وأمراءها

ولا يفضل منهم حد

لحدّ الكٌُترة ما تصبح قِلة

ولحد قصور الأمرا

ما تتلطع علي واجهاتها الجلَّة

ولحد الشمس ما تطلع م الغرب

ولحد ما تضني - من غير حرب

كل جيوشنا وعاسكرنا الآنية

وجيوش وعساكر كل الأجيال الجايه

وكل الخلق ف كامل أرجاء الأمة

أصحاب ضمايرها

وقلالات الذمّة

الأغنيا.. والفقرا..

سُراق المال.. والأجَرا

مُحتكري الصحة.. وأصحاب الِعلّة

كلّنا: مِلَّة.. مِِلّة

حنموت.. وولادنا تموت

وولاد أولاد أولادنا تموت

واحنا لسه بنقول عنها:

«الأرض المحتلة»!!



بن اخت الابنودى بيقول :

ليه عايز لها عنوان
----
وليه ياخال عايز لها عنوان
طب أيه لزوم العنوان
مانت قلت كل شئ
وخلاص ضاع مننا العنوان
عامللي قلمك سيف
ولا حتى الزناتي خليفة
وتكتب بدل الحبر دم
كب لو خلص دمك ياخال
مين حيسلفك دم
ماخلاص ماعدش دم
ماحدش بقى عنده دم
مالقضية بقت زي القربة
مقطوعة
من كل نحية
مهوية
ماعدش ينفع معاها لحام
ولا حتى تجيب لها قربة
جرى أيه ياخال
ماحرمتش و مازهقتش؟
ماقلتش نفسي أعيش يومين؟
أعمل لنفسي ولعيالي قرشين
وأقب على وش الدنيا
ماقلتش كفاية وجع قلب
وخلي اللي يتحرق يتحرق
ماقلتش كفاياني هم
و سجون وضغط دم
لكن حاقولك ايه
كلمة أمك وامي
والحيين وإللي ماتوا
أهو الحي بيكاتل
وطول ماحنا عايشين
حنكاتل
انت بتكاتل بقلمك
ودمك هو حبرك
وصوتك يعلا ولا يوطى
الكل في الساقية داير
لقمة العيش همه
هدمة عياله غمه
تعليم عياله
جواز عياله
مش عايز غير بيت يلمه
له عنوان ولا ملوش
أهو عايش كافي خيره شره
والكل مننا في شغله
بيكاتل
زهقنا من الأخبار
تليفزيون ولاجورنال
أخبار تغم وتحزن
مافيها خبر يفرح
والكل بيغني على كله
غنوة مالهاش عنوان
زي قضيتك
وقضيتي
ماهى قضيتك قضيتي
وعنوانك عنواني
ووجعك وجعنا
وجراحك جراحنا
صدقت ياخال
حنروح من غير علمنا
حيجينا الموت
من غير معاد
ولايهموش عنوان
ماهو الموت مايلزموش عنوان
واحنا بنموت كل يوم
وغيرنا بيموت في كل لحظة
ومين يهمه ليه
ناس بتموت وناس هايصة
ومين يدور على مين
ويدور أمتى ولا فين
بقينا أحياء ماشيين
أمساخ
دمي بتتحرك
لافينا حس ولادم
ولا عاد يهمنا خال ولاعم
ناس مهمومه مكلومة
من حقها محرومة
وناس بتكنز فلوس
تشتري النفوس
تدور على المناصب
والسقيفة والهليبة
وبياعيين الهوا في قزايز
ناسيين
ولامش عارفين
الموت مالوش جيوب

أه ياخال
قلبت علينا المواجع
واللي راح ياخال مش راجع
بنبكي عليه من الذل إللي شفناه
بنبكي ياخال على تاريخ بإيدينا كتبناه
وعشان سلام وهمي في يوم وليلة بعناه

أه ياخال
موجوع ومش قادرأصرخ
وإن صرخت
مين ياخال إللي حيسمعني
مين معايا حيشيل همي
علي إدايا شلت لليهود كفني
سبت تاري وشلت عاري
وضحكت على ناسي وعلى نفسي
هاين عليا زي الحريم أولول
وأحط الطين على راسي
رحت ماشي برجليا
أقول سلام وكفني على إيدايا
حكموا فينا الخنازير والقرده
بقينا طوع إيديهم
نشاورهم ونرضيهم
ووقفنا على الحدود نحميهم
ساجنين أهالينا في غزة
عشان تفضل الأرض محتلة

آدي السلام ياخال
بيحرقوا أهالينا في غزة
بيقتلوا إبتسامة بريئة
بيخرصوا النفوس الحرة
بيدمروا الأرض الخضرا

أه ياخال
نفسي أشق خلجاتي
نفسي الأرض تبلعني
دمي في عروقي بيغلي
حدودي عليا مقفولة
أهلي وناسي حابسني
مسدودة باتفاقية وعسكر
والإتفاقية بتحرق غزة
بتقتل أطفالها وشبابها
وشلت إيديا
خرصت لساني
قفلت حدودي عليا
عشان تفضل الأرض محتلة

بنبكي على القضية
ولا النفوس إللي ماتت
بنبكي على الشهدا
على الأبرياء
وإللي إدفنوا أحياء
على الأرض إللي راحت
بنبكي على حالنا
على حكامنا
على الشعوب إللي تاهت
على القضية إللي ضاعت
على غزة اللي بتصرخ
والكل سادد ودانه
وحتى إللي بيسمع
إتلهى في حاله

العيب ياخال لافيا ولافيك
العيب في إللي الخوف
ملاهم
شل إيديهم والدنيا
شغلاهم
نسيوا إسلامهم
ذلوا شعوبهم والقضية
باعوها
ولسه ياخال بتدور على عنوان
أحلى عنوان ياخال
مالقيتلهاش عنوان