بسم الله الرحمن الرحيم


السلام عليكم ( كلكم) و رحمة الله و بركاته


عندى ليكو مسرحية انما ايه .......... تحفة بالفعل .... هدية بعد طول غياب... يا رب تعجبكو...



الزمان... نهايات القرن العشرين ( التسعينات )
المكان... هضبة مرتفعة بالجيزة...
الحدث... بناء هرم للملك (خوفو )
السبب... ثغرة زمانية تسببت فى تبديل بعض الفترات بلا منطق مفهوم... ( لا حول ولا قوة الا بالله )

... العربة الملكية ( مرسيدس شبح بعيون جديدة زيون ) كوبيه , و الملك فيها واقف يراقب عملية البناء و قد وصلت لمنتصفها ...
العمال متناثرون هنا و هناك, و كل يقوم بدوره فى حماس ( لان الملك يراهم ), و اللودرات و الكراكات و الاوناش تعمل بلا كلل فى ضجيج يصم الآذان ( رغم ان المكان مفتوح و الله, سبحان الله )
... الوزير يقف بجوار الملك (خوفو ) عاقدا ذراعيه امامه فى خضوع و عيناه مثبتتان على محيا الملك الذى يبدو عليه الرضا و الحبور.

الفصل الاول...

الملك: انا شايف البنا بيعلا يا ( ام رع ) لكن خايف لاموت قبل ما يكمل...
الوزير : بعد الشر عنك يا مولاى... انا ح اصدر قرار ان العمل يستمر ليل نهار بلا توقف!
الملك: و مين المقاول اللى ماسك المرحلة دى يا ( ام رع) ؟
الوزير : ( المقاولون الفراعنة )يا مولاى...
الملك: بتراجع المواصفات بنفسك ؟... خلى بالك... فيه هرمين وقعوا فى الزلزال اللى فات... هاتكون سنتك سودا لو دا حصل
الوزير : عيب يا مولاى... الهرم دا على ضمانتى... ماتخافش
الملك: طيب, انا مضطر ارجع... الملكة اصرت تروح الكوافير و عاوزانى اخدها من هناك...
الوزير : لكن دى مهمة بسيطة ممكن تكلف بيها حد من الحاشية...
الملك: انت مشعارف الملكة يا (ام رع)؟ دى ممكن تسود عيشتى لو مارحتش... دانتا بتستهبل انت راخر ...
الوزير : مع احترامى لجلالتك يا مولاى لكنى مضطر انصحك...
الملك: تنصحنى بايه يا وزير؟ ؟ ؟ ؟ انطق...!
الوزير : الناس بدأت تتكلم يا مولاى... آل بيقولوا ان المدام ولا مؤاخذة هى اللى متحكمة فى كل شىء... حتى فى الحكم!
الملك: المشكلة ان معاها اوراق تثبت انى اغتصبت الحكم و انى مش الوريث الشرعى للعرش... و سايبة الورق دا عند الحامى بتاعها... يظهر فى حالة وفاتها ولا حاجة...
الوزير : حتى لو الوفاة طبيعية؟
الملك: ايوة... عشان كدا تلاقينى اخاف عليها من الهوا الطاير... و ما استحملش عليها اى حاجة!
الوزير : و اللى يجيبلك الاوراق دى يا مولاى... تديله ايه؟؟
الملك: آآ ... اخليه ولى العهد؟
الوزير : طب و ابنك ( خفرع ) هايبقى نظامه ايه؟؟؟
الملك: يا روح ما بعدك روح يابا... لو عرفت تجيب الورق دا, يبقى تعتبر نفسك ولى العهد من ساعة مامسكه فى ايدى... عن اذنك بقى اصل اتاخرت عالحاجة, اصدى الملكة... ياللا باى...


تشششششششششششششششششششششششش شششششششششش
الارسال انقطع لغاية ما الفصل التانى يبدأ

يا رب تعجبكوا ( كمان مرة) :] :] :]
وسلام كبير مربع مستطيل مكعب مثلث مسدس شبه منحرف.....