بسم الله الرحمن الرحيم



فى حاقدين كتيييييييير بيقولو ان المواصلات العامه بقت عار على مصر

و ان الشبكه بتاعه الاتوبيسات كلها لازم تتغير

من موقعى هذا بقول لا


و اقول لكل الحاقدين ان المواصلات ليها فوايد لا تعد و لا تحصى و منها

1
كلنا ولاد ادم

يص على الناس الى نازله على الاتوبيس

كلهم شعرهم منكوش و هدومهم كانها طالعه من بق تنين مش كلب

و الى نزل بفرده ججزمه واحده و المحظوظ الى نزل بفردتين - مره الفرده الشمال للكوتش طارت فى المعمعه بس جبتها الحمد لله

2
اكتساب الجسم الرياضى

الصفه دى موجوده فى كل المواصلات الحكومى بدايه بالمترو و انتهاء بالاتوبسات و المينى باص

كل الناس بتصدر حراره و دى حقيقه علميه طبعا ان كل الكائنات الحيه بتصدر حراره

و مع مجموع الحرارات دى بتلاقى المكان اتقلب ساونا تركى على اعلى مستوى

يعنى تروح مشوار ساعتين لمده اسبوع تخس 14 كيلو

و ده سر ان كل سكان المعادى معصعصيييييييييييين

3
تنميه الذكاء البشرى و تدريبات الصاعقه

و دى نقطه مخصوصه بطلاب ثانوى و اعدادى

و هى التدريب على الهروب من الكمسرى و انك ترسم على وشك كل الثقه الى على الكوكب و انت بتقوله دفعت او ابونيه

و ممكن تتسلل من وراه و هو بيحاسب الناس

اما فى المترو فالموضوع اصعب لانك لو اتقفشت هاتكع عشره جنيه فورى

الا لو عملت زى واحد صاحبى طلع يجرى و محدش لحقه لحد دلوقتى

ولو في الترماى بص للكمسرري بصة بريئة وقوله بكل حنان المحطة الجاية

و فى اشاعه ان سام فيشر بطل العاب سبلنتير سيل كان بيدرب التدريبات السريه هنا فى مصر على التسلل

4
صندوق الدنيا

فى التوبيس و المترو خصوصا بلاقى كل الناس عماله تجيب فى سيره كل الناس

و تلاقى ولدين قدامك بيقولو انا ظبطت البت و قفشت موبايلها

5
الاسرع و الاقوى

تعليم كل الشعب السرعه و القوه البدنيه فى سباق الركوب فى الاتوبيس

و عشان تلحق تقعد فى ااااااى حته ان شاله على دماغ السواق

و الاقوى انك ترزع الى بيجرى جمبك كتف تطيره - اخدت كتف مره طيرنى 4 متر من باب الاتوبيس

6
اجمل مكان لاظهار لطفك

بانك تقوم من الكرسى الى اخدته بعد صراعات تفوق صراعات طرزان فى الاحراش مع شيتا و تقعد ست عجوزه

و برضه اجمل مكان للتعليق بانك تقوم لبنت مزه

و اجمل مكان تروق فيه نفسه و تقعد راجل عجوز غالبا بيستجدع معاك و يدفع التذكره

و اجمل مكان تستندل مع الشباب الى زيك على طريقه مكان قدامه الكرسى مقعدش ليه ؟؟

7
الاتوبيس مدينه متحركه
يعنى لو ايز استشاره قانونيه انده بصوت عالى

يا جدعان مفيش محامى هنا ؟؟

و طبعا لو عايز دكتور او مائذون او شيخ

او حتى قاتل محترف

كله موجود

عرفتو بقه ان مصر لسه بخير ؟؟

و ان الحاقدين كتير اوى

و مجربوش لذه المواصلات العامه

على فكرة دة اخر موضوع ليا علشان انا قفلت خلاص ولازم اروح اذاكر