يلا بينا نشوف لو عملنا كدا اية اللي هيحصل

1- الكثير منا ينظر بتافف الى اكوام القمامة في شارعه او حيه و يلقى اللوم على الناس ثم يرمى بما في يده فوق اقرب كوم قمامة و ينصرف مستريح الضمير.
* الحل :يجب ان نعلم ان اماطة الاذى عن الطريق فرض على كل مواطن و اذا كنت لا تستطيع ازالة كل كوم من القمامة في بلدك فاعلم انه عليك الا تزيده حتى و لو كان هذا بقشرة لب ,فضعها في جيبك حتى تجد المكان المخصص لها.


2- نشكو في بلادنا من تفشي الفساد و الرشوة و المحسوبية حيث ان من يريد الحصول على وظيفة يجب ان يدفع الرشوة لشخص ما في تلك الهيئة التى سوف يعمل بهاو من يريد ان يبنى عمارة و يرخص ارض يجب ان يرش على الموظفين في مكتب التراخيص ..و الكثير منا يتسائل ..اذا كنت انا الشاب البسيط او المواطن الغلبان استطعت ان اعرف طريق هذا الشخص لادفع له كيف تغفل عنه اجهزة الدولة و تتركه يرعى فيها هكذا كانها تكيه ؟..و الاجابة ان هذا الشخص ليس بالذكاء الذي تظنه عليه لتعتقد انه يخدعهم و لكن الحقيقة هى العكس و هى ان اجهزة الدولة تعرفه بل و تستغلة و تستغل حضرتك ايضاً فهو منذ زمن كان مرتشي على قده و حينما تركوه اصبح حوتاً كبيراً و حضرتك اليوم تدفع الرشوة على مضض ,وحينما يتم تعيينك ستجد ان الملاليم التى تاخذها لا تساوي الآلاف التى دفعتها في تلك الوظيفة و ستجد من يمد يده لك ببضع جنيهات و هو يقول كل سنه و انت طيب و المطلوب منك ان تاخذ و تمضي كام ورقة في الاول هترفض و بعدين هتسلم و تبقي مرتشي صغير و بعدها هتبقي حوت زى اللى انت دفعتله في الاول و بعدها نرفع شعار كلنا يا عزيزى لصوص و حرامية و مرتشين و يبقى ماحدش احسن من حد اذا كنت بتتسرق في بلدك فانت اول واحد بتسرقها.
* و الحل امتنع منعاً باتاً عن الرشوة سواء كنت بتاخدها او بتعطيها و اعرف ان المرض دا زى مصاصي الدماء الاول يتمص دمك من دراكولا كبير لحد ما يجيلك انيميا و تموت و بعدها تقوم من قبرك مصاص دم و تتحول لدراكولا تانى لكن اعرف ان النور هيطلع في يوم من الايام و الشمس هتحرق كل مصاصي الدماء و الصغيرين اللى زيك هيكونوا اول من يتحرق استحمل لو هتموت من الجوع اذا كان الجوع بوجع او حتى بيموت اعرف ان جهنم بتوجع اكتر بس هى مفيش فيها موت و دا اسوأ.


3- انت بتزعل لو حد اخد حقك او جاب واسطة علشان ياخد مكان انت احق بيه و كل واحد فينا بيلعن الواسطة و المحسوبية لكن اول ما حد يدوسلك على طرف على طول تصيح بالعبارة الشهيرة انت مش عارف انا ابقي مين و اعرف مين و اقرب لمين ...احذر انت كده بتتحول لمصاص دماء.بتتحول لواحد من اللي مش عجبينك !!!


4- من غشنا فليس منا تفتكر اللى بيغش في امتحان او بيكدب على حد يبقى ايه!


5- قول كلمة الحق حتى لو على رقبتك و مهما كانت النتيجة هى يعنى موته و لا اكتر.


6- مصر شهدت اول انتخابات تذكر للرئاسة منذ بضع سنوات و لو الذاكرة مخنتنيش اعتقد سنة 2006 و تفتكروا ليه ما قدروش يغيرو حاجة ..لأن معظمهم مكنش عندهم حق الانتخاب لأن محدش منهم اهتم بالانتخابات قبل كده و حتى اللى ليه حق الانتخاب غالباً مرحش لأنه مش معتقد انه ممكن يغير حاجه ...طيب اعمل اللى عليك.


7-كل واحد بيشكو من انعدام الديمقراطية في بلده بينما رسولنا الكريم قالنا كلمة السر كلكم راع و كلكم مسؤول عن رعيته و الآن انظروا معى فالمدير ديكتاتورى في هيئته او شركته ماشي يصرخ و يشخط و مش مدى حد فرصة يتكلم و الاب كذلك في بيته حتى الاخوات مع بعض لازم نلاقي واحد منهم مسيطر على البقيين و محدش يقدر يكلمة و عاملى مركز قوة في البيت ...طيب فين الديمقراطية اللى بنتكلم عنها .


8- كل واحد منا بيشتم في البلد و الشعب و الانهزامية و لكن محدش منا بيفتح فمه لا في حاجة مهمه ولا غير مهمه الست في البيت متقدرش تقول لجوزها لا و الاولاد بيخافو منها و من ابوهم اكتر و الاب في الشغل عارف ان سياسة المدير هتودى الشركه في داهية بس ساكت ,و عسكرى المرور بيكرة الظابط اللى نازل فيه شتيمة و تهزيق و عمرة ما اعترض و بيطلع كل دا على اصحاب العربيات اللى ماشيين في الشارع .


9- اللى لازم نعمله كتير بس قبل ما نغير لازم نتغير احنا الاول و دلوقتى هسأل السؤال اللى كان لازم اساله من الاول يا ترى ناويين نتغير بجد ..لا ..هل احنا فعلاً عاوزين نتغير من اصله و لا المساله مجرد مش لاقيين كلام نشغل بيه و قتنا فبنتفلحس على بعض و نتكلم في السياسة و آل الواد شجيع و ما بيخافش و صاحب رؤية جديدة .
و في النهاية انا عارف ان بعضكم هيقول ان الظروف هى اللى بتخلينا كده و احنا يعنى هنعمل ايه و كلام من دا كتير بس احب افكركم بالمقولة الى بتقول :اذا اردت ان تغير الكون ابدأ بنفسك ...و اعرفو ان النتيجة عمركم ما هتعرفوها الا لو جربتم و اي تجربة تستحق ان نخوضها مهما كانت النتيجة و مين عارف لو اهلنا كانوا جربوا مش يمكن حالنا اصبح احسن بالذمه ايه افضل تجرب تتغير و زى ما تيجى و لا ترمى نفسك في البحر على امل توصل اوروبا يمكن تلاقي وظيفة شحاذ على احد ارصفتها ولا بكبيرك تغسل اطباق في اي مطعم .!!!