هل فعلا الغربة في النفس مش في المكان ؟؟!!

نفسي اعرف انا غربتي من اي نوع

غربة النفس و لا غربة المكان !!!!

الاول سألت نفسي هو ايه الفرق بين النوعين ما كلهم غربة و لكن اتضح لي ان

غربة المكان انا حاسس بيها و ده لاني بعيد عن بلدي و اهلي و اصحابي

بس غربة النفس !!!! هل انا حاسس بغربة النفس ؟

قعدت مع نفسي شوية لقيت ان الموضوع اصاب الوتر الحساس بالفعل ..........

لأن اللي انا فيه و الاحساس بالغربة اللي عايش فيه من يوم ما وصلت... الخليج

و حتى الآن هو غربة النفس و ليس غربة المكان توصلت ان غربة المكان بتنتهي

بعد يوم او اتنين او شهر و لكن غربة النفس هي اللي بتفضل مع الواحد على

طول انا غربتي في قطر انتهت من زمان و لكن غربتي جوه نفسي واضح ان

لسه مشوارها طويل غربتي جوه نفسي بالظبط زي الانسان ما يضل طريقه

جوه كهف في ظلام الليل و لا هو عارف طريقه و لا عارف اخر الكهف ده هيوصله

لايه كتير كنت باستغرب لما الاقي الناس من حوليا مبسوطين و بيضحكوا لغاية

لما دموعهم بتنزل من الفرح مع انهم زي بالظبط بعيد عن بلدهم و الحضن الدافي

و لكن ......النهارده سألت نفسي سؤال في كام واحد فيهم حاسس بغربة زي ؟!

بجد السؤال اللي بأساله لنفسي كتير النهارده اتحول الى لغز كبير ..... ليه انا

لوحدي اللي عاوز ارجع بلدي من تاني ..... ليه انا لوحدي اللي شايف بلدي

عروسة طول الوقت برغم البلاوي اللي فيها اي حد من صحابي بيرجع من مصر

ببقي عامل زي المسجون اللي مستني حد يجي من برة السجن يطمنه على

الحبايب و اول ما اسالة عن اخبار مصر ما شاء الله و لا كلمة من كلامه تسر القلب

كل كلامه عن الغلا و الناس اللي بتموت من الخناقات على العيش و الناس اللي

بتكلم نفسها و ماشية تايه في الشارع كل الناس اللي معانا يقولو الحمد لله اننا

برة مصر بس انا من عبطي لقيت نفسي الوحيد اللي بيبكي على حال مصر يا

ا ترى هالاقي في يوم طريقي و اعرف اخرج من الكهف و لا الكهف اللي انا عايش

فيه هيتقفل عليا لغاية لما اموت جواه ؟؟!!


انا اللي عاوز اعرفه و ياريت الاقي حد يرد عليا ........... هي مصر فعلا تستاهل

الحب ده وهي مصر فعلا بلد الامن والامان يعني الواحد لو نزل يعيش في مصر

هيحس فعلا بالامان علي عيالة وزوجتة ونفسة ومالة ولا دي كذبة انا عاوز افهم

الناس اللي بتكتب في سلبيات مصر مش بتشوف اي ايجابيات لمصر ؟؟

النت كلة بقي كليبات ومواضيع عن سلبيات في مصر و لقيت عرب بيردوا

و يشمتوا في مصر و طبعاً العرق المصري بيطلع في اللحظة دي ولازم ارود

على العرب اللي بيتريقوا اللي عاوز اسأله مين اللي فتح سكة التريقة

و الشتيمة ؟ العرب ؟ و لا احنا ؟ اظن احنا السبب الشعب والحكومة اللي

بهدلتنا جوة وبرة وهنا في بلادنا علشان كدا هنا علي الناس كلها وبقينا

ارخص شعوب الارض للاسف يعني نتغرب ونسيب مصر علشان البهدلة

وعلشان الواحد يحسن وضعة مفيش فايده برضوا...

انا عايش في دولة عربية فيها ايجابيات و فيها سلبيات بس عمري ما شفت

واحد مواطن بيشتم في بلده حتى لو مش لاقي ياكل لانه على فكرة هنا

برضه فيه ناس الفقر هيقتلها و مواطنين بس بيحبوا بلدهم و علشان كده

اجبروا الجميع على حبيها واحترمها واحترام قوانينها هنا محدش يقدر يخالف

كلة بيحترم القانون عرفين لية علشان مفيش كوسة ولا رشوة كلة واخد حقة

امتي بقي نكون زي البلاد دي اللي قامت من كام سنة بس وسبقتنا بسنين

وفعلا ان لم تتقدم تتاخر وده اللي حصل لمصر فضلت وقفة مكنها لحد ما كل

الدول سبقتها معلش انا طولت عليكم اصلي خلاص راجع مصر الصيف ده

وناوي استقر فيها بعد غربة 9 سنين وخايف من القرار ده خايف يكون

غلط نفسي ارجع وخايف.