السلام عليكم

موضوعى الاسبوع ده هيكون بعنوان

احنا بنتعلم ليه ؟ وبنتعلم ايه .... حوار ونقاش

اكيد مفيش حد راضى عن نظام التعليم فى مصر ولا فى اى دوله عربيه على ما اعتقد
لانه بمنتهى الصراحة .... نظام فاشل

واسف انى قلت انه نظام اصلا فلا يرقى لان يعتبر نظاما بل فوضى بلا هدف ولا معايير

تجربه شخصية :

من نعومة اظفارى و 90 بالمائة من حياتى تدور حول العملية التعليمية وما حولها
المرحلة الابتدائية طالب متفوق بيطلع دايما الأول على الفصل وليه ترتيب على المحافظة وكان ساعتها مبسوطه جدا .... ليه؟؟؟ لانه مش فاهمه حاجه لسه

المرحلة الاعدادية نفس نمط النجاح ولكن بفرحة اقل بكثير .....ليه ؟؟؟ ابتدى يفهم شويه وياخد باله ان كتير من اللى بيدرسه واللى بيضيع فيه وقت مالوش معنى ولا ليه لازمة وان عشان تفضل متفوق لازم تكون حفييظ درجة اولى ومش قوى يعنى انك تكون ذكى او بتفهم

المرحلة الثانوية (الطحن)

مرحله مفيش وقت غير انك تفكر فى المجموع وحرب نفسية وتوتر فى البيت وناس بتنط من البلكونات وناس بتموت نفسها وناس بتتجنن .... حاجه تجنن

فرحة اكبر من الاعدادية لان كان ليها قيمة بالنسبالى ...... هييه هبقى دكتورة ( يا فرحتى)

سنيين الكليه والصدمة

مش عارفه ليه عاوز ةاقول ....

يا حلوتك يا استفندى يا ابن عم البرتقان (بالنون مش باللام)

اصلها كلها واحد دكتور والا مهندس والا تجارة والا حقوق والا حتى دبلون (بالنون برده مش بالميم)

المهم دلوقتى والمطروح للنقاش

ايه اسباب فشل النظام التعليمى فى مصر وفى الوطن العربى بشكل عام
ايه ممكن تعمله عشان تطلع بأقل خساير
هل هتعلم ولادك زى ما انت اتعلمت والا هتختار سكه تانيه وهل هتقدر تنفذها؟؟

مثال لخطة : هدخلهم مدارس لحد اعدادى اهو يبقى عرف الاساسيات وبعد كده دراسه حره 3 سنين فى مجال الكمبيوتر مثلا ( اقل من تكلفه 3 سنين ثانويه عتمه بكتير طبعا مع الدروس الخصوصية)

هيبقى معاه شهاده اقوى بكتير من شهاده بتاع هندسه اللى لسه هيتخرج بعد 5 سنين
وفى الخمس سنين دول يبتدى يشتغل ويكمل دراسه حره يعنى بعد ما تعدى الخمس سنين هيكون معاه دكتوراه بجد من اى جامعة اجنبية حتى لو بالمراسله يعنى بقى عنده مثلا 23 سنه وهوه معاه دكتوراه

ده حلمى اللى كان نفسى يكون طريقى بس ابتديت متأخر قال ايه بعد ما بقيت دكتور
ان شاء الله اقدر اشوف ده فى اولادى


انت وانتى بتفكرى فى ايه وناويين على ايه ؟؟
وما تنسوش الاسئلة اللى فوق
ايه اسباب فشل النظام التعليمى فى مصر وفى الوطن العربى بشكل عام ؟
ايه ممكن تعمله عشان تطلع بأقل خساير؟
هل هتعلم ولادك زى ما انت اتعلمت والا هتختار سكه تانيه وهل هتقدر تنفذها؟؟


فى انتظار مشاركاتكم