أعمل إيه .. ؟
كل باب بخبط عليه .. !
والضلوع زى جدران السجون
خلفها .. مخلوق غبي مخلوق عنيد
عمال بينطح في الصخور
وأعمل إيه .. في الهويس .. ؟
كلنا بنموت فطيس
والعنيد مش مآمن .. !
فاكر إنه قبل ما يعدي الهويس راح يقول
راح تقول إيه يا عنيد .. ؟
عمر ما هتقول جديد
الحديد طول عمره راح يفضل حديد
والعبيد راح يفضلوا دايما عبيد
وإنت عبد ..
عبد الشهوة عبد المجهول البعيد
إنت عبد الماضي
عبد لخوف ملهوش حدود
إنت عبد .. عبد .. عبد
عمر ما هتوصل لسيد
سيد ده إيه .. !!
سيد لإيه .. ؟؟
سيد عواطفك ..؟
سيد لضعفك .. ؟
سيد ظنونك .. ؟
سيد شكوكك .. ؟
سيد لمرضك .. ؟
سيد لعرضك .. ؟
ولا حتى بس إسمك .. ؟
صغتهم .. ؟
عرفتهم .. إلا بعد ما كنتهم .. ؟
فوق يا شيخ
ده إنت ما تساوي ولا جناح بعوضة
والحكاية كلها حكاية عريضة
مبهوأة .. ومزوأة
زوقوها بالسفن عبر الفضا
نسيوا إنك بكرة راح تصبح هباء
إنت مسجون جوه لحمك
جوه شحمك
والقدر كاتب عليك تحفظه
وتلظلظه
وتخاف عليه لتبوظه
علشان ده عهدة يا هباء
هتسلمه بعد الفناء
لدود هناك مستنظرك
عمره ما يوم هيقدرك
مهما تكون
نفس السكون
بكرة يخيم ع المكان
وعشان كدا لازم تفوق
إنت عبد .. عبد .. عبد
ومهما كنت حاجة واحدة هي بس تكبرك
وتخلي قلبي يقدرك
عبد الله .