انت ممكن تكلم نفسك ..... تكلم الحيطة او الكرسى ..... بس المرة دى شطحت بدماغى حبتين


النجع : يالهوى كل دا بوز :]

انا : مخنوقة ومليش نفس اعمل اى حاجة

النجع: طب همشى دلوقت انا مش ناقص وجع دماغ ورغى بقى

انا: مبهزرش بقى انت هتقعد غصب عنك تسمعنى واطلع زهقى فيك

النجع: طب ارغى

انا : بجد انا مليش نفس اعمل اى حاجة لا عايزة اكتب مواضيع ولا ارد ع الناس عمالة اتفرج وبسسس

النجع: مش لازم , انقلى مواضيع وهاتيها هنا

انا : ياراجل بقى انت اللى بتقول كدا .. وبعدين ما كل الناس بتنقل وايه الجديد

النجع: حيرتينى خلاص اكتبى من دماغك العبقرى

انا: تصدق انت خنيق بقولك م الصبح مليش نفس مفيش افكااااااااااااااار , مش عايزة افتح مواضيع ونقاش
وحتى لو فتحت الناس مش هترد

النجع: اها قولى كدا بقى , انتى خايفة ع الردود

انا: وايه المانع ما كل الناس بتهتم بالردود وبنزعل لما نلاقى المشاهدات كتير والصفر منور جنب الردود
وكمان من حقى بعد اما اعمل موضوع واتعب فيه الاقى تقدير للتعب دا

النجع : وفكرك القيمة كلها ف كام رد ورا كل موضوع , متعرفيش ان فى حاجات تانية اهم واقيم بكتييييييييييير

انا : زى ايه يا فيلسوف

النجع: مش يمكن الموضوع اللى تعمليه بضمير دا وتحطى فيه كل تعبك , ومتلاقيش ولا رد بعديه يكون سبب ف دخولك الجنة
انتى مش متصورة ان المعلومة اللى بتحطيها ممكن تعلم ناس تانية , تكون سبب ف هداية ناس شافو موضوعك بالصدفة
ناس غير اللى انتى مستنية منهم الشكر وكام رد , ناس ممكن تدعيلك بجد , هيستفادو بكام كلمة ممكن تكتبيها
وانتى بجهلك متصورة ان الحكاية موضوع وكلام شكر وخلصت ع كدا

انا : بس الدنيا كلها كدا

النجع: يبقى الدنيا كلها غللللللللط , لازم نصلح نفسنا بقى , مش كل حاجة نعملها تبقى عشان تعجب الناس
حراااااااااام عليكو اعملو اى حاجة عشان رضا ربنا , حتى ولو كان موضوع ف منتدى صغير
ليه بتستخسرى تكتبى مواضيع , بخيلة بعلمك انتى اكيد عارفة حاجات غيرك مش عارفها ما تعرفيها للناس
خليهم يتعلمو معاكى حطى ف نيتك ان الموضوع دا صدقة جارية يتكتبلك ف ميزان حسناتك

انا: تصدق كلام مظبوط , انا ان شاء الله لما الاقى حاجة تستاهل واحس انها مفيدة مش هتردد وهجيبها علطول
الناس ترد بقى او متردش مش مهم

النجع: وكمان استنى هناااااا /mr47 , انتى بتقولى انك ملكيش نفس تردى ع حد يعنى انتى كمان
بتشوفى مواضيع ناس تانية وبتتجاهليها , ويعنى هم اللى متعبوش ف الموضوع زيك

انا : والله ع حسب المزاج :], ساعات اكسل اقرا الموضوع للاخر واطلع منه واسيبه , وساعات ارد الردود اياها اللى انت
عارفها دى , انما فى حتت تانية بقى مش بدخلها خالص

النجع: ومش حرام عليكى , ماهم طبعا لازم ميردوش عليكى ,عامل الناس بمثل ما تحب ان يعاملوك به
وانتى مش بتعبريهم مستنية ايه يستنوكى ع باب الركن ويعملولك حفلة

انا :حفلة ....... طب وانا اعمل ايه انت مش حاسس بنفسك فيك كام ركن

النجع: وانا قولت تدخلى كله ف يوم واحد , كل يوم كدا خشيلك ركنين تلاتة من المهجورين واللى الناس كلها سيباهم
خشى ردى ع الناس هناك قدرى تعبهم برضو مفيش مانع من كام موضوع زى ما قولنا لازم يبقى فى شوية دم

انا : ..... نص كلامك حلو والباقى دبشششششششش

النجع : ماهو من عمايلك , عارفة لو عملتى اللى بقولك عليه دا هتبقى زى الفل :] :]

انا : والله هو كلام كويس وان شاء الله عمره ما هيضر ... بس انت عارف انا مش هتكلم معاك تانى
هروح اتكلم مع الكنبة ولا الكرسى ارحم ع الاقل لسانهم مش طويل كدا

النجع : يبقى احسن , انا ناقص يجيلى نجعاوى تانى من عينتك يجيبلى صداع
هو انا فاضيلكم , مش كفاية الهاكرز اللى جابو صحتى ف الارض

انا : الحق عليا انى عبرتك اصلا , وادى الموضوع اهو هقفله خالص ومش عايزة اعرفك بعد النهاردة

النجع : ليه بس ما انتى قاعدة شوية :] :] , اما نجعوية مخها لاسع صحيح