هذه القصيده له أعتبرها قصيده فوق العاده. قصيده خارقه و تذاع يوميا و على مدار الساعه من "شقلبان ، محطة إذاعة حلاوة زمان" لصاحبها الفاجومى
أيها الساده جاءنا البيان التالى: ( بالمناسبه بمجرد أن تسمع "جاءنا البيان التالى تعلم فورا أن هناك كارثه)

بيان هام

هنا شقلبان

محطه إذاعه حلاوه زمان
من القاهرة
ومن كردفان
وسائر بلاد العرب
واليابان
ومن فنزويلا
وايضا ايران
ومن أي دار
او بلد مستباحه
بفعل السياحه
مع الامريكان
هنا شقلبان
محطه اذاعه حلاوه زمان
نقدم اليكم بكل اللغات
مراسح وسيما وجميع الفنون
صحافه ومنابر
وتليفزيونات
وخطبا ف جوامع
وجبنه وزيتون
ونفتح ونركب جميع الموجات
ونبحث ونفهم
فى كل الشئون
ودايما نلعلع فى كل الحالات
ولا حد سامع
ولا يحزنون
وتسمع ما تسمع
دا ما يهمناش
لان إحنا أصلا
بناكل بلاش
فخليك فى نفسك
وما تخليناش
نسلط عليك القلم
واللسان
هنا شقلبان
محطة اذاعة حلاوة زمان
يسر الاذاعه
وما يسركوش
بهذي المناسبه
وما بندعيكوش
نقدم اليكم
ولا تقرفوش
شحاته المعسل
بدون الرتوش
شبندر سماسرة بلاد العمار
معمر جراسن للعب القمار
وخارب مزارع
وتاجر خضار
وعقبال أملتك
أمير الجيوش
ما تقدرش تنكر
تقول ما أعرفوش
ما تقدرش أيضا
تقول ما أسمعوش
شحاته المعسل
حبيب القلوب
يزيل البقع
والهموم والكروب
ينفس
يا فين
يبلع حبوب
ويفضل يهلفط
ولا تفهموش
وتفهم ما تفهم
دا ما يهمناش
لان إنت فاهم
وعامل طناش
ح تنكر وتحلف
ح أقول لك بلاش
ح تتعب دماغنا
وتتعب كمان
هنا شقلبان
محطه اذاعه حلاوه زمان
لان المخبى ظهر واستبان
وكل المسائل
بدت للعيان
وطلعت حكاوي
ونزلت كمان
عن التهريبيه
وعن كيت وكان
وعن محسوبيه
وعن العبان
ظهر فى المدينه
كانه الطوفان
وغرق مراكب
وسوح غيطان
وبعض المراكب
ح تغرق كمان
وازمه مساكن
وازمه امان
وعالم بياكل
فى عالم جعان
وريحه مؤامره
فى جو المكان
مخطط خيانه
مع الامريكان
لدبح العشيره
وحرق الجيران
وفيه ناس بترغي
ولازم بيان
كما ابلغونا
جميع الودان
لهذا وذاكا ... وتكلم كمان
نقدم اليكم
عروسه وحصان
شحاته المعسل
وهذا البيان
هنا شقلبان
محطه اذاعه حلاوه زمان
بسم الله
سلامٌ عليكم

وسلمون وموز
واما المسائل
فهنجف ولوز
فيا اخوتى
ويا اخوات
اليكم بيانى
كما هو ات
جميع المسائل
تمام التمام
وكل الكلام دا
مجرد كلام
فصيرا جميلا
ولا تقلقوش
وشغل الضغاين
انا ما اقبلوش
ما فيش أي حاجه
على الطلاق والعتاق بالتلاته
ما فيه أي حاجه
وقدر كمان ان فيه أي حاجه
ما فيش أي حاجه
ما لوش أي لازمه الكلام
واللجاجه
وعيب ان عيل يسوق السماجه
ويعمل ديباجه
انا بطبعي ضد السماسره الكبار
بحكم المنافسه
وحكم الجوار
لكن مش ف طبعي
انى اعمل فضيحه
لواحد زميلي
هبش كام صفيحه
ما كل الزمايل
بتهبش صفايح
وكل اللي جاي
مش زي اللي رايح
فيا ايها الشعب
صهين تفعلص
مساء التنفس
مساء الروايح
اخويا الامير بزرميط الايرانى
بعت لي السنه دي
عزمنى ودعانى
انا قبلت طبعا
ورحنا العزومه
وكانت وليمه
ما تحصلش تانى
دا ايه المحمر
وايه المكمر
وايه المشمر
وايه الصوانى
انا دماغى تعبت
ولفت صراحه
من الفخفخه
واهنا الاصفهانى
هناك يعنى مثلا
اذا شربت طافيه
تمز بكوارع
وبسطرمه ضانى
ما شفتش هناك
ناس بتحقد عليهم
ولا ناس بتشتم
فلان الفلانى
لانه اشتري عزبيتن
من شطارته
وحكمه ادارته
وطلع مبانى
وبعد الوليمه استلمنا الهدايا
مفضض
ومدهب
وقز وقيشانى
وطبعا اخويا الامير
قال لى حاجه
ح اقولهالكو طبعا
اذا الوقت ناسب
ح يطلع لى عيل
بدون أي حاجه
ويعمل لى فلحس
ويقعد يحاسب
دا حقد اشتراكى انا ما اقبلوش
ولو هوا ابنى انا ما اعتقوش
كلام عن سماسره
كلام عن دعاره
حاجات مش صحيحه
جمل مستعاره
وعايزين يخلوا البلد
اردغانه
وعايزين اسيب البلد
من زمان
وانا مش ح اسلم
واسيب الامان
ولابالبوليس والنيابه كمان
فيا ايها الشعب
كمل جميلك
وصبرا
واذلم حتيجى المصاري
وتاكل وتشرب
تبع ما ياتيك
وتغرق فى بحر العبيد والجواري
وترسم حياتك
حسب ما يرائيك
وتملا الحواري
فساقى وقصاري
تسبح بحمدك
وتشكر جميلك
وفضل الزباله
وطفح المجاري
ختاما سلاما
واخر كلاما
ضرورا
يسود الهدوء والوئاما
فماذا والا
ح اطربقها واللا
اهرب فلوسي
واسافر قواما
سلام عليكم
وسلمون وموز
بصفتى رئيسا
وابا
وجوز

للشاعر: أحمد فؤاد نجم
__________________