السلام عليكم ورحمة الله وبركاته


(رئيس الوزرا جاي)


والله ما عارفة ابدا كلامي منين

حكاية طويييييييييييييلة، بدات وانتهت بالنفاق والظلم والزور

رئيس الوزراء وبعض من السادة الوزراء شرفو عندنا

قبل ما ييجو هكتفي بس بذكر بعض اللي حصل في الحي

علشان لو فتحت من هنا للصبح وربنا مش هخلص

المحافظ نبيل العزبي كان كل شوية بينطلنا، ياااااااااااااااااااااه رصف ايه ونضافة ايه

صناديق الزبالة القديمة اتشالت واتحطت صناديق من نضافتها كان متهيا للناس الغلابة انها ممكن تاكل فيها

عربيات حاوطت الجزء الكبير اللي نضفوه وجهزوه واللي بيضم شارعنا على انها عربيات نضافة مطورة، لكن كان نوع من انواع الزور علشان يدارو العشوائيات وبيوت الناس الغلبانة

كان ييجي المحافظ من 12 في نص الليل ل 3 الفجر يشرف ع اللي عملوه العمال طول اليوم، مصدقتش اللي بيتقال عنه غير لما سمعته بيهين احد العالملين بابشع الالفاظ تحت بيتنا، الفاظ لا تتخيل انها ممكن تطلع من محافظ

كانت الناس تيجي تنشر الغسيل، تلاقي واحد واقفلها "ادخلي يا ست مفيش تنشير دلوقت"
واللي منشر "شيل الغسيل ده من هنا"

يااااااااااااااه وتسمع العجب

"الستارة دي شكلها مش حلو شيلوها"

والله العظيم انا لولا عشت في الموقف نفسه مكنتش صدقت اللي بيحصل ده

ده لدرجة ان في ناس مش قاعدين في بيتهم وسايبين دولاب قديم في البلكونة كانو عاوزين يطلعو بسلم مطافي بيتهم وهم مش قاعدين علشان يشيلوه

يييييييه والعمارات بيضوها، وعواميد النور، حتى الشجر، يكفي اني اقولكو انهم اختارو بيت واحد معين وقالوله جهز نفسك علشان لو رئيس الوزرا طلب يدخل بيت هنجيبه عندك، بيت جميل طبعا مختاروش كدة وخلاص، علشان يبقى كله تمام

وحاجات كتييييييييييييييييييييييي ييييييييييييييييييييييييي يييييييير والله مهما اقول مش هوصف المنظر دلوقت

والحالة دلوقت اني لسة صاحية من النوم، على صوت زغاريد وعربيات ياما واغاني وطنية ماللي يحبها قلبك ياااااااااه

وبطل من فوق بقى لقيت احمد نظيف البدر المنتظر ومعاه حاتم الجبلي ويسري الجمل ومسئولين كتير
ده حتى واحد كان تملي تحت بيتنا واقول مين ده وشفته فين اتاريه عميد كليتنا

وست نازلة تلف وتقول يلا يلا بصو من الشبابيك وزغردو، والله هذا ما حصل

والارض بقى مفروشة سجاجيد


وخلاص الزيارة انتهت، عشر دقايق ومشي اطمن ع الناس الغلابة ومشي، كله تمام

بصيت لقيت الناس انتهزت الفرصة وجريت تجيب عيش م المخبز اللي كان فيه

ولقيتهم طالعين بالعيش مش عيش ماللي انا عارفاه لا حاجة كدا في حجم البتاو عارفينه؟ وشكله تقول كدة بيتزا او فطيرة وربنا

ولقيت بقى المفاجاة

العمال البساط بتوع المخبز، انا اعرفهم افقر ناس في الحي، كانو دايما ييجو بالجلبيات الاغنيا منهم، والبساط كانو بيلبسو لبس ياعيني مبهدل بيخبزو ويعجنو بيه
ابص الاقيهم خارجين بيونيفورم ابيض ولابسين جوانتيات بقى وطواقي بيضا وطالعين يضحكو

خلاص مشى الضيف الغالي، وشالو السجاجيد، ومشيت العربيات اللي بتترص من اسبوع علشان تكتم نفس الناس الغلابة
حتى صناديق الزباله هياخدوها
وخلاص هننشر الغشيل براحتنا
والاولاد هيطلعو يلعبو في الشارع، بعد ماكانو هيضربوهم وهو موجود لما حبو يطلعو يتنططو قدامه، علشان شكلهم ميسرش، شكلهم ناس غلابة

كله تمام يا باشا، كله تمام يا باشا

متقولش ايه اديتنا مصر قول هندي ايه لمصر

ياااااااااااااااااااااااا ااه انا مخنوقة بجد ومش لاقية كلام اقوله والله والعظيم

يمكن مخرجتش الموضوع زي ماحصل، لكن ملقتش غير هنا افضفض فيه شوية

ودلوقت هرجع انااااااااااااااااااااااا ااااااااااااام تاني بقى علشان متخنقش اكتر من كدة

والله العظيم الناس عندنا مش لاقية تاكل

صدق اللي قال لو نهر النيل صلصة ميكفيش كوستك يابلد

حسبنا الله ونعم الوكيل

حسبنا الله ونعم الوكيل