السلام عليكم

هكلمكم النهارده يا نجعاوية عن السب بالدين اه ايوه السب بالدين , الموضوع دا مهم اوي

خصوصا ان الدين دا هو كل حاجه يعني انت من غير دين زي الانعام كدا مالكش فايده

وفي الاخره هتتشوي ان شاء الله


نرجع للموضوع اللي هو السب بالدين

هقولكم قصص اقروها واحكموا بنفسكم

اتنين من اصحابي بيتناقشوا في مسأله فقهيه عسره

قعدوا يتناقشوا بتاع ساعتين في الموضوع ودا مصر على رأيه ودا مصر على رأيه لحد ما

سخنوا اوي في النقاش – الكلام دا كله في الشارع –

وقام واحد قايل للتاني والله العظيم انا ممكن اسبلك بالدين في 3 دقايق

قام التاني قايل وانا يعني معرفش اسبلك طب يلعن تيييييت والتاني رد بدينين

وانا واقف مستغرب جدا لسببين

الاول : هو السب بالدين سهل اوي كدا ليه

التاني : - ودا اللي شغلني اوي – اشمعنى في 3 دقايق بالتحديد

ولغاية دلوقتي معرفش



وبعدها عادي بقى محصلش حاجه واتصالحوا في ساعتها والدين فضل مسبوب ...

الغريب ان الحوار كان فقهي ووصل لانهم خرجوا من المله

لا والغريب ان كتير اوي ممكن يسمع واحد بيسب بالدين ويسكت انما لو شتمت عمرو خالد

ولا حتى تامر حسني تلاقي القيامه قامت

هو البشر اغلى عندنا من ربنا خلاص ؟!

اذكر مثلا – اني في رمضان وانا راكب المواصلات والسواق ماشاء الله

مشغل قرآن وحاجه فل ولسه صاحين وفجأه واحد كسر عليه بموتوسيكل ..

قام السواق سابب له بالدين وشاتمه بامه ونزل له وكانت حاجه تمام اوي

اللي غاظني اني مشغل قران ,

المهم الراجل اللي جنبي في الميكروباص ماستكتش

اتنرفز وقام باصصلي وقايل : طب هو كسر عليه , ايه ذنب الدين تؤ ... طب بيشتم الدين ليه دلوقتي

هو الدين عمل له ايه – الكلام دا ليا انا – وانا كالعاده مستغرب كالعاده وبقول في نفسي

وانا مالي بالذات جاي يقولي طيب ما يقول للسواق !

اتحكالي مره ان واحد راجل كبير سمع عيال بيسبوا بالدين في شارع قريب من هنا - هنا اه عندي -

قام طالع لهم وقال لهم ما تسبوش الدين يا ولاد تتتت التتتتت بجد حاجه مهزله بمعنى الكلمه

والانيل من كدا ووالله ده حصل واحد كبير في السن راجع من الحج بيسالوة اية يا حاج اخبار الحاج

اية قلهم جميل ربنا يكتبها للي عاوز بس متعب قوي الواحد علي ما نزل من عرفة كان طلع .... امة

لا وعاوزين يسترها معانا وبنقول مش عارفين ربنا غضبان علينا ليه

ما نص البلد بيسبوا بالدين

طبعا قياسا على كدا اخوانا في بلاد الشام بيسبوا برضو

عمر ما كان السب بالدين له لهجه وانا سمعت كتير

الجميل ان ثقافة السب بالدين دي ما وصلتش الخليج لحد دلوقت

- انا قلت كلمة سب كتير لدرجه مغثيه , صح ؟ –

والجمل الاعتراضية اكتر من الكلام نفسه - حظكوا كدا اعمل ايه -



المهم بقى


لما تشوف واحد بيسب بالدين تعمل ايه الاصح عشان تعلم اللي قال ان كدا غلط

وفي نفس الوقت ما يتلعنش اللي جابوا ولا بلاش اكمل


منتظر ردودكم