بسم الله الرحمن الرحيم

السلام عليكم ورحمة الله وبركاته


الموضوع وما فيه .. هو ليه احنا بنتعامل كده جوه بلدنا اكيد فاهميني طبعا .. انا بشوف حاجات غريبة جدا بتحصل يعني

اي بلد في العالم في نوعين من الناس مواطن وده بيبقي درجة اولي .ومقيم وده بيبقي درجة تانية مهما كانت جنسيتة


لكن في مصر الوضع مختلف تماما المقيم هو اللي درجة اولي مهما كانت جنسيتة والله الواحد اتخنق من الموضوع ده

اذا كان برة مصر بيعاملونا على اننا ناس درجة تانية يبقى احنا جوة بلدنا بنتعامل ليه احقر من برة بلدنا بجد الموضوع


ضايقني جدا تشوف واحد سايح مايستاهلش شلن .. وراه كام عربية شرطة وكام عسكري ونوسعله الطريق وانت تقف

على جنب .. وحتى متحاولش تبص عليه لجان تفتيش في كل حتة تقولش رايح تفجر حاجة .. ويا سلام لو قلت انتو


بتفتشوني ليه .. يا سلام بقى مش هقول لكم مرة زمان وانا صغير اتجننت في مخي انا وكام واحد من اصحابي وقلنا

نروح الهرم وضربنا المشوار من اسكندرية للجيزة قال اية علشان نشوف الهرم واول ما وصلنا وعند البوابة قبلنا واحد


ضابط ( محترم ) قال في فوج سياحي جوة مينفعش تدخلوا شفتوا المهزلة والله من يومها حلف وقلت لو الهرم جة

اسكندرية مش هروح اشوفة وفعلا لحد دلوقت مشفتوش ولا ناوي هو في ايه .. ليه كده يعني .. هو للدرجة دي


المصريين بقو وحشين كده طيب هو العيب فينا فعلا .. ولا العيب في ايه هو احنا اصلا كده .. يعني نستاهل كل

ده فعلا .. يا جماعة حد يفهمني والله انا بجد مندهش من اللي بيحصل ده هل هيوصل بينا الحال كمان شوية


اننا ممكن نخدم الاجنبي اكتر من كده داخل بلدنا بس بجد انا مضايقني الوضع ده جدا واحب اقول لكم اني والله

مش بقول كده ناقم على حد او حاجة انا بحب البلد دي اكتر من نفسي لكن بردو مش بكون مبسوط لما اتهان


علشان واحد في نظري ما يستاهلش بصلة والله يمكن البصلة تساوي عنه كمان عموما انا خلصت اللي عندي

ومش عارف بقى انتو هتقولولي ايه

سلام