كابينه ( 1 )

الو وحشتينى يا عمرى

يا كل سنينى يا قمرى

انت دايما كده تسرقنى بالكلام

وحشتك وانا كنت معاك قبل ما انام

يا روح قلبى ذنب قلبى مش ذنبى

انتى بتوحشينى وانتى لسه جنبى

ياترى النهارده اى ظروفك

اصلك وحشانى موت وعايز اشوفك


كابينه ( 2 )

الو ازيك يا ابنى

تعبت فى غيابك والهم صابنى

الو ازيك يا امه

وحشتنى الصحبه واللمه

وتعبت من البعد فى الغربه

وحشنى اكلك والملوخيه والشربه

بدعيلك يابنى وكل ليله بحلم بيك

وحشتنى الحيطان والببان والشبابيك

ادعيلى دايما وانتى بتصلى

هو ده اللى على طول بيوصلى


كابينه ( 3 )

عطلانه دايما على طول

بيدخلها عم احمد يفطرطعميه وفول

ينده عليه الزبون ايوه انا جاى

ويخرج وفى ايده كبايه الشاى

عم احمد ده راجل بركه

عارف اسرار الحته وكل حركه

الكل بييجى هنا ويتساهر معاه

ناس طيبه بتشوف الواحد من جواه

ناس لسه تعرف الاصول ومتعديهاش العيبه

ناس مش بتجيب سيره الناس فى الغيبه

وتعيش الاسرار وتموت مع صاحب السنترال

وفى ناس بتنشر اسرار الناس فى الجرنال