الصبح .. واليوم كان تلات

والدنيا لسة سكات سكات

جاني الخبر .. أبويا مااااااات



سكت اللي كان ..

صوته بيملا البيت حنان

غاب عنا في ساعة زمان

لا عاد يدق بكفه تاني على البيبان

ساب بس صورته ... ف القلوب وع الحيطان


فاكره انا ..

في الفجر صاحي بيقرا ف كلام ربنا

ناسي همومه وعمره مانسيش همنا


فاكره أنا ..

أيام ما كانت قاعدة حلوة تضمنا

يضحك لنا .. ..

ونحس قلبه كبير يجمع شملنا


فاكره أنا ..

وولاد ولاده معاه بينسى هو مين .. ؟

ولا يبقى فيه فارق سنين

يضحك ويلعب زيهم

لأحن صدر يضمهم

ويحسوا وياه إنه صاحب

مش بعيد عن سنهم


فاكره أنا ..

وإن كان بقى لبعده يوم ولا سنة

يفضل لساني تملي يدعي ربنا

يكتب له عمر جديد

في جنات الهنا
.



نسألكم الدعاء لأموات المسلمين