لو خيرونى لأعيش

فى كوكب المريخ

لا حرب ولا ضرب

ولا دبابات ولا صواريخ

ولا طفل بيموت قدام عينيك

ولا منظر مظلوم يصعب عليك

ولا ظالم ولا حاكم ييجى عليك

اعيش لوحدى بين الصخور

متفرقش الظلمه من النور

بس الاسم هعيش مستور

هحكم على عالم هو (نفسى )

وهلغى من قاموسى كلمه الدستور

بس امشى من هنا واغور

اى مكان القاه امان

هيبقى وطنى وبلدى

هزرع ارضه حب

ومستناش المحصول

واحمد ربنا على النعمه

لو حتى هعيش على الفول

ولا تلوث ولا صراعات ولا احزاب

ولا سياسه ولا مجالس ولا نواب

هقفل على نفسى الباب

انا هرجع اعيش انسان بدائى

مش عايز اكون فدائى

وهعمل لذاتى مملكه

هسميها مملكه كبريائى

مش هتعب من الوحده

عشت وحيد بين الناس

ضغط وقولون ومعده

من يوم اعدام الاحساس

يادوب ميعاد السفر قرب

الحق بقى اقوم انام

من النهارده خلاص هتغرب

هسافر بس فى الاحلام