مجتمعنا المصري مجتمع ودود جدا يعني لو ماشي في الشارع وقبلت حد كنت تعرفه لازم تقف وتسلم عليه ولو موقفتش تسلم عليه تعتبر دي اهانه في حقه وان انت شفته وطنشته ويزعل منك هي فعلا رخمه

المفروض ان الناس بتسلم ع بعضها باليد ولو بينهم مشاعر جامده بيشدوا ع ايد بعض ولو غايبين عن بعض من فتره كبيره بيكون في احضان وسلامات وحاجات كتير كده

بس دلوقتي الوضع اتغير خالص ابقي مع صحبتي في الكليه طول النهار وبليل ع النت والتلفون يعني بنزهق من بعض بجد لحد ما ننام وتاني يوم الصبح اول ما نشوف بعض نسلم ع بعض ونبوس بعض كاننا غايبين عن بعض من 10 سنين لا اله الا الله يعني وحشتنا بعض في 6 ساعات اللي نمنا فيهم دول واللي كنا مع بعض في الحلم كمان تلاقينا نروح عند الاتوبيس وكله واقف حوالي 15 واحده من اصحابي واقفين ولازم اسلم وابوس اسلم وابوس ع الصبح كده قبل ما افطر كمان ابوس ع الصبح كده

يا سلام بقي لو نسيت واحده من غير ما ابوسها يبقي يوم مش معدي ازاي انا مبوستهاش لازم ابوسها
ونرح الكليه اصحابي في القسم لازم اول ما ادخل اسلم وابوس وطبعا طول ما انا ماشيه في الكليه كل ما اقابل حد من اصحابي اسلم وابوس اسلم وابوس لحد ما ربنا يكرمني واوصل المدرج في الدور الخامس بيكون نفسي انقطع من السلم طبعا
ونقضي اليوم تمام مع بعض حوالي 7او 8 ساعات مع بعض نرغي ونكلم واول ما نيجي ماشين اعدي عليهم واحده واحده ابوس وامشي واجي الصبح تاني ابوس اول ما اشوفهم شغلانه بقي
ويا سلام بقي لما تكون واحده مش طايقها اساسا بس لازم نبوس فاكرين فيلم حرب اطاليا المشهد بتاع احمد السقا وخالد صالح(حبيبي يا ياسين)

بالظبط نفس المشهد بيكرر
ولما اكون زعلانه مع واحده صاحبتي ويصلحونا ع بعض خلاص اتصلحنا وبقينا تمام يالا بقي بسوا بعض ياسلام يعني هي البوس دي رمز الصلح(كل واحد دماغه مرياحاه)
ساعات كده بضطر غصب عني اروح لامي الشغل
يادي النيله ده يوم لوحده مينفعش ادخل كده واقول سلام عليكم واقول لامي الكلمتين وامشي لا لازم اعدي ع كل اصحاب امي اسلم وابوس اسلم وابوس ازيك يا صافي عامله ايه الكليه عامله ايه نفس السؤال ونفس الاجابه الحمد لله ماشيه يعني كنت وحشاكم اوي وكلكم بتبسوني

تلاقي واحده صاحبتي بتعرفني ع واحده تانيه العادي اهلا عامله ايه لا لازم ابوس كمان انا مالي ذنبي ايه ابوس انا لسه عارفاكي من ثواني ابوس ليه مش عايزه ابوس بس لازم ابوس برده ولا ابقي مش طايقها
واللي بيصعبوا عليا اوي الاطفال الصغيرين كل ما حد يشوفهم لازم يبوس الطفل ده لسه صغنون بشرته رقيقه احنا نازلين فيه بوس ليل نهار وفاكرين ان دي محبه الطفل بيكون مضايق لو يعرف يكلم يقول انا زهقت والله ابن الخويا الصغير كان كل ما حد يشوفه لازم يبوسه الواد يعني بقي يعيط لما حد يبوسه

هو ليه دلوقتي السلام العادي اللي هو اقل حاجه بوس
تشوف حد جاي من بعدي اهلا اموء اموء

هو يعني من غير البوس ابقي مش طايقه اللي قدامي ومش عايزاها تقعد معايا

مش ممكن انا عندي برد ومش عايزه اعديها او العكس
البوس والاحضان بقوا التطور الطبيعي للسلام بالايادي
نبوس الصبح واخر النهار بنمضي حضور وانصراف
والله احنا لو نعرف البوس ده خطير اد ايه نكره البوس واللي بيبوس محدش هبقي عايز ينباس تاني
ويالا هي يعني جت ع البوس