أغرب حاجة في البلد دى أهلها







أحلى حاجة فيها أهلها

أوحش حاجة فيها برضه أهلها

بحب مصر أوى علشان خاطر أهلها

واللى مجننى في مصر برضه أهلها


خفة دمهم وتريقتهم على نفسهم ذكاءهم الطبيعي وضحكهم وعدم تكلفهم أحسن ناس ترحب بيك لما تجيلهم غريب وأول ناس ينسوك بعد ما تمشى وأحسن ناس تقف جنبك وقت أزمتك و أول ناس تفلسع أول ما يبدأ الضرب

فهلوة المصريين ملهاش حل .. دهنوا الهوا دوكو واتكلموا من الموبيل من غير ما يتحاسبوا

أنا سمعت عن 4 صعايدة دخلوا المتروا في المانيا بتذكرتين رغم إن الماكينة مصممة إنها تكتشف اى تلاعب بالليزر ومتعديش غير واحد بس على مين .. مصريين كل واحد شال التانى على كتفه وعدى .. فهلوة فظيعة .. ضحكوا على الماكينة الألمانية .. لما بيحبوا بيحبوا أوى ولما بيقلبوا بيقلبوا أوى لما واحد منهم يعمل غلط يبرر غلطته بميت حاجة ولو حد غلط فيه يطلعه ابن ميت حاجة .. متقدرش تغلب واحد منهم في الكلام .. ممكن يطلعوا ببطل السما .. وممكن يبيعوا فى ثانية علشان خاطر إشاعة .. ممكن يثوروا وانت مش متوقع .. وبطلقة نار ولا ضربة عصاية تفرقهم .. بيضحك عليهم وهما عارفين وساكتين .. أعلى مجاميع فى الثانوية .. واقل شغل فى الدنيا .. أحسن ناس فى الكروتة .. ومع ذلك بنوا الأهرامات اللى استحملت 7000 سنة

بيحبوا ربنا اوى وبيخافوا منه ومع ذلك بيعصوه بيحبوا الدين جدا جدا ومع ذلك بيتهربوا منه

بيحبوا بلدهم أوى ونفسهم يهاجروا بره

بيكرهوا اسرائيل اوى ومع ذلك محدش بيعترض على سلامنا معاها

بيحبوا كل واحد من الإخوان لوحده وبيخافوا من كلمة اخوان مسلمين

رجالة اوى .. وعيال اوى

يحبوا الفول زى عنيهم .. وبيتريقوا على اللى ياكله

ميعرفوش يعيشوا من غير صعايدة .. ونكتهم كلها عليهم

شعب غريب جدا فى بلد غريبة جدا


يا بلدنا فيكى حاجة محيرانى ..


أنا عرفت الحاجة دى .. أهلك يا بلدي


بس برضوا بحبهم وهيفضلوا أحسن ناس فى الدنيا رغم إنهم بيحاولوا جاهدين إنهم ميكونوش كويسين بس الطيبة والذكاء والفهلوة وخفة الدم والكرم والحب والوحدة ربنا كتبها عليهم